JESUI’ THAWHSALNAK NI SUNGLAWI

(Resurrection Day Vs Easter Sunday)

Salai Bawisiamthar Sunthang

Zarh khatih ni hmaisabik cu Sunday asiih, cui ni cu kan Bawipa Jesu thihnak nehih a thawhsal ni a si. Zumtu hmaisapawl in(Bible san lai ihsin) Sunday (thawhsal ni) ahhin Pathian bia in an rak tawng khawm aw theu. Cumi cu tuisun ni tiang caan neta ih a um mi kawhhran kannihpawl khal in kan run hmang peh vivo mi a si.

Bawi Jesu ih thawhsalnak hi Christian thurin thumawknak bul hrampi a si. Jesu kha thihnak in rak thosal lo bangta sehla cu amah a zumtupawl hin lei damsung hrang lawngih ruahsannak nei in, zangfakza ngaingai kan si ding. Asinan Jesu cun tangdawr zetin Pai’ thu thlun ih cross thihnak tiang a tuar hnuah, thihnak neh in, a thosal ih misual rundamnak felfai ten in tuahsak thluh zo. “curuangah a sangbik hmunah Pathian in a cawisangih, hmin hmuahhmuah lakih hmin cungnungbik a pe” (Phi.2:9). Jesui’ hnenah cun thuneihnak hmuhhmuah hlan asiih, vanih Pai’ vorhlam laltohkham ah a hung to a si. Vanih a hung kaiso tikah khan tuihlan ih a umcianak kel ah a hung um sal timen si nawn loin, Pathian fapa kha leiah a rung piang ih, vanih a kaiso cun Minung Fapa a si. Tuih Pathian vorhlam ih totu Jesu khi Pathian-Minung a si. Minung a sinak le Pathian a sinak mizia cu pumkhat aw in lal tokham parah a hawng to a si. Cumi cu vanih dinhmun thleng thar mi a si; minung mizia nei cu vanah a um ve thlang ta. Jesu cu minung sinak 100/100  le Pathian sinak 100/100  nei mi a si kumkhua, cumi cu zumtui hrangah a sunglawi in a ropi tuk a si. Pa Pathian khal in a sunlawih ih, kannih a tlen mipawl khal in Amah sunlawih le thangthat bang mei ding kan si lo lawlaw.

Ziangruangahsaw Jesui’ thawhsal ni sunglawi hi ‘thosal’ ti loin, ‘easter Sunday’ tiah kan kawh ciamco theu? A tawinakbik in kan rel asile ‘easter’ timi cu Babylon-pawl ih rak biak mi khuavang nu ih hmin  kha mirang(English) pawl ih kawh dan a si. German-pawl le Scandinavian-pawl cun Eastre, Ostre asilole Ostara tiin aw suak dangdang in an ko. Greek-pawl in Astarte tiin an ko ih, Hebrew tong cun Asherah (lole) Ashtoreth ti aw suak in an ko. Bible (Thukam Hlun) sungah voi tampi hmuh ding a um. Khuavang betupawl in Baal pathian ih nupi tiin an rak zum.  AD 323 kumah Rome Siangpahrang Constantine in a rampumpi in Christian ramah a can terih Jesu zum tengteng tul loin, cozahpi ih thupek vekin mipi zaten Christian ah an cang. Curuangah an khuavang biaknakpuaipawl cu Christian biaknak ah an la lut vivo. Bawipa Jesui’ thawhsalni le an khuavang nui’ puai tikcu kha a bangawk ngelcel ruangah hmun khatah an hmang kop. Cui’ puai hminah cun an pathian nui’ hmin cawi in, “easter” tiin an hmang vivo.

Kannih Pathian thutak theitu le zumtupawl cun Bawipa Jesu ih thawhsal ni sunglawi hi ‘easter Sunday’ ti loin ‘thawhsalnak ni’ (resurrection day) tiin ko thei vivo cio sehla a tha zet ding.