Ziangtin Eiin Hawlnak Hna Ka Tuan Ding

                       Minung zozo khal hi ei le in lo in le kan um thei silo. Ei le in ding cun ei ding le in ding kan neih a rak tul. Ei ding, In ding nei ding cun hnatuan ih kan hawl a tul. Curuangah ziangti'n Ei le In hawlnak hna ka tuan ding? timi hi kan theih a tul..

1)Kawhnak - John Calvin cun hnatuan hi Pathian kawhnak siin a thei. Pathian in tuan thiamzawng (til thenzawng) in pe cio. Cumi tak cu kan eiin hawlnak ding hna cu a si. Curuangah Pathian kawhnak pakhat ah ruatin le rawngbawl ah ruataw phah in kan mai eiin hawl hna hi tuan ding kan si.

2)Teima Zetih Tuan - Kan Pathian hi Pathian teima(law) a si. Jesu Khrih in "Atu tiang ka Pa cu hna a tuan ih, kei khal ka tuan ve,"(John 5:17) a ti. Amah a zumtu cu an teima(law) ve ding a si. Christian-pawl cu kan hna eiin hawlnak ih kan hman mi ah teimak suah ding kan si. Kan hna cu a bangaw cio lo ding nan kan mai hna cio ih kan teimak hi thiltha khal a si.

3)Rinum Te'i Tuan - Kan Pathian hi A teima lawng silo in a rinum fawn. Amah zum ih kan pianthar tikah teimaknak le rinumnak hi kan pianthar pi ding ih ziaza tha le thupi tuk a si. Kan rinumnak ding cu Amah Pathian parah/ midang parah leh mah le hna ah a si. Mah le hna khal ih rinum lo hi cu thil zahthlak pakhat cu a si ding. Hotu/ hruaitu le midangpawl khal ih mi rin mi/ rintlak mi si hi thil tul zet mi a si.

4)Mai' Hna Zahpi Lo - Na eihawlnak cu ziangvek khal sisehla Pathian ih in kawhnak le in pek mi a si ti theiin zahpi lo ih tuan curco rero mei ding a si.

5)Lungawi Te'n - Kan eiin hawlnak hna cu lungawi tei' tuan hluahhlo men ding a si. John 4:34 ah Jesu in "i thlahtupai' duhzawng tuah le a hnatuan thehsuak ding hi ka rawl a si" a ti. Cutin misual in runnak ah a nun khal cu a hlan aw. Kannih khal in kan hna cu a te simaw/ a tum ah siseh/ a har ah khal/ bangthlak zet khal sisehla lungawite'n tuan niakno sehla kan hlawhtling in kan hlim thei sawn ding.

Netabik Ah- Kan Pathian hin kan eiin hawlnak dingin hnatuan thiamzawng(talent) hi in pe cio ih in kawhnak theithiam in Teima Zet in maihna cio ah rinumte'n Kan hnatuan mi tla zahpilo le lungawi te'n kan tuan a si ahcun Ka hlawhtling cio ko ding.

lungawi..

By, Salai Bawisiamthar Sunthang