NA UKNAK THLENG HRAM SEH!

                                                                  

Matthai 6:9-10 – Curuangah hi bangtukin thla nan cam pei: “Vancungih a um mi kan Pa na hmin thianghlim cu upat si ko seh! Na uknak thleng hram seh! Vancungih na duhnak tuah a si bangin leitlun khalah tuah si ve seh”.

Vancung uknak/Pathian uknak tiih Bible ( A hleicein Mathai,mark,Luke le Jonh) sungih a rel mipawl hi a sim duh mi ngaingai (Literal meaning) cu hmailamih a ra thleng leh ding mi kum thawngkhat uknak (Milleniam Kingdom) thu a si. Cun Jew-pawlih an beiseibik mi le Jesu khalih tahthimnak a phunphun thawih a sim tam emem mi a si fawn. Bible thaten kan siar a asile Pathian uknak ti le Vancung uknak timi khal hi bangawk lonak nei (Vancung uknak- Kum 1000, Pathian uknak- thlarau lam uknak) vekin a lang( a si thluh cuanglo men ding nan). Tui’ tumih kan Bible canghril miih a rel duh mi taktak cu hi leiih Kum 1000 sung uknak thu a si ko. Asinan tulai kannih zumtupawl Pathian ih in uknak, thlarau lam thu thawn ka run ngan vivo ding a si.

Kan Beisei Dan Ding

Jews-pawl in Jesu kha leiah lalram ropi zet din dingih an rak thlir laiah an beisei vek siloin Anih cu a  niambiknak hmun rankhengah suakin Joseph le Mery hnenah a thang lian. Kum 30 hrawng a si tikah A Pai’ rawngbawl in Pathian uknak a rung thlen thu tla a rel suak (Mathai 12:28). Cangantu pakhat cun “Pathian uknak le kawhhran hi bangaw ( thuhmunkhat) vek deuh a si nan bangaw ciah silo hi a si. Pathian uknak a rung thlengih cuhnuah Kawhhran a rung ding ve, cutin kawhhran hi Pathian uknak a karh vivo theinak dingih hmanrua/ kut le ke cu a si.” tiin a ngan. Jesu in lei lalram cu a din hrih lo i, thlarau lam lalram, minung thinlung lamah a din sawn a si. Kan minung duhnak le ruahnak thiatbal in a mai thuneihnak  le lalnak kawhhran din a tum sawn a rak si. Curuangah a uknak thleng ding cun Amah Jesu kan zum, kan neih ta a tul a si.

Jews mipawl cun lei lalram an rak beiseiih tui sun ni tiang khalah an beisei lai. Jeim le John in Jesui’ hnenah Lal tohkhamih a to tikah a vorhlam le kehlam ih to ding in tla an dil a si. Asinan Jesu cun a dungthluntupawl hnenah mi thupi zet le mi tumbik si a duhtu cu nan zate ih sal a si ding a si. Mark 10:45 “Milai Fapa hman hi ren mi siloin riantu si dingah le mi tampi tlen dingah a nunnak pe dingin a ra sawn a si,” tiah a ti. Curuangah Jesui’ lalram, A uknak sungih lut ding cun tangdawrnak thawn midang riantu si a tul a si.

Ziangruangah Pathian Uknak Ram Din A Tul?

..  I John 3:8b “Pathian Fapa a langnak cu Setan hnatuannak siatbal theh ding rori ahhin a si”.  Pathian ih a duhdawt zet mi Amah thawi rak lengtlang theu mi minung cu Setan in thenhran in a siatsuah thluh. “Uico cu a bo ruangah siloin uico a si ruangah a bo sawn” tivek deuhin sual fate, sual tuahnak lam cu sim le zirh tul loih thiamcia Setan uknak lalram ih a ceng mi minung kan rak si. Cu mi cu thiatbal in Jesu in a minung/zumtu kan nunnak ah Amai’ Lalnak ram Pathian uknak cu din a duh a si.

Kan Bawipa Jesu in a dungthluntupawl hnenih a thucah netabiknak khalah (Mark 16:15) “ Leilung khuazakip ah va feh uhla mi hmuahhmuah hnenah Thuthang Tha va sim uh” tiah a ti. Curuangah zumtu nang le kei khal in Pathian uknak, lalnak din dingah thuthang tha hi kan ti thei dandan cio in kan aupi ve a tul a si.

A Uknak Ram Sungih Nun Dan

Jesu in hi leitlunah a lalram kum1000 uknak a din tikah cun khawvel ahhin remnak, pumkhatawknak, daihnak, lungawinak, duhdawtnak le hnangamnak in a khat thlang ding a si. Ziangruangahtile leitlun le a sungih thil um hmuahhmuah hi Jesui’ uknak(lalnak) hnuaiah a um thluh thlang ding. Jesu in pumhlumih lalnak a conak hmun rengrengah buainak hi a um thei lo a si.

Cutivek ciah in zumtu kan nunah Jesu in lalnak kan coter tikah iksikawknak, remawklonak le huatawknak a um non lo i, kan nunnak cu hlimnak in a khat theu a si. Zumtu Pathian ramsungih um ( mi piangthar cu si ve )cing khalih midang thawn remaw thei lo, mah cu mi thupi zetih ret aw le midang aiih cungcuang deuh ih ruataw,  midang hmuhsuam le nautat-tupawl cu an nunnak ah Pathian lalnak a pe taktak lo tinak a si. Cubangpawlih nun cu a hahdam thei taktak dah lo a si.

Curuangah Pathian uknak ram cu kanmah bulpak, innsang, kawhhran le khawtlang le rampi par tiangah thleng camcin hram seh, ti hi a va duhum so! Cuvek uknak ram cu kan nunnak ah thleng hram seh tiin thla kan cam khal a tul si. Na uknak thleng hram seh! Kan ti tikah Pathian ih thuneihnak/rorelnak cu thleng seh kan tinak a si.  Bawipa Na uknak cu kan Kawhhran, Innsang le bulpak cio kan nunnak ah thlen ter ve hram aw! Cutin Vancungih na duhnak  tuah a si vekin hi leiih kan Kawhhran khalah tuah a si ve thei ding a si. Amen!

     By, Salai Bawisiamthar Sunthang