PATHIAN THANGTHAT (Khawmawk)

By; April H Boih

Math 27:58-61, 28:5-6 sungih kan hmuh vekin Adam ih cithlah sualnak ruangih kumkhaw hrwmhmun feh ding kan rak si laiah kan Bawipa Jesu cu vansunlawinak tanta in a tlawm(niam) bikmi ran rawl peknak kuang sungah rung piangin hmuhsuam, nautat, ningzak, hremnak, thihnak tiang tuarin in rundam a rak sikha.. cui in rundamnak cu kan rak zum/cohlan veten mi piangthar (zumtu) kan si.

Zumtu hin tuanvo tumpi kan nei a si. Zumtu hin kan Pathian thangthat hi kan ti ding hrimhrim le kan tuanvo/mawhphurh a si. Pathian thangthat(khawm) kan peihlo theu hi zumtu ih kan ti dingmi ah a mawilo zetmi a si.Ziangahtile kan Pathian hi thangthat tlak asiih amah kan thangthat ding khal hi a duh zetmi a si fawn.Cule Pathian thangthat/kan khawm tikah ziangti vekin kan thangthat ding timi cu thupi (2) hmangin zohtlannak kan nei ding.

Pathian thangthat/khawm tikah...
(1)Amah theifiang in
Theifiang timi hi thil thupi zetmi a si. Ziangahtile mipakhat hi kan zum ngam theinak dingahcun ziangvek mi a si tikha kan theihfiang hmaisa a tul. Cuvekin kan biak mi/thangthat mi Bawipa hi kan theihfiang hi a tul zet mi a si. Amah kan theihfiang ngaingai cun thangthat lole khawm peihlo in kan um thei hrimhrim lo ding hi a rak si. Bawipa' thatzia hi kan tep ngah hnu ahcun thangthat lo le khawm lo ih ummen hi a rak theih nawnlo ih khawm tla hi a nuam in a manhla ih, kan Pathian in sunlawinak a rak co a si. Curuangah Pathian theifiang dingin tu hnakin khawmawk, thlacam, Bible siar pawl tla hi tuah vivo zuam cio uhsi!.

Pathian thangthat/khawm tikah..
(2)Minung ah thumaw loin
A tlangpithu in minung zozo khal kan uarzet mi asilole kan ngaisang mi in hla a sak, thu a sim tikah a sak mi hla le a sim mi thu cu ngai nuam kan ti thei zet theu. Asinan kan uar lem lomi, ka huat zetmi nu/pa ih thu a sim mi cu ka ngai peihlo theu. Hi thil hi hrial a harzet mi le kan minung sinak ih a kentel mi cu a rak si theu. Cuvekin Pathian kan thangthat, kan khawm tik khalah minung kan si vekin mi ngaihlo mi cu kan rak nei theu, cutikah Pathian thangthatnak hla an sak tikah simaw, thu an sim tikah a sakmi/simmi thu kha ngai nawnlo in amah kan ngaihlonak ruangah kan khawm inti nuamlo theu asi. Minung ih thumawk hi a poi zet mi asi. Voikhat cu Pathian ih mi hman ropi zet Pastor pakhat a rak um, a thusim mi khal ngai an duh zet, amah khal an uarzet ih an ngaisan mi a rak si. Nikhat cu cui Pastor cu a nunnak a liam ta riai, cutikah a fapa in a dinhmun a run sawng ih Pathian thu a sim ve. Nidang vekin cui Pastor thusim ngai dingah minung tamzet a ra khawm, sermon-tu an vun kawh leveten an ngaisang zetmi pa siloin a fapa a hung ding tikah mipipawl cu a lengah suah thluh an tum, cutikah cui tlanvalpa cun “tuisun ah ka pa be dingih a ra tu pawl tlung uhla Pathian be dingih a ratupawl lawng tang uh” tiah a tawng ta. Zumtupawl hi minung ah kan rak thumawk tuk theu ruangah si khawmawk le Pathian thanthat hi nuam kan ti ngaingai thei theu lo, minung ah thumaw nawn loin Pathian hi thangthat zuam cio uhsi!. Zovek te khalin Bawipa a thangthat tikah amah ih thiamlonak le tlinlonak pawl kha zoh sak nawnlo in a thangthat mi Bawipa sawnah thumaw thlang uhsi!.
''Heb 10:25 ah hrekkhat tidan vekin kan khawmawknak hi bansan ding kan si lo''.

KAWHHRAN IH SINAK LE KAWH DAN

By; Marvin Thawng

Kawhhran timi hi sullam nei lo le umze nei loih din mi le san nei loih din mi a si lo. Ziangahtile a dintu hi lei le van sersiamtu Pathian ih din mi a si. leilung tlun minung zumtu mi zokhal in umnak kawhhran kan nei thluh cio, khuitawk kawhhran kan um asikhalle kan umnak kawhhran hi thupi lo tuk le ngainepih um ding kan si lo. A san cu kawhhran hi sinak le kawh dan a phunphun a um ih, cu mi cu kan theih tlang asile kawhhran duhdawt a tul zia le a thupit zia kan thei ngah ding a si.

1.Mi thianghlimpawl tonkhawmawknak ( Sam.89:7)

2. Khrih ruangpum ( Efe. 1:22-23; Kol.1:24)

3. Mi sempi tonkhawmnak ( Sam.111:1)

4. Khrih ih mo ( Thup.21:9)

5. Pathian kawhhran (Apos.20:28

6. Pathian nungih kawhhran (I Tim.3:15)

7. Pathian fatirpawl umkhawmnak (Heb.12:23)

8. Pathian ih khawpi ( Heb.12:22)

9. Amah riantupawl tonkhawmawknak ( Sam.149:1)

10. Lei le van ih um insungsang ( Eph.3:15)

11. Pathian tuu umkhawm ( Ezk.34:15; I Pet.5:2)

12. Khrih ih turual  ( Jn.10:16)

13. Sui meivannak tung ( Thup.1:20)

14. Pathian ih inn ( I Kor. 3:9)

15. Pathian ih lo ram ( I Kor. 3:9)

16. Pathian thlarau umnak ( Eph.2:22)

17. Pathian ih innsungsang ( I Tim.3:15; Heb.10:21)

18. Khih ih innsang ( Heb.3:6; Eph.2:19)

19. Tu fano nupi ( Thup. 19:7; 21:9)

20. Pathian biakinn ( I Kor.3:16-17)

21. A nung Pathian biakinn ( II Kor. 6:16)

22. Sabit hmuan ( Jer.12:10; Matt.21:41)

KHUIAH NA UM?

(Genesis 3:9)

                                       By; Chief Editor

BAWIPA Pathian in a mawi zet mi hmuan Eden ah a tuah, cutawkah cun Bible sungih minung hmaisabik Adam le Eve a um ter. Annih cu kham mi daan pakhat pek an si, “asinan a tha le a sia theihthiamnak thingkkungih rah cu na ei hrimhrim lo pei, na ei asile na ei ni in na thi ding”(Gen.2:17).

Satan cu ra in Pathian thu kha la kawi tahratin Eve cu a bum ngah. Evi cun Pathian dan a pahbal ih ei sian lo mi theirah cu ei in, a sual ta riai. Cuihnuah a pasal Adam cu a pe ih anih khal cun a ei ve, cutin misual ah an cang. Theirah an ei hnu cun taklawngih um an sinak an theiaw ih, anmahte an huhphenawknak hrangah an rak buai zet. Cule hmuan sungih Bawipa a rat kha an theiih, an sualnak le an ningzahnak ruangah Pathian hnen ihsin thupaw in relhhlo an tum. “Cutikah Bawipa Pathian in mipa cu a ko ih khuiah so na um? tiah a ti” (Gen.3:9). Hi thusuhnak hi Bible sungah Pathian in thu a suhnak (recorded) hmaisabik a si. An sualnak ruangih ningzah ih an um hlanih Amah thawn lengtlang le pawlkomaw theu kha, tuah cun khuiahso na um tiin a sut thlang a si. Pathian cu anmah sersiamtu, ziangkim theitu le hmu thluhtu Jehovah a si (Sam 139:1-10).  Ziangtlukin zuam rero khal hai sehla Pathian hmai ihsin an tlanhlo in an relh(thupaw)  suak ngaingai thei dah lo ding. Asinan ziangruangahsaw “Khuiah so na um?” tiin a suh? Pathian cun an umnak a theihlo ruangih sut siloin, anmah Evi le Adam lamih a suh hrim mi sawn a si. Khuitawkah an umih ziangruangah an relh timi kha an theihawknak dingah anmah lamih a suh mi a si. Minung hmaisabik Adam le Evi cu Pathian thawn an pawlkomawknak(pehzomawknak) ihsin an sualnak ruangah ningzak le relhhlo san in an thenaw a si.

Hi thusuhnak “Khuiah so na um?” timi hi tui ni tiang khalih thusuhnak thupi zet mi a si. A theih lo ruangah siloin, tui ni ah Pathian in “Khuiah so na um?” tiin nang le kei hnen khalah in sut ve theu a si.

Zumtu kan nun ah, Pathian hnen ihsin tlanhlo tum in, voi tampi cu relhhlo san kan tum theu, asinan A hmai ah cun langlo mi zianghman a rak um lo. Zumtupawl pawlkomawknak hmun Biakinn ihsin tlanhlo tumtu na si pang maw? Pathian hnatuannak ah tello dingin relhhlo na tum pang maw? Na sualnak ruangah relh hlohsan in, hupphenawknak na ngaihtuah pang maw? Cuvek caan ah, “Khuiah saw na um” tiin Pathian in a lo sut ve a si. Kan nun dan zohfiang aw sal uh si!

AMAH PAKHAT LAWNG ZOH AW!

By; CerboihPa

Tumkhat cu, Sunday ni ah tlangval pakhat cun an pastor hnenah, mithmai nuam vaklo cing hin “pastor-pa, kei cu voikhat hman ka khawm dah nawn lo ding” tiin a ti lok mei.

Pastor-pa cun “ziangruangah saw” tiin a rak sut ve lohli.

Cui tlangvalpa cun, “khawmnak ah mobile phone keng le tham a tam thei emei, hrekkhat le thlacam lai tivekih suah hnuaihni an hmang fawn. Nu lam le pacang lam vun zoh sehla sermon laiah an rak itthat (sing) men, a thupte ih beaw (tong) le hmuh ding an tam thei si. Biakinn ih khawmawk ringring khal hi umzia a nei khal in ka thei nawn lo, ka tlung sal mei ke,” tiah a ti.

Pastor-pa : asile na tlun hlan ah zangfahten thil pakhatte in tuahsak ta awla, cuihnu ah na tlung leh ding hokhaw.

Tlangval-pa : ziangveklam saw hun rel phot awla..

Pastor-pa : khi tawkih no (khuat) pakhat ahkhin tidai  khat ter awla, cumi cu bung riai lo tei’ keng phahin Biakinn hi voithum na hel kual ding.

Cutiih voithum rori a helkual hnu ah cun,

 Pastor-pa : na feh laiah beaw thuppawl le itthat(sing) tivek na hmu hai maw?

Tlangval-pa : ai, ka hmu lo.

Pastor-pa : asile mobile phone thampawl le khawmlaiih suah hmang teh na hmu maw?

Tlangval-pa : hmu lamlam hlah e, ka No (Khuat) sungih tidai bung lo dingin ka fehnak zin lawng zohih ka feh ruangah ka hmu lo.. tiin a sawn.

Pastor-pa : Tlangval-pa cu mi ciah cu a si, kan nun lamtluan ahhin khui hmun khalah um hman sehla kan zoh ringring ding mi cu pakhat lawng a um. Cu mi cu Bawi Jesu lawng a si! Amah lawng kan zoh asiahcun midangpawl ih sualnak le tlinlonak pawl hmuh theih a si nawn lo.. tiin a sim fiang.

Note: Jesu lawng a zoh thiamtupawl cu kiang le kap ih thil thleng mi in an nun a tibuai ban ve nawn lo.

PATHIAN IN A HMIN SUNLAWINAK HRANGIH A HMAN DUH MI MEMBER

By; Elihu Hrinte

Bible: Dungthluntu 9:36-43

Soul ih thlengawknak(1-9), Soul thlengawk ih Khrih thuthangtha phuansuahnak(10-22), Soul Damascus ih hrem a sinak le Jerusalem a fehnak(23-31), Aenies camsiatnak(32-35), Dorkas nun thawhtersalnak(36-43).

Dorkas cu nun ah a timlam-aw (cang 36)

            Joppa khua hi tulai hmin cangkang cun Jaffa tikhal a si. Joppa hmin sullam cu “Hmel mawi, hmel tha” (Beauty) tinak a si. Khawpi hlun zet pakhat asiih tulaiih Haifa an ti mi Palestin ram thlanglam long cawlhnak hmunpi asi. Jerusalem nitlak nak thlanglam peng (30)hlaah a um (2San.2:16; Ezra 3:7). Hi Joppa khua ihsin si khan Jonah khal Tarsis (Japho) khaw lam panin long a rak to (Jonah 1:3).

           Dorkas ti hmin hi Greek tong asiih, Aramaic cun Tabitha ti asi. A pahnih ih a hmin sullam cu “Sakhi” tinak a si. Hi nunau-nu cun midang hrangah a nun cu thil tha tuah le bawmnak thilpek a tuan ringring(cang 36). A thiltha tinak le a mi lainat thiamnak ruangah a hmin a thang zet. Anih hi a tlunih kan sim zomi Joppa khua ah a umih dungthluntu pakhat a rak si.

Thil tha tuahih Pathian thu a zir duhtu member (Cang36b)

Kan tualsung kawhhran ah thil tha tuahih Pathian thuzir duhtu member kan tul. Dorkas cu Pathian  rundamtu le a Bawi ih a congah hnu nun cu midang hrang thatnak nun le Pathian thu zir duhnak nun thawn ke rak kar rerotu-nu a si.  Kannih Pathian rundamnak a co ve zotupawl khal in kan zumtupi hrangah siseh, kiang le kap hrangah khal siseh thil tha tuahih Pathian thu zir duhtu  kan si a tul.

       Thil tha tuah ning lo dingah Pathian thu Bible in, in sim (Gal.6:9-10). Ahleicein kan zumtupipawl hnenah tuah ding in fial. Pathian thu zir duhnak neitu nun thawn kan zumtupipawl hrangah, cui kan zirmi tuahsuaknak ih langtertu Pathian hman duhmi member kan si ding hi thazang kan pe aw a si.

Hmin lang lo pawl khalin Pathian hna an tuan (Cang38b)

(Dungthluntu le Pahnih timi hmin a lang lo)

Cang37 nak ah, Pathian thu a zirih thil tha tuah rerotu Dorkas cu a na ih a nunnak a liam  tikah dungthluntu le a dang pahnihpawl khal in an ti thei tawk, an unaunu hrangah Peter kawhnak rawngbawl hna cu a rak tuan asi. Ziangruangahtilen Lidda khua cu Joppa khua thawn a naiawk tikah Lidda ah Peter a um ti an thei ih,zamrang zetin an titheimi Dorkas damnak dingah an tuan. Hitawkah Dungthluntu le pahnih timi hmin a lang lo. Zumtu Pathian fate kan nunah kawhhran sungah siseh, cangvaihnak pakhatkhat khalah siseh, na hmin a rak lang lo asikhallen kan tithei dan ih zirin Pathian hna ( Rawngbawl hna) cu teimak suahin tuan uh si. Pa, Nu, Mino le pawlkom pakhatkhat committee member sung hnatuan tu ah na hmin rak um lo khal sehla, thanau lo le thlahthlam lo ten Bawipai’ hman duhmi kawhhran member kan si ding sawn hi Pathian ih duhmi a si. Pathian in kan bulpak cio ih pumpekawknak hi a duh.

Peter in Dorkas a thawhter ( Cang 40)

Tlunta pindanih an retmi Dorkas hnen Peter a thlen tikah, nuhmeipawl cu a hnenah an rai h an tap ciamco. Cule an hnenih Dorkas a um lai ih a rak tuahmi kawrpawl le a dang hnipuan pawl tla an hmuh. Peter cun a suahter thluh hnu ah a khuk a bil ih thla a cam. A ruang lam a hawi ih, “Tabitha, tho aw” tiah a ti. Tabitha ti cu Dorkas tinak si. Thlacam lawng silo in kan sim a tul. Peter cun thla a cam hnu ah, tho aw tiah a ti.

     Khristian nun ih a pawimawh zetmi cu thlacamnak hi asi. Kan Bible khalin cat bang lo ih thlacam ding in zirh( 1Thess.5:17). Cui thlacamnak ih a pawimawh zetmi cu a takih cangneih hi asi.Pathian thu le cangveihnak hi a feh tlang tengteng atul. Zumtu vawi hnih khat biakkhawm can ih na thlacam mi ah duh tawk mei aw hlah, a takih nunpi le kekar a cu thlang lo sawm! Thlacamnak lawng a tawk nawn lo sokhaw, Pathian in kan nun hi a duh. Na sumpai, thilri le na hlawnthil kha Pathian in a beisei lo. A diktak ah cun kan nun hi si a rak beisei ringring. Pathian ah kekar thuk vivo awla, na theihfeng lomi thupawl tla A lo simfiang vivo ding.

Cang 41 nak ih Mithianghlimpawl timi hi cang 38 nak ih Dungthluntupawl kha an si. Dorkas a nung sal zo ti an theih cun Joppa khua ih um mipawl in Bawipa cu an thangthatih, Peter cu Simon inn ah ni tampi a cam. Pathian in a hmin sunlawinak hrangih a hman duhmi memberpawl cu: Dorkas bang thil tha tuahnak ih A thu zirtu, hmin tarlang lo khal ih, tithei tawk in Pathian hnatuan tu le a takih Pathian hrangih kekartu pawl an si.

         Kohhran sung ih umtu member hi, mi piangtharpawl umkhawm ti tluk a si. Cumi ah ruahnak lungthin hmunkhat si in Thlarau pakhatah hnget zetih tuantlang kha a si (Filipi 1:27) siar bet aw. Cuti asilen, Pathian riantu tualsung member (Zumtu) pawl, tuah Pathian in a hmin sunlawinak hrangih a hman duhmi pawl tla kan thei zo bangin. Thlahdah lo leh daitlang lo ten Pathian thu ih hna thong ringringtu si thei dingah, Pathian in a duhnak lamzin ah lo hruai hram seh. Amen.