KA RUAL THABIK

  

Minung hi mahte lawngih um dingih sersiam kan rak silo ruangah a si ko ding rualpi nei lo hin kan um theilo a sibik ko. Ruallepipawl thawi' nawmnak a phunphun tuah tla hi nuam kan tiin kan phur tlang thei hai nasa. Asinan kan umnak khawvel hi famkimlonak ram a si bangin ruallepawl thawi'h hmunkhat ih umtlang thei ringring loin hmun dangdang ih kan thenawk a rak tul theu, cutik can ah kan ngaiaw in kan lung tla a leng ih mi hrekkhat tla cun ruallepi ngaiawknak hla tiang an rak phuah ih a sak tla kan sak theu.

     Kei khal rualpi kawm ding thitha neilo ih um hi (nuamlo tiin) har ka ti ve zet theu. Rualpi neih hi a thazet, amahlawngte kan kawm ding mi rualpi hi a thupi tuk. Ziangahtile "RUALPI THA CUN MI AN DUHDAWT"(Thuf.17:17). Thinharnak, vansannak le harsatnak kan tawn can khal ah rualpi tha cun mi an hnem in mi an bawm theu. Kan mangbang le beidon lai can ih in bawmtu thabik cu kan rual tha an si tlangpi. Curuangah rualpi loih mahte(ngalpak bangih) um hnak cun rualpi neih hi a thasawn a si.

   Rualpi neih hi a thattuk rualrual in rualpi thalo kan neih ding lawngte cu tih a nung zet lala fawn. Ziagahtile "RUALPI THALO IN ZIAZA THA A SIATTER"(ICor.15:33). Na rualpi ih umdan, a tongdan le a umtlandan(a mizia)pawl cu na theihlo sungah na mizia ah a cang ding. (misual pawl cu sualvenak, mi fel na pawl le na fel ve ding ti a si kha). Curuangah kei cu rualpi suallam ih in hruaipengtu ding neih hnak cun rualpi loih mahte umhar tak ih um nguaingi khal ka hril sawn.

-"Rualpi Tha A Neitupawl Cu:
Mi Vantha le Dawtum An Si".

Thuf.19:4 - "Lennak in rualpi thar tampi a suahter; Sikhalsehla mifarah cu a rualpi cia hman in an tlansan theu".
-"Rualpi Tampi Neihhnak Cun:
Rual Tha Neih A Thupi Sawn".

   Hi khawvel minung lakah duhdawt, lainattu rualpi tha nei velo hmanningla mi pakhat a rualpipawl hrangih a nunnak liam(pe ngam) tiangih a duhdawtnak langtertu Jesu ka neizo.(John 15:13)
A rualpi hrangih a nunnak tiang hlan ngamtu(siangtu) Anih hnakih rualpi tha dang um cuang hlangee...