SEX THEIHNAK HI SUAL A SILO (Sex Consciousness Is Not Sinful)

                

Hi leitlun minung kan zate' mei hin rilrawn kan theiih cucu taksa ih kan tul mi (physical demand), minung kan sinak ih um ve mi hrimhrim a si. Cuvek ciah cun Sex theihnak khal hi (natural) minung kan sinak ih kan ken tel ve hrimhrim mi pakhat a si ve. Cucu sual ih ruah le ningzah ih ruah ding khal a si hran lo. Asinan kan ril a rawn ruangih rawl kan fir(ru) a si ahcun cucu sual (unnatural) a si. Cuvek thotho in sex kan theihnak khal hi sual ih ruah cu a silo nan diklo takih kan cakhiarnak kan hrikthlak ih kan pitlinter a si ahcun cucu sual( thil thalo tak) a si. Curuangah sex lam ah cakhiarnak luarkai tuk na neiih na supaw thei nonlo ding a si ahcun nupi/pasal nei mei aw! Cumi cu kan Bible ih duhdan khal a si ( 1Cor.7:2,9 siar aw!).

Sex theihnak hi Pathian in minung a rak semsuah thok ihsin a rak pek mi a si. Cuti'n minung in sex an theihnak ruangah nu le pa (mipa le nunau) mamawhawktonnak a ra thleng. Curuangah neihawknak (thitumnak) khal hi sex theihnak ruangih minungpawl ih tul mi pakhat a rak si.
Neihawknak timi hi minung sual ih an rak tluk hlan khuapi ihsi' Pathian ih a rak umter zo mi a si (Gen.2). Minung sual ih a tluk hlan ah neihawknak a rak um zo a si ahcun Sex Theihnak kan timi khal leitlun ih sual a luh hlan ah a rak um zo tinak a si. A umzia cu sual um hlan ah sex theihnak a rak um zo ruangah sex theihnak hi sual a silo ti a fiang. Ziangahtile Pathian in minung a rak semsuah lai ah khan sual neilo thianghlim, fel famkim in le sex theihnak nei in a rak sersiam a si.

Sex theihnak hi neiawknak (thitumnak) hring suaktu pakhat cu a si ve hrimhrim ko. Sex theihnak ruangih supaw theilo in falat tlangval sualnomnak(fornication) tuah hi thil thalo le tihnungza zet a si. Supawk theilo ding hnak cun neih mei ding a si ko. Cutilo cun sual a tuahtu parih a thleng leh ding mi thuthennak tih a nung tuk. Kan Bible khal in "Ziangkim ah thitumnak hi sunlawih si seh la, ihkhun cu bawrhhlawhter si hlah seh; cun nu le pa sualnak a tuahtupawl le uirepawl cu Pathian in thu a then hai ding"( Heb.13:4), tiah a ti.


Nunau in mipa/ mipa in nunau kan mamawhawton. Curuangah minung cu ramsapawl hnak aiih danglam le cungnung sawn ih sersiam mi kan si bangin ui le ar bang ih duhduh ih nung men ding kan silo. Uiretnak leh falat tlangval sualnom tuahnak(fornication) lak ih kilhimawktheinak ding hrang ah cakhiarnak nasa zet a neitu cun mai' nupi/ pasal bul neih lohli mei ding hi kan Bible ih in forh fial mi a si (1Cor.7:2,8-9). Sex theihnak luarkai deuh nei mi na si ahcun nupi/ pasal nei lohli mei aw! (ICor.7:9 "nupi pasal neih cu cakhiarnak nasazet thawi’ um rero hnakin a thasawn".)
Sex Theihnak Hi Sual A Silo. Asinan Na falat/tlangval lai ah himi na sex theihnak hi hmang sual pang hlah aw!
    By, PaTeng