A famkimnak kan co cio, zangfahnak tlunih
zangfahnak cu!
Awle, kan Pathian in a sersiam mi minung cu
amai’ nun tawmpi dingah le amah thawi’ lengtlang dingah Evi le Adam cu Eden hmuan
ah ziangdang ngai lo in nun an rak hmang. Asinan kan theihcio bangin, anmai’
duhhrilnak rori hmangin Pathian nun tawmpi hnakcun setan lam an hrilsawn ih,
cuti’n sual ah an rak tlu ta a si. Anmah ten Pathian ral ah an rak tuahaw aw a
si. Cui Adam mi pakhat sualnak ruangah sual cu khawvel ah a ra lut ih, mi
hmuahhmuah cu misual, Pathian doral ah kan cang thluh a si. Rom.5:12
Nunnak Thar
Malsawmnak
Atlunlam ih kan sim zo bangin leitlun minung
hmuahhmuah cu thil ti sualtu kan si theh i, Pathian ropitnak kan coban nawnlo,
Rom.2:23. Misual a sunlawinak coban lo dinhmun ih kan din lai khal ah a zangfah
duhdawtnak cu thangthattlak in a langter ih misual kan ai ah a fapa Jesuh cu in
pe a si.(Rom.5:8). Cui fapa Jesuh thihnak le thawhsalnak cu keimai hrangah a si
tiih zumtu cu Pathian fa sinak le ro cotu kan rak si ta mei. Tu ah cun kan mai’
felnak le thatnak ih hlawhsuah ban lo mi nunthar sunglawi tak cu fapa Jesuh ah
in pe sal zo ih nunthar malsawmnak kan ti lo thei lo a si.
Malsawmnak
Thuahhnih
Pathian fa kan si hnu khal ah hin kan
neih mi nun cu a hlo lo nan, Pathian kan pawlkomnak nun cu Setan in vei tampi
in tisiat sak theu. Luke 15:11-32 kan siar asilen fapa tlanhlo thu kan hmu
ding, fapa nauta sawn kha a pai’ run inn ihsin a tlan hlo ih, a pa thawn an
pehzomawknak cu a fel nawn lo. Sualnak phunkim ih a nun a hman hnu ah, beidawng
in a pai’ inn ih a kirsal tikah a hlan ih a co ban dah lo mi thlawsuah malsawm
ih thawm in a um. Cubangin zumtu tampi khal Pathian lak ihsin kan tlan ih, mai’ tuanvo le mai’
dinhmun khal hlensuak thei lo ih sual ih kan tluk tikah beidawng mei hlah uh
si. Pathian in a zangfahnak za in san ringring ti thei in a hnen kan pan sal a
si ah cun in cohlang in in tuam dam tengteng ding.
Pathian in veikhat zangfahnak ka ngaidam zo
ih a tawk a ti dah lo. Pathian zangfahnak cu cem ni a nei lo, zangfahnak tlunih
zangfah vivonak a si.
By, Pu Biak Lawm Zual
No comments:
Post a Comment