April,2018

Editorial🖋

    Kan duh ruang le kan dil ruangah siloin kan parih thil ra thleng mi tampi a um. Kan phut ruang le cotlak kan si ruang khalah sicuangloin, Pathian in a fapa neihsun liolio in pe. Culawng a si hrih lo, kan nitin taksa nunnak hrangih kan tul mi thil tha khal tampi pek kan si. Kan parah thatnak  le lungawinak lam a thlen theu vekin minung ih kan duhlo mi, tha kan ti lo mi khal tampi a ra thleng ve thotho fawn.

    Ziangkim tlunih thuneitu, laireltu cu kan biak Cung Pathian lawng hi a si. Kan parih thil ra thleng mi hmuahhmuah hi amai duhdan, remruahnak le tha tidan hlir in an si thluh. Kan ton mi (co mi) a zate hin Amai hnen ihsin an si thluh ruangah san nei le umze nei thluh an si. Kan ni hrangah cun rak cohlan le hman thiam ding lawng hi a thupibik mi a si.

     Kan duhlo mi le tul kan ti lemlo mi kan parih a ra thlen caan khalah phunzai mei loin kan thatnak ding hrangih Pathian remruat a si tiih, kan Amen thei vivo ding hi a tul nasa. Ziangahtile kan Pathian cun kan hrang tha lo ding mi zianghman a tuah dah lo. Curuangah kan ton mi thil ziangkim hi Amah sunlawihnak le amah thangthatnak dingah hmangthiam vivo cio uhsi.