VEHVAITU SPONSOR TEMUAN INTERVIEW (Vehvaitu Sponsor-tu Temuan Tonsuhnak)

1) Vehvaitu - Hello! Dam maw? Ngai na um zet thlang si a..
Temuan - Aw Pathian zarah ka dam cak nasa. Nannih khal ngai nan um tuk.

2) Vehvaitu - Korea ah na um ti kan thei theh zoih, ziangtik kum ah na rak thlengih ziangtluk hrawng na umnak caan a rei zo?
Temuan - Kum 2016 April 5 ni ah Korea ram cu Pathian zarah ka thleng ih tu hi Kum khat le thla khat a kim thlang.

3) Vehvaitu - Aw theih man hlanah a rak rei ve man zet thlang si maw... Ziangvek hna na tuan ih nan tuan caan/ nan colh caan tvk in sim thei pei maw?(Khawm mannak caan teh um ko maw?)
Temuan - Aw e can hi a rak liam cak khawp mai. Kan hna cu Construction a siih thir lam ka tuan. Kan hnatuan can hi zing nazi 7 in zanlam nazi 4:30 tiang a siih ni khat ah nazi 8 sung kan tuan. Over time a um le cu a um dan ih zirin kan tuan. Off day hi cu may ni khat May Day le Chusawk an tiih anmah Korea puai ( kan lamih fanger puai vek) le Sawlnal an tiih an Kum thar puai himi ni pawl ah hin kan cawl.. Culo cu kan mahten kan bang deuh can le cu ka cawl thei ko. Cawlh ni hi a can khat tawkah cun ka khawm ve theu.

4) Vehvaitu - Kha tawk na umnak ram ah Christian Fellowship/ siatni le thatni tvk ih zohawknak ding Pawlkom tvk a um maw? Cun member ih telnak teh na nei ko maw?
Temuan - Aw um e, FCFK ( Falam Christian Fellowship Korea) ti mi ah ka tel.

5) Vehvaitu - Na hnatuanpi, rualpipawl ziang miphun an tamih Christian teh an um maw?
Temuan - Hnatuan pi hi Myanmar(kawl) mi hlir an si i, Christian an um lo.

6) Vehvaitu - Tui' na umnak ramah hin ziangtluk tiang um na tumih ziangtik caan hrawngah innsang din ve sehla tivek na saduhthah in sim siang maw?
Temuan - Siang tuk e, Hnatuan ih um kan siih kan hnatuannak ih စာခဴပ္ hi Kum thum a si, curuangah Kum thum cu ka um ding ka zum cu mi hnulam cu k rel thei lo. Innsang din lam cu....... thei hrih lo, Pathian rem ti dan si ko.

7) Vehvaitu - Khatawk ram lamih "an thil ti dan tete na hmuhton mi ihsin kan ramah tuah thei ve sehla tiin an nundan cawntlak rori a si" timi na nei maw?
Temuan - Aw nei e, an teimaknak hi zohthim an tlak ka ti zet.

8) Vehvaitu - Vehvaitu hi na rak siar ve dah maw? Na hmuh dan in sim thei pei maw?
Temuan - Aw siar e, tha ka ti tuk! Pathian in kawhhran sung rawngbawlnak hrangah mino hnenih in pek mi a si tin ka hmu.

9) Vehvaitu - Himi Interview a rak siartu kan Kawhhran-pawl hnenah Vehvaitu hmangin thucah duh/ relduh na nei le in sim ta awla!
Temuan - Kawhhran innsang tin, Pathian in a rawngbawlnak ah lo hmang vivo hram seh.

10)Vehvaitu - Na caan sunglawi pe in kan interview(tonsuhnak) felfai zetih in sansaknak parah kan lungawi. Cun Vehvaitu na sponsor-nak par khalah kan lung a awi tuk! Pathian in lo thlawsuah vivo hram seh tiin duhsaknak kan lo hlan..
Temuan - Amen! Kei khal ka Lungawi.

ZIANGRUANGAH ZUMTU IN HARNAK KAN TUAR?

                                                   

Harsatnak hi khawvel ih a ken tel rere mi a si ruangah a sungih um minungpawl khal hin harsatnak a phunphun in kan tuar theu. Himi harsatnak, tuarnak kan timi hi khawvel huap(universal) a siih mi zo cio khalih ton mi a si(Job 5:7). Kan ton dan, kan tuar dan cu a bangaw thluh lo, hrekkhat cu nasa deuh in an tuar, hrekkhat cu malte ziaum deuh in, asinan mi hmuahhmuah in kan tuar  a si. Ziangruangah?

1.Adam Sualnak Ruangah (Original Sin)
A tlangpi thu in leitlunih harsatnak ra thleng mi hmuahhmuah hi sual ruang ih ra thleng an si, harsat tuarnak a umnak san bulhrambik khal hi sual ruangah a si. Pathian in leilung a sersiam tikah ziangkim hi a tha thluh, cumi cu sual in harsatnak a run thlen hlan sung ah khan a si. Adam in Pathian thu a thlun lo hnu ah cun, Pathian in leilung hi a camsiat ih hling le so a suah ter, minung lala khal leilung ah na kir sal ding tiah a ti a si( Sem.3:16-19). Curuangah hi khawvel hin Adam sualnak ruangah harsatnak hi a keng tel cia ringringih kannih zumtupawl khal milai taksa, thisen nei in leitlunih kan um lai ruangah kan rak tuar ve theu a si.
Kan tuah sual ruangah siloin Adam ih sualnak ruangah harsatnak kan tuar ve a si.

2.Bulpak Sualnak Ruangah ( Personal Sin)
Bible thukam hlun sung lam kan zoh asile, Pathian ih tuanvo hleice a pek mi Moses a relsiat/ thangsiatnak ruangah Miriam kha pharnat a tuar(Mipum. 21:1-16), Milem khawzing biaknak a siatsuah lo ruangah Judah  siangpahrang Uzziah khal Bawipa in pharnat a tuar terih a nun sung hmuahhmuah a tuar lanta a si ti khal kan thei(II Siang.15:1-7). Thukham Thar lamah cun Ananias le Safira  kha thuphanper sualnak ruangah an nupa in thihnak an tuar phah veve a si(Apos.5:1-11). Bethesda tili kapih mizengpa Jesu ih a damter mi kha lehhnu ah Jesu in biakinn sungah a tawng ih, “zohhnik! Atu cu na dam zo; curuangah va sual nawn hlah. Culole na parah thil tha lo sinsin a thleng ding,” tiah a ti(Jn.5:1-18).
Kan bulpak thil ti sualnak ruangah hin kan parah tuarnak hi a ra thleng kir sal mi tampi a um a si. Curuangah zumtu nitin kan nunnakah ralringten ke kan kar a tul tuk.

3. Pathian Kutcak A Lang Theinak Dingah
John 9:1-12 sungih a suahkeh ihsi a mit a caw mi pa kha amai sualnak ruangah le a nulepa ih sualnak ruangih mitcaw siloin Pathian thiltitheinak kutcak cu cupa damternak ihsi a langtheinak ding sawnah a si, tiin Jesu in fiang zetin a rel a si.
Kan sualnak ruang kher ah si cuanglo hin kan parah harsat buainak hi a ra thleng ve theu tho a si. Pathian sunlawinak kutcak kan hmuh deuhdeuh ih amah kan theihfeng le kan rinsan sinsin theinak dingah a si.
Cui’ tuarnak ruangah ah cun Job khal in a mit rori in Pathan a hmuh thu a au suakpi a si(Job 42:5). Danial tei’ rualvahpawl ih tuarnak sung khal ah khan Khrih hmel hmuh ding in a ra lang a si kha(Danial 3:25, 19-30). Thufim 20:30 ah cun “ziangmaw caan ahcun kan ziaza thlengawknak dingah harnak kan ton a tul caan a um a si” tiin a um fawna si.

Pathian duhlozawngih a nungtupawl khal in sisehla, A duhzawngih nun a tumtu le a nung rerotu pawl khal in sisehla(II Tim.3:12) harnak a phunphun kan tuar theu, harnak lakih vawrtawp thihnak tiang khal kan tawng theu a si. I Pet.3:17- “Thatlonak (thilsia) tuah ruangih harsatnak tuar hnakin  Pathian lungkimnak asiahcun thatnak tuah ruangih harsatnak tuar a tha sawn.”

By, Salai Bawisiamthar Sunthang

PATHIAN RELSETUPAWL IH NETNAK

1. TANCREDONEVES – Brazil President
   “President camping neih lai ah votes 500000 ka hmuh cun Pathian rori khalin President tohkham cun i dir thla thei lo ding” a ti. A rel zat votes cu ahmu taktak, asinan President tohkham ih a to hlanah khawsik in a thi.

2. John Lennon – America Hlasak Thiam
    Chanchin bu mipawl hmaiah “Khrihtian hi a cem in a hlo verver ding. Jesu cu a tha, a thukampawl cu atthlak men a si. Jesu aiin ka larsawn” a ti. 1996 kum ah reiloteah meithla in vawiruk kah a tuar.

3. TITANIC LAWNG TUAHTUPAWL
   Thuthar latupawl in ziangtluk hnget le rinum a si ti an suh tikah, “Pathian khal in a pilter thei lo ding” an ti. A reihlan ah a pil.

4. MARYLYN MONRO – Zuknung Cangthiam
   Show a neih laiah BlyGraham in thlarau in nan hnenah thusim in fial a ti tikah, “ nan Jesu ka tul ve lo a tiah a ti. A hmaizarh ah Apartment ah thi cia ih sar a si.

5. BON SCOT – Hlasak Thiam Hminthang
   A sanlai ah music band larzet AC-DC singer a si. 1979 ah “I kham hlah uh hellram lamzin ah ka suk vivo ding” timi hla mipi hmaiah a sakih reilote ah a luak a hakih a thi.

6. CAMPINAS
   2005 Brazil khaw pakhat ah tlangval zuri in a fanute len a sawmih a nu in a fanu cu mawtaw sungah cun Pathian in lo kil hram she a ti ta. “Pathian cu mawtaw dunglam tilo ah a tlem nawn lo” a ti. Cutin an feh, an mawtaw cu a accident ih an thi thluh, a dunglam thilphurhnak hmunte lawng a siat loih Arti bawm khal a siat lo ( Pathian tonak si awmtak a si).

7. CHRISTINE-HEWIT
    “Bible hi cabu ngan mi lakah a mumallobik a si” a ti. 2006 ah khan zo an si ti hman theihtheih loin an kangral.

By,  Rev. Tha Nei Thio

Hms. Christian Outlook ta lak mi a si.

PATHIAN IN THIL A TISUAL DAH LO!

Siangpahrang pa pakhatin salpa pakhat a neiih, Cui a salpa cun a pupa hnenah,” Ka bawipa, na thinnau hrimhrim hlah. Pathian a tha, Pathian in na parah thil a tisual dah lo sokhaw” tiah tu le tu a ti leuhleuh  theu.

Veikhat cu Siangpahrang in a salpa kha ramtoih a sawmih hramlakpi ah an pahnih cun ram an tawi.Rinloparalah, Sahrang cun siangpahrang bawipa cu a nam lohliih a buan thluk. A salpa cun amai’ nunnak khal uiriai loin , a pupa nun humhim sak ding cun a thazang neih patawp cu suah in a bawm. Asinan Sahrang cun siangpahrang bawipai’ kut cu a keu tan sakih a tlan.

Cuticun a salpate cun a pupa hnenih a tong kelte bangin, “Siangpahrang bawipa, na thanau in na riahsia pang hlah. Pathian a tha, Pathian in ziangtikhmanah thil a tisual dah hrimhrim lo” tiah a pupa mithmai zohphah tecun a vun hnem.

Siangpahrang bawipa cu a thinheng tukih, “Mahhman kutzung pakhat kim nawn lo tilak laiih beidawng lakah, Pathian a tha! Pathian in thil a tisual dah lo”.tiih mi rak ti betbet cu thawnginn sungah va khum uh tiah a kuthnuaipawl hnenah thu a pek.

Ni rei nawn hnuah, siangpahrang cu amah lawng ramtawi dingah a meithal a lakih hramlak lam a pan. Hramlak a va thlengih reihlan teah hramlak milai (Lu-yeing) pawl cun an rak kaiih hridai thawn an tembet. Cutin nung cingin biaktheng parah an retih an khawsia bawibik hnenah thawinak pe dingin  thah an tum zikte zawnah, an vun zohfel sal tikah a kutzung pakhat a rak kim lo kha an hmu suaki hzamrangten an thlah lohli sal.ziangahtilen an khawsia bawibik in taksa ruangrai kim lo cu thawinak ah a duh lo.

Siangpahrang cu zamrang thei patawp in a innzin ah lungawinak thawn a tlan kir vurvo ih,  athawng thlak mi a salpa hnenah cun,”Pathian a tha! Pathian in thil a tisual dah lo na rak ti ringring kha a tuah ka nunin a tep ngah zo. Sahrang in ka kut khatlam I rak keu tan lo bangsehla cu tuini ah ka thi zo ding” tiah a va tiih thawnginn ihsin a salpate cu a suahsal.

Cule siangpahrang bawipacun a salpa hnenah “Thu pakhat lo suh duh ka  nei.Pathian a tha!Pathian in thil a tisual dah lo na ti sikhawh, silo len nangmah teh thawng thlak a lo siang sipei?” tiah a salpa cu a vun sut.A salpa tecun thawng I rak thlak lo bangta awla cu tuiniih na ramtawih ka rak lo thlun dingih, cule nang cu kut zungkim loin na luat ding nan, kei belte cu Luyeingpawl in in that ding sisi! Tiah a sang. Pathian a tha! Pathian in ziangtikhmanah thil a tisual ve dah lo” tiah a vun tisal thotho.

Cubangin duhdawt mi, a tuih hi ca a siar ve rero tu nangmah lala khalah thinnaunak maw, lolen beidongnak maw,tlaksamnak maw cun nangmah lawng tuar harceih ruahawknak na nei men thei. Ziangvek a vasikhal ah, Pathian a tha, Pathian in na hrangah thil a tisual ve dah lo ti hi rak zum awla, cun hnangamten a kutcak thiltitheinak cu rak hngak ve men aw. Amen!!!

   Elihu Hrinte

MIDANG THAWN TAHTHIM AW HLAH

Zozo khal nanmah ih ziaza cio parah thuthen aw ding nan si. Atha a sile midang ih nundan thawn tahthimnak tul rero loin nanmah ten nan lung a hmui ding. (Galati 6:4 )

Nang cu zothaw hman tahthim theih lo dingin danglam hleice zetin Pathian ih lo sersiam mi na si. Mipa ci, million 20 lenglo lakah minung ih hungcang thei umsun na siih leitlun billion 6 lenglo lak khalah zohman thawi bangaw lo dingin danglam hleice zetin Pathian ih lo sersiammi na si. Na kiangkap na innhnen an hlawhtlinnak menin na nun lo ti buai hlah seh. Na innhnen, na rualpi le na kiangkap pawl ih hlawhtlin dan vek ciah ih hlawhtling dingin Pathian in a lo sersiam lo. Nang cu hleice le danglam zetih sersiammi na si bangin hlawhtlinnak danglamzet Pathian in lo pek a duh a si. Midang an hlawhtlin ruangah na nun rak ti buai nawn hlah! Pathian hrangih mi hleice na si kha mang ringring aw. Midang an tluan ruangah vanse cuangih ruatawk ding a silo ih, midang an tlaksiat ruangah vantha cuangih ruah awk ding khal a si lo. Nang cu nang na siih Pathian ih minung, Pathian kilvennak hnuaiih um na si.

Na nupi/pasal, na unau, na nu le pa le na fale khal midang thawn tahthim hlah awla, nangmah khal zothaw hman tahthimaw hlah. Nang cu Pathian in danglam zetih a lo sersiam bangin nulepa, unau, nupi/pasal, fanau khal danglamzet a lo pe a si kha. Khuitawk hmanah tui na nulepa, na nupi/pasal le na unau vek kha zohman in an nei lo. Nang cu tui na nulepa, na unau le na nupi/pasal neitu na si kha na van a tha tuk sokhaw. Leitlun ah a tuih na neihmi bang nei ve tu zohman an um lo.
               Bill Gate in;" Midang thawn na tahthimawk a si ahcun nangmah le nangmah na hmuhsuam aw a si" a ti.

Tui na nunah hlawhtling hrih lo vekih na theihawk hmanah, Pathian in na hrangih tumtahnak tha a neihmi a danglam dah cuang lo ding. Hlawhtlinnak timi cu sumpai tampi neih le len a si lo zia khal theihfiang tum sinsin aw. Siangpahrang Solomon khal milian le mifim maktara a siih lei nawmnak lamah nupi 700 le nusun 300 a nei (1Siang. 11:3) nan hlawhtlinnak le nawmnak a si lo zia, nun hman a paih nawn lo le a huat thu, Thusimtu 2:17 ah a tarlang. Culai ah fimthiamnak, mawinak le lennak neitu putar Simeon cun naute Rundamtu Jesu a hmuh tikah leitlun ih nunman neibik le hlawhtlingbik a si zia theifiang in Pathian a thangthat (Luke 2:28-29) kha hngilh hlah.!
     
Hlawhtlinnak taktak ngahtu na sinak dingah nangmah le nangmah kha zothawn hman tahthim aw hlah la miih nundan khal va cawn tum hlah Pathian in leitlun minung billion 6 lenglo lakah nang cu zo thaw hman bangaw lo, hleice le sunglawi zetih a lo sersiammi na si kha hngilh dah hlah. Pathian in na hrangih tumtah tha a neihmi le na fehnak ding lamzin kha theifiang dingin Pathian sut awla pathian ih a lo kawhnak hmunah feh aw. Cule leitlun ih nunman neibik, lungawi bik le hlawhtlingbik na si ding.
                     D.L Moody in, " Leilung tlun ih ka ral tumbik le in ti buai tu cu D.L Moody hi a si" tiah a mah le amah a ti aw.

By Elihu Hrinte

BIBLE THENDAAN TLANGPI

Kan Bible cu Thuthlung Hlun le Thuthlung Thar tiin hmunhnih i then a si.

A. Thuthlung Hlun ah ( Bu 39 ) a um.

Hmun (4) ah then a si

     1. Dan Cabu - Semtirnak ihsin Danpeksalnak ( Bu 5 )
     2. Thuanthu Cabu - Joshua ihsin Esther ( Bu 12)
     3. Hlabu  - Job ihsin Solomon Hla ( Bu 5 )
     4. Simcianak Cabu(Prophecy) - Isaiah ihsin                     Malachi ( Bu 17 )
                a. Prophets tum - Isaiah ihsin Danial ( Bu 5 )
                 b. Prophets te - Hosia ihsin Malakhi ( Bu 12 )

B. Thuthlung Thar ah ( Bu 27 ) a um.

Hmun (4) ah then a si..

     1. Thuthangtha - Mathai ihsin John ( Bu 4 )
     2. Thuanthu   - Dungthluntu (Apostles) ( Bu 1 )
     3. Cakuat  - Rom ihsin Jude ( Bu 21 )
     4. Simcianak(Prophecy) - Thuphuan ( Bu 1 )

THLARAU THIANGHLIM

II Tim.1:7
“Ziangahtile Pathian in tihnak thlarau in pe lo ih, thiltitheinak thlarau, duhdawtnak thlarau le a fim mi ruahnak lungthin thlarau in pe sawn a si.”

Kan pianthar vete’n Thlarau thianghlim pek kan si. (Eph.1:13;Gal3:12)
Thlarau Thianghlim cu Pathian ih pek mi laksawng a si. (Jn.7:37-39:IICor.1:22)
Thlarau Thianghlim cun zumtu tisa mi khal a cencilh. (Icor,6:19)
Zumlotupawl cun Thlarau Thianghlim an co ve lo. (Rom 8:9;Jude 19)
Thlarau Thianghlim cun zumtupawl a cencilh ringring. (Jn.14:16;IICor.2:22;Eph.1:14)

Pai’ caan a liam zoih Fapa caan khal a liam zo, tuhi Thlarau Thianghlim cangvaih caan cu a si. Pa ih caan ah Thlarau Thianghlim a lang ko, Fapa caan khalah khan a lang ve ko nan, tu Amah Thlarau Thianghlim caanih a cangvaih/hnatuan daan cu a danglam nasa.
Ahlan ah cun : A cencilh lo (I Sam.16:14; Sam.51:11)
A tu ah cun    : In cencilh   (Jn,14:16)
A hlan ah cun: An khat hngalh
A tu ah cun    : Khat dingih pumpekawk a tul (Eph.5:18).

Thlarau Thianghlim cu Trinity- Thumkom Pathian lakih pakhat, Pa Pathian in kumkhaw umpi dingih zumtupawl hnenih a run thlah mi a si. Curuangah in kaihruaitu dingah a hnenih hlanaw le tulutaw ding kan si.  Cui Thlarau Thianghlim thu cu Paul in Timothy hnenah hitin a cakuatah a ngan…


1.Pathian in Tihnak Thlarau in pe loih Thiltitheinak Thlarau in pe sawn a si.
Timothy hi Efesa khua ih rawng a bawlnak ah harsatnak a phunphun a rak tawng. Ziangahtile (1) kum mino a si I Tim.4:12, (2) zirhnak diklo a um I Tim.1:3, (3) a lung tla a leng II Tim 1:4, (4) kawhhran kilkhawinak( kaihhruainak lam) lam khalah harsatnak tampi a ton ruangah a hnatuan cu bansan mei khal a duh deuh thlang. Curuangah Paul in “Pathian in Tihnak Thlarau in pe loih Thiltitheinak Thlarau in pe sawn a si.”tiin thazang a peknak a si.

I Sam. 16-17 kan siar asile Israel Siangpahrang dingah Soul cu hnawn a si thu le David cu hriakthih a si thu kan hmu. Bung 17 ahcun  David le Goliath an doawknak thu kan hmu: israel-pawl tih le thlapangih an umnak san kha an ral Filistin mi Goliath ruangah a si. Soul cun a do ngam lo, a tih tuk. Ziangahtile Pathian thu a lun lo ruangah(I Sam.15) Thlarau Thianghlim in a suahsan zo ruangah a si Asinan Pathian Thlarau cu David hnenih a thlen ruangah(I Sam.16:13) tihnak sihte tiatte hman neilo in Goliath cu a do ih a neh. Pathian Thlarau Thianghlim cu tihnak Thlarau a siloih thiltitheinak Thlarau a si zia a lang nasa..

Eph.4:4 “Thlarau pakhat a um”, a danglam dah lo ih David hnenih a thleng mi le Paul ih a rel mi Thlarau Thianghlim cu tuih in cencilh ringringtu Thlarau thotho hi a si, kan co mi a bangaw thluh. Curuangah thaten ruat thaaw sal hnik uhsi, ziangruangahsaw kan tih a hrut theu? Pathian ropitnak ding hrangah zianghman tihmi nei loin ziangkim ti theitu ding cu A Thlarau Thianghlim cotupawl hi kan si.(Apos.1:8)


2.Duhdawtnak Thlarau
Timothy, Efesa khuaih a hnatuannak ah hin mi khermei le mize mak taktak nei khal an um ko ding.  Kawhhran sungah hin mi hmel tha deuh tla an um kei, hmelsia deuh le thinse zetzet khal an um ko ding. Pastor dinhmun in bangrep tei a zoh thluh thei a tul fawn ding, duhdawtnak taktak thawn  kilkhawi cu a har duh zet tla a si men thei. Asinan Paul in Pathian ih in pek mi cu Duhdawtnak Thlarau a si ti a sim.

Cui Thlarau cun Joseph khal a umpi (Gen.41:38), curuangah amah thiktu, huazettu le salih a zuartu a ulepawl khal kha a duhdawt ih a parih an sualnakpawl khal thungrul loin a ngaidam hai a si. (Gen.45:1--) Joseph cu a ulepawl hnenih an naupa a si thu a phuanawk tikah a mitthli khal a for a si. Joseph umpitu Thlarau hi zumtupawl in cencilhtu Thlarau Thianghlim a si.

Kan parih lungput thalo neitu, thil tisualtu le in huatupawl khal duhdawt theinak Thlarau Thlianghlim neitu na si ve zo maw? Kan kawhhran sung khalah thinlung ruahnak bangaw lo le canaw lo, milaw deuh le mi zee deuh tivek.. hmel khal bangaw lo duhdan khal bangrep thluh lo lungrual tei ke kan kar tlang thei vivonak dingah Duhdawtnak Thlarau a cotu kan si thluh tul a si.

Duhdawtnak thawn lo cun um tlang, kekar tlang le hnatuan tlang a nuam taktak thei lo. Minung duhdawtawknak cun ramri a neiih rei a deih thei theu fawn lo. Curuangah Duhdawtnak thlarau hi minung hin kan mamawh in kan tul nasa.

3. A Fim Mi Ruahnak Lungthin Thlarau
Timothy hi kum lam zawng khalah minote a si vekin kawhhran hruaidan le kilkhawi daan ah a buai thei zet ko ding. Upa zirhdan, mino le nuhmei  tvk(I Tim. 5:1--) rualrem tei zirh le hruai theinak dingah cun thinlung ruahnak fimtak neih khal a tul zet. Curuangah Paul in Timothy ih a co mi thlarau thianghlim cu A fim mi ruahnak lungthin thlarau a si zia a sim fing. Cutiih cui thlarau hmangih mi a kaihhruaiih a somdawl vivo theinak ding ah!
Thlarau Thianghlim cu ziangtivekin Pathian sunlawinak dingah kekar rualten kan kar tlang thei ding? Ziangtin so kawhhran kan dam tlang thei ding tvk.. in simtu le bawmtu Thlarau a si.

Cui’ Thlarau cun Danial a rak umpi (Dan.4:18;5:11). Pathian in Danial tei’ rualvah(4) pawl hi fimnak, thiamnak le theihthiamnak a pek a si(Dan.1:17), curuangah Siangpahrang Nebuchednezer ih thinlung khal an tong a si. Zumtu kannih khal A fim mi ruahnak lungthin Thlarau cotu kan si ve rungah nitin kan nunnakah midang lakih tlanlen dan le minung hmai le Pathian hmai khalih duhsaknak kan co thei dingah nun daan khal in thiam ter a si. Bible kan siar tik khalah cui’ Thlarau cun kan theih feng terih hnangamnak khal in pe theu a si.

A Netnak Ah
Ziangruangahsaw zumtu cui’ Thlarau a cotu si ve si a tlunih kan tarlang mipawl kan nunih a teh thei lo ih kan nunih hmuh theih, siar theih dingih a lang thei lo? = Cui’ Thlarau Thianghlim ih kan khah lo ruangah  a si. Efesa 5:18, “Sabitzu ri hlah uh, ziangahtile cumi cun poisaklonak ah mi a hruai. Cuhnakin Thlarau in khat swn uh.” Kan pianthar veten Thlarau Thianghlim pek kan si zo cio ko nan cui’ Thlarau cun kan nun hi in luahkhat ringring theu lo. Curuangah khat dingih thupek kan si. Thukam hlun(OT) lam ah cun Pathian Thlarau an hnenih a thlen tikah a luahkhat hngalh nan a tlansan sal theu. Thukam Thar (NT) kawhhran caan ah cun in cencilh ringring ko, asinan kan khah cu a tul ve a si. ‘Khat’ timi cu control tinak a si. Zu in pawl cun zu tamdeuh an inn tikah an ri theu cutin anmah le mah control-aw thei non loin an in mi/ an sungih a ummi zu cun a control a si. Cuvek ciah in Thlarau ih kan khat tikah kan minung duhnak si non loin Cui’ Thlarau ih duhnak sawn cu kan lalter(control-awkter) tinak a si. Zuripawl khal in anmai’ duhnak ngeiih zu an in vekin Thlarau khal in kan duhnalo cing cun in luah khat dah zik lo. Khat dingih kan pumpekawk cu a tul(Gal.5:16-17).
Cutiih Thlarau Thianghlim cotupawl in Thlarau ih kan khat tikah cun kan nunnak ah cui’ Thlarau ih mizia, fimnak/ duhdawtnak le thiltitheinak cu kan nun rori ah hmuh theih in a lang ve thei ding a si. Amen!

By, Salai Bawisiamthar sunthang

KA HRANG THATNAK DINGIN

 (1) Ka ruahsan mi ka theihfiangnak dingah

- Beidawnnak thawn lam in hruai.


 (2) Fimnak ka neih theinak dingah

- Ka nun tawizia in theihter.


 (3) Ka pitlin theinak dingah

- Harsatnak in tawnter.

 

(4) Amah lawng ka tihzah thiamtheinak dingah

- Ka taksa parih A thuneihnak in simfiang.


(5) Amah lawng ka rinsan theinak dingah

- Micaklo ka sizia in theihter.


 (6) Amai hrang lawng ka nun ka hlan theinak dingah

- Amah rori ka hrang A hlan aw.


 (7) Amah ka duhdawtbik theinak dingah

- Ama'n in rak duhdawt hmaisa.


(8) Milian ka si theinak dingah

- Mi farah ah A rak tuahaw aw.


 (9) A hrang ka ralthat theinak dingah

- Bawmtu Thlarau Thianghlim in pe.


 (10)Nundan ka thiamtheinak dingah

- Athu(Bible) hmangin in sim/ in zirh theu.


Ka hrang thatnak dingin lam in hruaitu ka Bawi Jesu..

Ka lungawi...

JESU IN LAINATTU (Jesus Our Compassion)

Khristian ralkap pakhat in a ihnak (Bedroom) hmunih a nupi mipakhat thawn an rak um tlan kha a hmu. Cutin anih cun an pahnih cu kap mei loin a cawlhnak hmun ( Sitting room) ah a kirsan men.Cuihnu ah Tv a on ih Khristian hla pawl a ngai. A nupi rak umpi tu pa cu zamrang zetin a thuamhnaw a hruk hnuah sangkaate (Window) in a dawp, cule aw ring zetin, sayapa na nupi ka rak umpi ruangah ka thiam-aw lo tuk ( Sorry) tiin a au suak. Cui Khristian ralkap pa cun zangkhai zetin hitin a hei sawn, “ A rak cang zo mipawl cu feh san mei aw”.tiah ati.

   Zan it caan a kim cuahco zo nan, a nupi cu an ihnak  hmun ihkhun ihsin a rak suak ngam hrih cuang lo. An pa cu Tv a hmit (off) ih an nupi ihkhun ahcun   a feh. Cule zial par to in  a tap rero mi a nupi kha a hmu. Asinan a pasal cun a rak cang zo mi thu pawl tla zianghman suthlam lo ten a ti kel in thla a cam hnu ah a ih san. An nu cu zanlai fang an pa ihthah rero sungah Ngaidamnak cakuat an pai’ hrang a tanta hnu ah a mah le mah cu a rak that-aw. Zinglam ah cun an pa cu a hawng tho ih, a rak thih zo mi a nupi cu a vawn hmu.. Cutin a nupi rak umpi tu pa pakhat (boyfriend) khal zanlai thotho a tikcu caan bangaw ngelcel ah a rak thih (Accident) ti a thei.

Note: Cuvek harsatnak le buainak thawn a khatmi hi leitlun ah nun kan hmang rero ve a si. kan mah bulpak harnak lawng silo in kan kiang le kap hnen khalin timlam cia mi dodalnak le sawiselnak a phunphun in in kulh ih, cui pawl cu kan tuar rero lai ding. Cui harnak pawl cu ziangtin kan neh ding ih kan zalen thei ding ti kan ruah caan a cu zo. Pathian in tikcu remcang ( second chance )in pe, cucu Khrih thawngih kan ngahmi ruahsannak thar a si; Hi doawknak pawl hi Jesu in na aiawh in a rak do thluh zo..

Lettu : Elihu Van Lal Hrin

NA UKNAK THLENG HRAM SEH!

                                                                  

Matthai 6:9-10 – Curuangah hi bangtukin thla nan cam pei: “Vancungih a um mi kan Pa na hmin thianghlim cu upat si ko seh! Na uknak thleng hram seh! Vancungih na duhnak tuah a si bangin leitlun khalah tuah si ve seh”.

Vancung uknak/Pathian uknak tiih Bible ( A hleicein Mathai,mark,Luke le Jonh) sungih a rel mipawl hi a sim duh mi ngaingai (Literal meaning) cu hmailamih a ra thleng leh ding mi kum thawngkhat uknak (Milleniam Kingdom) thu a si. Cun Jew-pawlih an beiseibik mi le Jesu khalih tahthimnak a phunphun thawih a sim tam emem mi a si fawn. Bible thaten kan siar a asile Pathian uknak ti le Vancung uknak timi khal hi bangawk lonak nei (Vancung uknak- Kum 1000, Pathian uknak- thlarau lam uknak) vekin a lang( a si thluh cuanglo men ding nan). Tui’ tumih kan Bible canghril miih a rel duh mi taktak cu hi leiih Kum 1000 sung uknak thu a si ko. Asinan tulai kannih zumtupawl Pathian ih in uknak, thlarau lam thu thawn ka run ngan vivo ding a si.

Kan Beisei Dan Ding

Jews-pawl in Jesu kha leiah lalram ropi zet din dingih an rak thlir laiah an beisei vek siloin Anih cu a  niambiknak hmun rankhengah suakin Joseph le Mery hnenah a thang lian. Kum 30 hrawng a si tikah A Pai’ rawngbawl in Pathian uknak a rung thlen thu tla a rel suak (Mathai 12:28). Cangantu pakhat cun “Pathian uknak le kawhhran hi bangaw ( thuhmunkhat) vek deuh a si nan bangaw ciah silo hi a si. Pathian uknak a rung thlengih cuhnuah Kawhhran a rung ding ve, cutin kawhhran hi Pathian uknak a karh vivo theinak dingih hmanrua/ kut le ke cu a si.” tiin a ngan. Jesu in lei lalram cu a din hrih lo i, thlarau lam lalram, minung thinlung lamah a din sawn a si. Kan minung duhnak le ruahnak thiatbal in a mai thuneihnak  le lalnak kawhhran din a tum sawn a rak si. Curuangah a uknak thleng ding cun Amah Jesu kan zum, kan neih ta a tul a si.

Jews mipawl cun lei lalram an rak beiseiih tui sun ni tiang khalah an beisei lai. Jeim le John in Jesui’ hnenah Lal tohkhamih a to tikah a vorhlam le kehlam ih to ding in tla an dil a si. Asinan Jesu cun a dungthluntupawl hnenah mi thupi zet le mi tumbik si a duhtu cu nan zate ih sal a si ding a si. Mark 10:45 “Milai Fapa hman hi ren mi siloin riantu si dingah le mi tampi tlen dingah a nunnak pe dingin a ra sawn a si,” tiah a ti. Curuangah Jesui’ lalram, A uknak sungih lut ding cun tangdawrnak thawn midang riantu si a tul a si.

Ziangruangah Pathian Uknak Ram Din A Tul?

..  I John 3:8b “Pathian Fapa a langnak cu Setan hnatuannak siatbal theh ding rori ahhin a si”.  Pathian ih a duhdawt zet mi Amah thawi rak lengtlang theu mi minung cu Setan in thenhran in a siatsuah thluh. “Uico cu a bo ruangah siloin uico a si ruangah a bo sawn” tivek deuhin sual fate, sual tuahnak lam cu sim le zirh tul loih thiamcia Setan uknak lalram ih a ceng mi minung kan rak si. Cu mi cu thiatbal in Jesu in a minung/zumtu kan nunnak ah Amai’ Lalnak ram Pathian uknak cu din a duh a si.

Kan Bawipa Jesu in a dungthluntupawl hnenih a thucah netabiknak khalah (Mark 16:15) “ Leilung khuazakip ah va feh uhla mi hmuahhmuah hnenah Thuthang Tha va sim uh” tiah a ti. Curuangah zumtu nang le kei khal in Pathian uknak, lalnak din dingah thuthang tha hi kan ti thei dandan cio in kan aupi ve a tul a si.

A Uknak Ram Sungih Nun Dan

Jesu in hi leitlunah a lalram kum1000 uknak a din tikah cun khawvel ahhin remnak, pumkhatawknak, daihnak, lungawinak, duhdawtnak le hnangamnak in a khat thlang ding a si. Ziangruangahtile leitlun le a sungih thil um hmuahhmuah hi Jesui’ uknak(lalnak) hnuaiah a um thluh thlang ding. Jesu in pumhlumih lalnak a conak hmun rengrengah buainak hi a um thei lo a si.

Cutivek ciah in zumtu kan nunah Jesu in lalnak kan coter tikah iksikawknak, remawklonak le huatawknak a um non lo i, kan nunnak cu hlimnak in a khat theu a si. Zumtu Pathian ramsungih um ( mi piangthar cu si ve )cing khalih midang thawn remaw thei lo, mah cu mi thupi zetih ret aw le midang aiih cungcuang deuh ih ruataw,  midang hmuhsuam le nautat-tupawl cu an nunnak ah Pathian lalnak a pe taktak lo tinak a si. Cubangpawlih nun cu a hahdam thei taktak dah lo a si.

Curuangah Pathian uknak ram cu kanmah bulpak, innsang, kawhhran le khawtlang le rampi par tiangah thleng camcin hram seh, ti hi a va duhum so! Cuvek uknak ram cu kan nunnak ah thleng hram seh tiin thla kan cam khal a tul si. Na uknak thleng hram seh! Kan ti tikah Pathian ih thuneihnak/rorelnak cu thleng seh kan tinak a si.  Bawipa Na uknak cu kan Kawhhran, Innsang le bulpak cio kan nunnak ah thlen ter ve hram aw! Cutin Vancungih na duhnak  tuah a si vekin hi leiih kan Kawhhran khalah tuah a si ve thei ding a si. Amen!

     By, Salai Bawisiamthar Sunthang

TITANIC LAWNGPI LE A THUANTHU TAWI

                                                               

                                                                                          

Titanic lawng sungih mankhungbik khan (room) cu zankhat riahmanah tulai paisa dollar ting khat tluk a siih leitlunih Hotel man khungbik “burjalarab” timihnakin a let thum in a khung.

Titanic Lawng sungih musicianpawl cu culai sanih mipi duhbik mi hla lar 370 lenglo cu zohlo in an ngahthluh. A sungih mikhual zovek khalin ziangvek hla khal sakdingih an dil tikah tluang zuahzoih an sah sak thluh theinak dingah a si.

Titanic ahcun bulpak thuthang “The Atlantic News” timi suah a si. Cumicu lawngtotupawl hrang lawngih suahmi thuthang a siih nitin suah a si.

Titanic ih a palinak luban pi cu a mawinak ding men roriih tuahmi a si.

Titanic lawngpi cu a tum tuk ruangah mawnsuah a si theinak dingih meihawl engine a her suah thei dingah hnatuantu minung 178 hman a si.

Titanic lawngpi cu leitlun thuanthu ah vurtlang pahih pilhlo lawngpi umsun a si.

Vurtlangpi an hmuh ihsin zindang zawhdingah theihternak an pek tikcu hi nazi khuai sung a tlai.

Titanic lawngpi pilthluh dingah nazi 2 le minutes 40 a rei.

Lawngpi a pil netabik tiang meisa mit lo dingih rak kilkhawitu, lawng engineer minung 23 cun an nunnak an liam.

Lawngpi sungih awnmawi tumthiampawl kha cawl loin lawngpi a pil tiang awnmawi an tum.

Titanic Lawngsung ih sinak sang, upapawl tomi himnak lawng cu a tlangpithu in mi 8 lawng to sian a si nan a tlangpi thu in cui’ himnak lawng sungah 150lbs rit minung 20 tlukciar a phur thei.

Titanic lawngpi sungih a totu uico 13 lakah 3 lawng an nung.

Titanic lawngpi sungih rawlsuangtu pakhat cu zu nasa tukih a rak rit ruangah cui zu  (alcohol) ih thisen satternak ruangah vur parah nazi 2 sunglai a um thei ih mibawmtu Lawng a rathlen tiang nungdamin a rak hngak thei.

Titanic lawngpi a siatnak, a pilnak hmun cu thei cing hmanin a hawlsalnakah kum 70 an rei.

Titanic zuknung an cannakih an hmansuahmi sumpai hi Lawngpi an rak tuahnak ih an hman mi sumpai hnakin a tam sawn.

Elihu Hrinte

PATHIAN HRANGAH NA TLING

                                                                                  

"Cahnak i petu Khrih sungin ziangkim ka ti thei" ( Filipi 4:13)

Fimthiamnak na neih lo ruangah simaw, sumpai tampi na neih lo ruangah simaw, upa tuk zo ih na theihawk ruangah maw, fel lo tukih na theihawk ruangah asilole sual tukih na ruahawk ruangah simaw Pathian hrangah ka tling lo tuk na ti caan a tam ko ding.

Taktak ahcun fimthiamnak le sumpai hi Pathian ih tahfung si sehla Jesui' dungthluntu hleihnihpawl tla zohman an tling lo ding. Upat le nauhak tla hi Pathian ih tahfung si sehla Abraham khal a tar tuk zo, Jeremiah le a nauhak tuk. Fel le that, sinak hi rawngbawlnak hrang Pathian ih tahfung sisehla Uire David, mibum hmang Jacob, zuri Noah, tualthat Paul le Moses, thinlung thleng dualdo Elizah, Pathian hnen ihsin tlan Jonah, mi thintawi Peter, hlawhhlang Rahap, Zakiah le a niam tuk betah hlepru, Lazarus le mithi zo, zohman Pathian hmaiah an tling lo. Asinan Pathian cun hman thei lo a nei ve lo thung. Pathian cun mifim, mifel le mitlingpawl a ko lo ih a kawhmipawl kha a fimter, a fel terih a tling ter sawn a si.

Khah! Tuah a tlunih tarlangmipawl hnakin na sual cuang maw, na tha lo cuang maw? A tlunih tarlangmipawl hnak cun na zia tuk sawn ding. Pathian ih a lo hman theilonak ding san a um lo ih na tlinlonak ding san khal a um lo.  Biakinn feh na ngamlonak ding san khal a um lo. Setan cun na sualnak a lo hmuh dingih misual nu, misual pa a lo ti ringring ding. Hmansehla Pathian cun ka fa a lo ti ringring ding. Nang cu Pathian ih kawh mi, hril mi, a fa na siih a thiltitheinak  lo pekmi khal na si. Na thiltitheinak hi nangmah ah siloin Pathian ah a um ti kha hngilh hlah! Na cahnak, na hlawhtlinnak le na tlinnak hi Pathian na sungih a um ruangah a si.

Mina pakhat damnak ngah dingih thlacam sak ding khalah na tling tawk tuk. Nangmai thlacam ruangah za ah za a dam thei lo ti na thei vekin Pathian in kei mai thlacamnak thawngin za ah za a dam ter thei ti kai hnget aw. Khawsia le ramhuai dawisuak ding khalin nangmah thotho hi na tling. Thiltitheinak keimah ah a um lo ti na theiawk rualin ka sungih um Pathian hi khawsia le ramhuaipawl ih tih mi a si ti khal thei aw. Nangmah ah cahnak a um, na sungih um Pathian thawn ziangkim na ti thei. Na sungih um Jesu kha leitlun rak nehtu a si kha! Jesu in ka lo umpi ding inti mi hi in umpi satliah men a siloih cahnak huham, hlawhtlinnak le thiltitheinak ka lo pe dingih nan harsat canah ka lo bawm ding a tinak a si. Zianghman tihhlah! Hlawhtlinnak le thiltitheinak nangmah ah a um. Ni le thla dinter theitu Pathian kha na sungah a um.

Hi leitlun harsat beidawnnak ramah hnangam tei' kan um theinak cu Thlarau Thianghlim kan sungih a um ruangah a siih thil kan titheinak, kan dam, kan cahnak le kan hlawhtlinnak hi Pathian kan sungih a um ruangah a si. Amen!

  Elihu Hrinte