Minung kan dam sung, sankhat ah voikhat hi kanmah le kan sinak, kan phu tawk cio in vanthatnak ropi tak kan parah a ra thleng theu ti a si. Cuvek kan parih a ra thlen caanah kan lungawinak cu a nasa in kan thinlung khal a nuam in a hahdam tengteng ding. Cuvek cu na rak tong dah zo maw? Tong dah hrih lo saw? Ton na cak maw? Zo khal ih kan ton duh le kan cak emem mi a si ko ding.
Thaten vun ruat cio sehla vanthatnak fa tetepawl tla cu nitin kan nun ah nazi, minute, second tin ahhin kan rak ton rero caan hi tampi a um. Ziangvek caanah saw kan rak ton theu ti asilen Thudik kan tongsuah caan, mi hmuh ih zohnuam leh tha zetih kan nun caan, midang in an thinnaunak le an thinharnak in ruah caanih kan theitawk le thiamtawih kan rak hnem, thazang kan rak pek caanah simaw, thil dangdang a tha ti kan theih mi thil fa tete kan tuah caan ahhin a si. Ziangahtile cuvek kan tuah thei caanih rak tuah ve thei lo tamtak siarcawk lo an um ruangah a si. Mi pakhat a vanthat ni a ra thlen tikah cun a lung a awi, a ai a puang, a tha a tho ih hlimnak in a khat theu.I Sam. 15:22 ah cun, “raithawinak hnakin amah ih thu thlun ah Bawipa cu a lung a awi sawn a si” ti kan hmu thei. Bawipai lungawi zawng kan tuah cun a tuahtu kanmah khal kan lung a awi lo thei lo. A thu thlun cu ziangvek a si ti kan theihtheinak dingah Bible in pe a si. A tawizawngih kan sim asile mi vanthapawl cu an lung a awi, mi lungawipawl cu mi vantha an si. Zumtupawl ih kan lungawi theinak bik cu a thu kan thlun ahhin a si.Nitin kan nun ih mi vantha/lungawi kan si theinak dingah Pathian thu thianghlim Bible siar le Amah biak thlacam hi thlahthlam siang hram hlah uh si.
No comments:
Post a Comment