JESUI’ HMIN IH THLACAM

By; CerboihPa

Zumtu nunih thupi zet mi cu thlacamnak hi a si. Thlacamnak tello zumtu nun cu huham nei lo, nun ro le car ih umnak a si. Kan Bible khal in thla cam ringring dingin in forh ih in fial a si. Curuangah khuihmun khuiram kan thlen le khuitawkih kan um khalah thlacam hi kan daithlan lo a tul.

Thla kan cam tikah Jesui’ hmin in kan dil a tul maw?

1.      Bible cang hrekkhatah Jesui’ hminih thlacam ding in tarlan a si:

a.      Kolosa 3:17 – kan Pathian cu Khrih sungin nan thangthat ruangah, ziang hmuahhmuah nan tuah ah siseh, nan sim ah siseh, Bawipa Jesu hmin in tuah uhla sim uh.

b.      John 16:23 – cuih ni a thlen tikah cun zianghman in sut nawn lo ding. Thungai in ka lo sim; ka hmin in nan dil mi hmuahhmuah cu ka pa in a lo pe ding.

c.      Efesa 2:18 – Khrih ruangah Judah mi siseh, Zentail mi siseh, kan zate in Thlarau pakhat thawngin Pa kan nei thei.

d.      Rom 1:8 – leitlun pumpi ah nan zumnak thu a than ruangah nan zapi hrangah Jesu Khrih thawngin ka lungawi thu Pathian hnenah ka sim hmaisa a si.

2.      Jesu cu Pathian le minung karlak ih palai(I Tim.2:5), Sihni(I John 2:1), le Puithiam sang (Heb.4:14-15) a si. Curuangah zumtupawl cu “Khrih thawn kan pehzawmawknak ruangah le Amah kan zumnak thawngin Pathian umnak hmunah raltha zet le ngam zetin luh theinak kan nei” (Eph.3:12), “cuti asi ruangah Pathian Bawi tohkham cu raltha zetin pan uhsi, cutawkah ngilneihnak kan co dingih kan tul tik caan ah zangfahnak kan ngah ding a si” (Heb.4:16).

Thlacam timi cu Pathian thawn pawlkomawk/pehtlaihawknak neih a si. Pa Pathian cu Jesu Khrih ruang lawnglawng in pehzom theinak kan nei. Curuangah Bible ih in sim vekin ziangkim kan tuah ah siseh, thla kan cam tikah siseh, Pathian sunlawinak dingah Jesui’ hmin ih tuah in, Jesui’ hmin in thla cam zel uhsi.