A
hmaisabik ah cun hi Vehvaitu tuisun
ni tiang suak thei dingi lam hruaitu le tawlreltu nan zate parah lungawi thu ka
sim duh. Cangantupawl cangan an thiamin thazang ka ngah theu nasa, hmailam
khalah suah peh vivo a si theinak dingah tan la deuhdeuh dingin ka lo fawrh duh
fawn a si.
Kan
thupi ah vun lut cih mei sehla nulepa in fate an duhdawtzia hi a makin a ropi a
si. In kilkhawinak lamzin hi lamzin nuam a si lo nasa, hla khalah tampi an rak
phuah zo. Zianghman lo kan si lai naute ihsin mallai vun zoh sehla, hnawiti
thlum le anmah hman an ei puar hlanah kannih in hrai puar hmaisa theu. Ni
khatte hman pelh loin kan tul poimawh ngaihtuah in a sur\a sa, thinlung ruahnak
hmuahhmuah sengin hawi kan dawt phang le mi lakih kan tlan theinak dingah
zirnak tlawng, kan ninghan le kan tah in sianglotu, sumpai kan tul caanah
cawicawp tiangin, an hrangah ziangha maw kan si? ro hmuahhmuah lakih ro
sunglawibik mawle (Sam 127:3). Pathian ih in duhdawtnak vek hi a si.
Mai’
nulepa rori nauhak vekih tirhfial rero tla theih ding le hmuh ding an um, a cak
lo sawn an si miau si cun an fial vekvekih an tuah a tul bawksi, an thinlung cu
a tap rero theu ko ding. Thuf.23:25 na nu le na pa lungawiter aw! An lungawi
zawng cu ziangha: Unau ngaihsakawk le duhsakawk tla, hnatuan taimak le Pathian
tihzah, a awl a har khalih thulun le rintlak zetih um tla, a tampi ding.
Thuruat thiampawl tla cun hnilepuan, ei\in le vawk thah tiangin an tuah, an ti
tha hle mei. Asinan cuvek kherkher a tul cuanglo kan thinlung tak i kan upatnak
hi a thupi sawn mi cu a si. Kan pumpuarnak ding le kan tul mi tampi hrangah
hnatuan a tul tihman ka theihthiam hlanih ka pai’ hnatuan tlung le feh bang zet
lai tla ka mitthlam ah a cam nasa, anih tla mual in liamsan zo ta cu a si i, hmansehla
a lakah sirawk ding ka nei lemlo, nan tu ah hin dam ve lai sehla cu aw tiin
vawi tampi cu ka mitthli a tla theu.
Thil
tha kan tuah caan, kan hlawhtlin caan le kan lungawi caan i lungawi hmaisabiktu
cu nulepa hi an si. In duhnak a tumtuk ruangah mi tampi cun sual lamzin an zawh
thei phah hial a si. Thil sual kan tuah pang caan ah kan unau, kan nupi/pasal
khal i in ngaidam thei lo caan khal ah sirawknak thawn kan kirsal ding in hngak
theitu an si (Luk.15:20- Fapa tlanhlo). An thih hnu an ruang parih sirawknak
thu sam rero ai cun an dam lai ni a tlak hlan ah theitawkin tuamhlawm sawn aw!
Hmailam caanih kan cawmawknak ding tiang khua in khansaktu hngakhlap takih kan
tuan thei ding tikcu rak thlirtu an si ti theiin kan kut zoh hi har ti hlah hai
seh. Kan kawhhran sung khalah ramsung ramleng in hnatuan thei kan lo nei i, nan
tuan mi rahsuahte hmuh le kilkhawi hi nulepa in kan duh ngaingai a si. Sumpai
hi kan Pathian/Bible khal in a ngai pawimawh i tampi in ngansak. Vun rel uar
deuh sehla nulepa karlak ti se theitu, innsang tampi ti buai theutu le nunnak
tamtak laksaktu a si ti theiin ralring uhsi.
Mi
tampi cu mai’ tuan mi maita ih ruat mei, mai’ tha le tul tinak i hmang an
tampi. Cuti siloin nulepa hnenah thlenin kan tulnak tla rel tlangin an kut
ihsin hmang tlang sehla a mawi in a tha a si. Kan tuansuah mi hnakin nulepai’
lungawinak, duhsaknak le thlawsuahnak hi a tumsawn tihi hngilh hlah uhsi.
Pathian in David ka lung tawng a ti vekin nulepai’ lungtawngtu si hi a pawimawh
hle mei. Cun inn pawn kan suak zo a si khalle nulepa fingkhawi nawnlo dingin
diknak kan nei lo. Ziangahtile unau zaten bangrepte i in tuamhlawmtu an si. An
tulsam mi zoh i kilkhawi le cawimawitu dingah mi fanu le fapa fial theih a si
lo. Nangmai’ ruangih a ei ding zat a ei lo le a hruh ding zat a hruh lo, kan
nawm theinak dingih harsatnak an paltlang zozai hi kan lei pathian cu an va si
tak em. Amah um hlah sehla na sem lo ding ( Thuf. 23:22), tuisun tui’ dinhmun
kan thlen theinak cu nulepa an rak si e. Nulepa hminthattertu le an duhsaknak
thlawsuah dawngtu fanu, fapa si cio uhsi!
Nu Lal Ram Muan
No comments:
Post a Comment