Exo.13:17-14:31
1)Exo.13:17 - Pathian in a mi Israel-pawl kha lamzin tawinak bik in a hruai lo. Ziangahtile ral an do ding mipawl an hmuh tikah an thinlung thlengaw in Izipt ramih an kirsal a phan ruangah a si. = Pathian in kan nunnak ih a tumtah mi, in hruai thlen tumnak ah lamzin tawinak ih in hruai thlen lohlilonak san cu kan rak pitlinglo tuk theu ruangah a si.
2)Exo.13:18 - Cui lamzin aiah, nelrawn ramthing ihsi'n tipi sen lam ah Bawipa'n a helpi hai. = Pathian hin lamzin saunak lam ih in hruai theunak cu cutawk ah a kutcak, thiltitheinak in hmuhter ih rinsantlak a si zia hmuhter in duh ruangah a si.
3) Exo.13:21 - Sun ih an lamzin hmuhtu ding ah an hmai ah mero zual in an hmaiah a feh ih, zan ah tleunak pe dingah le sun, zan an feh theinak dingah meisa zual in an hmaiah a feh. = Kan lungawi lai can le riahsiat lai can (sun le zan timi cu minung zokhal ih kan ton rero cio mi a si) khal ih in hruai tumnak hmun lam ih kan feh vivo theinak dingah, Bawipa Jesu cu kan lamhmuhtu siin kan hmai ah a rak feh. A dungthlun(keneh thlun) ih feh vivo ding hi a si.
4) Exo.14:1-4 - Pathian in lam in hruai lai can khal ah hin kan hmailam ah tipi sen minung cahnak ih tan ruallo beidonnak tla hi a um theu. Cutawk hmun ah cun zan tla riah a tul theu. In lak kian sak lohli theulo.. Cui' tlunah kan dunglam ih ralpawl in an sal ih in ra kaisal tum ih an rat kha a siang bet lai. Asinan Pathian cun ralpawl kuthnuai ih kan thlensal a siang tinak cu a si riailo. Amai cangvaihnak hngah thiam a thupi nasa. = Pathian in mangbang, vansang ih kan um ih cumi ihsi' amai cahnak a lang ih, hi khawvel mipawl in a thiltitheinak an hmuh theinak dingah a si.
5) 14:5-9 - Pathian kilvennak hnuai ih tlangleng rero siin hmakhuapit, fehnak umlo, culawng silo dunglam in ralpawl an ra thlengzik. Cumi cu Pathian in a hmu in a thei amai' siannak in le tumtahnak vek a si ko. = Harsatnak karlak kirngaihnak le um nonlo hmailam pan theih non fawnlo laklawh ah hin Pathian minungpawl hi kan um can tampi a um theu a si.
6) Exo.14:10-12 - Cutikah can ah cun a remruah theithiamlo ih tah le aihram a awlte ko. = Phunzai rero ih ahlan nun khal ngaiin kirsal mei khal a cakum theu.
7) Exo.14:13-14 - Asinan Pathian cun a siahhlawhpawl le Athu-Bible hmang tla in phanglo ding le Amah ih a neh ding thu tla a phuang langsal theu. = Zianghman tihlo le hnangam tei' a kutcak hngah ding a si. Mai' nehlo ding mi rak sual ciamco a tul lo. Amah Pathian rinsan in A tikcu hngahthiam a tul.
8) Exo.14:15-18 - Cui' tipi sen cu Pathian in a thenawk ter hnu khal ah ralpawl an rat vivo kha a siang lai thotho. = Ziangahtile nasatak in ralpawl sunter ih amai' hmin than ter a duh.
9) Exo.14:19-20 - Ralpawl in dunglam ih in naih vivo tikah in man ahcun kan nehlo ding ti Pathian in a theicia ih amah in in rak khamsak theu hi a si. = Kan ralpawl thawi' kan karlak ah Kan Pathian hi a um ring2 ruangah ralpa satan hin a duh vek cun in tuahmawh theilo lawlaw.. Pathian in kan tuartheilo ding khop tiangin thlemnak hi kan parah a thlenter dahlo.
10) Exo.14:21-22 - Kan hmai ih kan fehnak in khamtu cu Pathian in thli hmangin a sem kiangih mangbangza a thiltuah cia mi parah cun in feh ter theu. = Asinan kan kiangkap ah cun tihnung tampi an um lai hrih. Kannih cu Kan Pathian lamzin sialcia mi parah raltha takih feh vivo ding kan si.
11) Exo.14:23-25 - Cui' a lamzin in sialsak mi parih kan feh lai tiangih in dawi vivo thotho ahcun Pathian in a hmu thluh, a zoh ring2 hai a si. In man thei ngaingailo dingin le ziangti'n hman ih in siatsuah theilo dingin Pathian a cangvai ding. = Cutik ahcun ralpawl cu an bei a dong ve thlang ding.
12) Exo.14:-26-29 - Cutikah Bawipa in sal ih in kaisal tumtupawl, Amah be theilo ding le A rawngbawl theilo dingih in kaihremtupawl cu Amah Pathian in in nehsak thluhsal theu a si. = Cuticun kan nunnak cu Pathian thiltitheinak hnuaiah a tlangleng ih cui' in khamtu le in dawitupawl lak ihsin kan luat thlang ta..
13) Exo.14:30-31 - Cutikah in rak khamtu tipi sen ih khatlam ral kan thleng thlang. Kan ral a simipawl cu zianghman tithei nonlo ih an um kha kan hei hmu. = Kanmai' cahnak silo Pathian Thlarau Thianghlim huham cahnak sawn in kan ral asimi kan minung hlun(tisa) cu nehin a um ta. Ziangtik hman ih kan rak neh thei dahlo mi cu Pathian kaihhruainak hnuaiih kan pumpekawk ih kan hlanawk tikah cun Anih ziangkimtithei cun in nehsak theu a si.
Kan mahte ih kan nehthei theulo mipawl in nehsak ih nehnak in coter theutu cu Ttihzah, upat ih rinsan kumkhua ding kan si.. Amen!
By, Salai Bawisiamthar Sunthang
No comments:
Post a Comment