Inn-umnak t'hit'ha nei lo mi tampi an um lai ah, beunak ding inn (a sia si maw/a t'ha si maw) kan nei ve hi a sunglawi tuk ka ti. "Khawvel ah mai' inn tlukih nuam a um awmlo mang e" an ti t'heu mi tla hi a dik ka ti zet fawn. Ziangahtile kan inn ahcun in duhdawttu kan nu/pa ,kan unau pawl tla an um. Cun inn ih um hi a nuam ih t'hat khal a t'ha fawn.
Na Inn Ah Tlung Aw! ka lo tinak san cu inn ah hin kan rak um ringring t'heu loih hmun dang ram dangah kan lenvah t'heu ruangah si.
1. Mitthlam in Evi le Adam kha vun cuan kirsal hman! Pathian thawn a lengtlang t'heu mi kha an hlo... Cun LUKE 15:1-7 ah a hlo mi Tuu taht'himnak thu kan hmu.Khaih a hlo mi Tuu kha a neitu pa in a va hawl hmusal ih a inn ah a tlunpi sal a sikha. Cutivek deuh cun Piter in a cakuat mi zumtu pawl hnenah "nannih cu Tuu bangin zinpeng nan rak zawh,Sikhalsehla a tuah cun nan nunnak kilvengtu le Tukhaltu hnenah nan ra kirsal zo" (1 pet 2:25) tiah a ti. --Nangteh Eden ihsi na hlohnak hmun ihsin na kirsal zo maw? Paul khalin Ephisa khua ih zumtupawl hnenah hiti'n a ti "Atuah cun mikhual le ram dang mi nan si nawnlo ih mi thianghlimpawl thawi' ram khat mi le Pathian sungkua nan si sawn." (Eph 2:19) Sual ruangih kan hlohnak ah cun Jesu in thing Cross parah in hawl hmusal zo.Jesu'n a lo hngak lai, Na Inn Ah Tlung Aw!
2. Fapa tlanhlo kha vun ruat kirsal hman! (Luke 15:11-18) A umnak a pai' inn ihsin khawvel mawinak le sual nawmnak phunphun cen dingah a tlanhlo, nuam zet vekin caan a hmang nan a netnak cu beidongih sirawknak thotho a si kha. (mai' inn a nuambik) --Khawvel ah hin nawmnak taktak a um lo,a caan caan ahcun a nuamzet vek a bang nan a tlamtling taktak lo hokhaw. Mifim/milian/mihminthang maktara Siangpahrang Solomon khan a duh/cak mi hmuahhmuah a nei in a tuah thei thluh ko nan "thil ziangkim hi zianghmanlo men an si" a ti a si kha. --A lo duhdaw ememtu Pathian cu tlansan in khawvel sualnawmnak par tlan in na can sunglawi tak hi na hmang pang maw? A lo zoh ringringtu Pathian in duhdawtnak mit thawn a lam ih na hawikir ding caan hngakin a lo thlir ringring sokhaw. --Fapa tlanhlo bangin sualsirnak thawn Pathian t'angnuam lam cu pan in Na Inn Ah Tlung Aw!
3. John 14:1-41 kan siar a sile Jesu in kan umnak ding hmun a timtuah rero a si ti kan thei ding. Cun (Matt 25:41) kan siar a sile Hell meisa cu Setan le a hopawl umnak dingih tuah mi a si zia kan hmu. --Catuan ih caan na hmannak ding hmun na thei zo maw? Na hrangih timtuah mi cu vanram khi a si, Jesuh Khrih cu vanram fehnak lamzin umsun a si (John 14:6) Setan le a hopawl hrangih a timtuah mi Hell-ram ih na feh lonak dingah Jesu ih kan hrang a tuarnak le in rundamnak thu hi rak zum ve thlag aw! Cun na thih tikah na Inn Ah Tlung Aw!
Thunetnak Kei cu Eden ihsi ka hlohnak in Lalpa Jesui' ruangah ka pai' t'ang sungah ka tlung kirsal zo.Asinan vawi tampi cu khawvel sual nawmnak par tlan in ka caan ka hmangsal t'heu, cun vawi tampi cu beidong vansang in khal ka um sal t'heu. Cui caanah ka Pa cun duhdawtnak thawn in thlir ringring t'heu ih nunsimnak thawn a lamah in hruai tlungsal t'heu. Cuti'n hnangam te'n ka cawl hahdam theisal t'heu. Cule vancung ram khi ka hrangih timtuah mi a si ti ka theifiang zo ruangah ka thi a siah cun van innpi nuamah ka tlung tinak a si ding.
Nang khal na Inn ih na tlun ve beiseinak thawn..
By, Salai Bawisiamthar Sunthang
No comments:
Post a Comment