BAWIPAI' HNEN LAWNGAH

By, Kawhhran Duhdawtu

Maw ka nunnak, ziangahso na kūn? Ziangahso ka sungah na būai? Pathian ruahsan aw, ziangahtile amah ka thangṭhatsal ding a si, Amai hmel ih um băwmnak ruangah.

SAM 42:5

Bible cang kan tarlan mi khi David ih ngan mi siin zum a si.

Kan Bible-ah hin Pathian mi pawl ih thuhla tampi kan hmu ih, hmansehla David vek ih Pathian naih tumtu hi an tam tuk lo a bang. Anih cu thil a tisual pang khalah, Bawipai hmai ah ka sual a si ti a thei aw ih, sual rimnak thawn ngaidam dil in a khuk a bil lohli theu,  lungawinak caan a ton tikah Bawipai hnen ihsin a si ti a theiih, lungawi thu a sim theu.

A nun a cau ih, nun beidonnak a ton caan ah Bawipai hnen ihsin thazang cahnak thar nei thei sal dingin a khuk a bil theu a si. Israel siangpahrang dangpawl le leitlun ih siangpahrang dangpawl cu, thinharnak an ton caan ah amahten leitlun ih zu leh sa, nupa sual nomnak tivek ah lungawinak an hawl theu. Cuvek thil ah cun reilote cu hlim le lawmnak an hmu ve tla si men thei nan, Bawipai hnenih hlimnak leh lawmnak thawn a in bang lo ruangah, nun har le beidong takin an nun an hmang liam leh sal theu thotho.

Kannih khal, kan nun a cauh i, beidonnak a ra thlen caan ah, khawvel mawinak, falat tlangval nomnak ah le , rittheih thilri ih hlimnak hawl mai lovin. Bawipai hnen ah kunin, hlimnak le lawmnak, cahnak le thiltitheinak pawl cu hawl sawn uh si.

Kan nun a beidon tinten Bawipai hmai ah kun uhsila, "Maw ka nunnak, ziangahso na kūn? Ziangahso ka sungah na būai? Pathian ruahsan aw, ziangahtile amah ka thangthatsal ding a si, Amai hmel ih um băwmnak ruangah."(Sam 42:5 ) ti ve uhsi.

KA KHUALTLAWNNAK LAMTLUAN Part-5

(Company Ruai Ropi)

Kan hnatuannak Company ahhin zing, sun le zan rori in hnatuan asiih, sunday zan hi cu kan cawl ve theu. Cun, thlakhat ah ni hnih sung cawlh a um theu ih, anmah tuluk mi hrekkhat cu mai' inn lam cio ah an tlung theu. Lam nai deuh ihsi ra tuanpawl cu a lang in an ra theu nan a tamsawn cu kanmah ramdang mi vekin company building sungah an um thluh ve ko.

 Thla cem lam lole thla thok lam ahhin rawl ei puaipi (ruai ropi) a um theu ih cui caan ah cun rawlhmeh a phunphun ngasa, voksa le cawsa, cuitlun ah pe, mi-pe le thil dangdang ei ding a tam nasa. Cule beer hi a lakin an zem curco si ko. Voihnih khat ah cun zu ngaingai tla hi an zem ih a duhduh hrangah rak dawk khutkho a theih. Rawl ei khawh meuh cun hrekkhat cu an ti caci theu. An hrangah cun beer le zu cu tihang kan hawp tluk fang hrawng khi a bang. 

Asinan Danial lepawl in siangpahrang ih zu thatha le sa thawthaw kha an rak hrial tlat mai ih, Pathian tihzah in an serhhran awknak kha zohthim an va tlak tak em.. tuisun ni tiang khal ih ka thazang le ka theih ringring mi ah an cang, ka thinlung sungah an thuanthu kha a cam.

Curuangah midang cun tuahko hai hmanseh, an hrangah cun thil tha lo a si lemlo men ding nan, kei ka hrangah cun thil tha a si lo, ka ti ve ding a si nawn lo ti hi ka fiang zet. Kiang le kap ah sawmtu le caan remcang zetzet tam zet hmansehla kei cun ka ti thei nawn thlawt lo.

Unau kannih cu khuihmun khalah Pathian fate kan si. Kan thlennak hmun tinkim ah Pathian in in hmu, in umpi, in cencilh camcin. A sunlawilonak ding thil le kanmai hrang khal ih tha lo mi: thil bawrhhlawh lak ihsin kan thiarfihlim awk a tul a si. (Thil ṭhalo vekih lang mi hmuahhmuah hrial uh.

1 THESSALONIKA 5:22)



Ramdang ih a fehtu siseh, nulepa ulenau, kawhhran pi le venglehnen ih hmun ban lo ih a umtu zozokhal, zuu siseh thil tha lo a phunphun tuah dingah caan remcang zet a um theu ko ding. Ahleice in kan nolai, kan parmawi lai caan ahhin kan ralrin a tul tuk cuang. Kan vanglai ni, kan caan tha hi leitlun nomnak men ah hmang loin semsuahtu Pathian hrangah hmang cio uhsi.

By; Salai Bawisiamthar Sunthang 

China, Jianxi, Ji'an (August, 2019)

#Peh_Leh_Ding

KA KHUALTLAWNNAK LAMTLUAN Part-4

(Company Le CCTV)

Company kan thlen ni cu ziang tuan lo'n kan cawl hahdam huahhi. A thai zing cu office ah kan lut thluh ta ih, tuluk hmin thar in phuah cio, Manager-pa in "nan hnatuannak hmun ah hotu an um thluh ih an thu nan ngai a tul, nan thiam lo mi an lo sim an lo zirh ding, taima zetin tuan uh" tiin thu in cah. 

Cutin kan hnatuannak ding in then cio ih room dangdang ah leader pawl in in hruai fingfing. A nikhatnak cu kan zoh, kan vun ti ve sin, ti hrawngin caan kan hmang liam phot. Zanlam kan banzawngah Card in pe fingfingih cutin a thaizing March, 24,2019  ihsin card hminsin in hnatuan ngai hram kan thok.

Kan umnak, Jianshi Polyhistor Industry Company hi  Electronics lam thilri, sarket a phunphun tuahnak hmunpi asiih, a sungih hnatuantu hi cutluk in minung kan tam lo. Rawl khawpkham ei ding a um, rawl hmeh a se lo, boruak khal a nuam tawk ko, room a nuam ih a thiangfai fawn. Wifi hi room leng lam ah a ngah, hna khal cutiih har ciamco a silo.

Kei ka hnatuannak hmun hi sarket pheng zianghman suai hrih lo mi (blank) kha khawl in a zuk zuai hmaisakbiknak hmun a si. Kan tuahzo mipawl kha room (4) lai ah an run ceibawl bet.  Culam cu duhtawk mai sela... Kawl nu le tuluk nu kei le kan hotupa tiin kan room ahhin minung pali kan um...

CCTV
Kan hnatuannak room ahhin CCTV a rak um lo nan, kan tuan thok ihsi kar hnih hnu hrawngah room tin ah an run bun curco. Lamzin le hmun dangdang khal ah an bun bet vivo. Kan room ih leader bik hi a thin se ve non, thil a sinpi lo leh hna a feh tluan vaklo caan ah ring pipi ih au le sarket na pipi ih thlak in dimdawih lo a hmang zet. A mithmuh ah thil ti sual pang a phan um thei nasa.  Curuangah a kiang (hnen) ih hnatuan hi a nuam ka ti lem lo, khawl thawmvang a ring deuh tuk ti lo ah cun hna har tuk cu a si lo lawlaw, amah te ih thinheng a hman le a cangvaih dan in thin a ti nuam in a ti hahdam lo em silom. Anmah(managers) in remcang lo an ti ih hnatuannak room in thawn tla asilo ah cun mah thuthu le duhnak hmun ih hna tuan thleng(thawnawk) a ngah fawn lo, in ret nak hmun ah lungawite ih tuan  a tul si ko. Curuangah ka bei a dawng thup zet theu.

Cangtupa😁

Asinan CCTV an bun hnu ihsi cun thil pawl an danglam cupco. Kan hotupa a cangvaih dan a thleng aw, kei khal le hnatuan ka phur phah deuh.. Aww..  CCTV hi a va rak thupi em..

Hitin.. ka vun ruat cih, aww hi ka hnatuannak room ih kan cangvaih dan hmuahhmuah CCTV ih a lang thluh vekin, khuitawk hmun ah um in ziang dinhmun khal va thleng sehla in hmu ringringtu ziangkim tithei, rinsantlak Pathian ka nei a si, a va hnangam thlak ve! tiin..

Zumtu, Nitin kan nun, kan tlanlen dan le kan tuah mi hmuahhmuah hi CCTV hnakih fiang sawn le famkim ih in hmu, in theitu Pathian a um. Thil tha lo kan tuahah siseh, thil tha kan tuah mi khal siseh a hmaika ah a lang lo mi zianghman a um lo. Sam.139)..

By; Salai Bawisiamthar Sunthang

Jianxi, China (July, 2019)

Peh_Leh_Ding..

KA KHUALTLAWNNAK LAMTLUAN Part-3

(Tuluk Ramsung, Lamzin tluan)

Kan beu sungnak hmun ih karhnih le nihnih kan umnakah, hnatuan ding mal tete a um phahphah, a ni hlawh ding zawng siloin rei deuh tuan ding sisehla cu fu sah ding tla a um ko ding nan, in hruaitu ding mawtaw hi a ra thleng zikte thlang ti a sisi, kan laklawh kan phang deuh, curuangah ni hnih khat tete ih tuan ding hawl kha a rak tulnak a si. Kan driver-pa khal in kan lowban-nu a be ve theu nan umzia a um thei cuang lo, ziangahtile lamzin a veng lo tukih kaih a phan um a si bik kei cu. Tuizan cu rak ready thlang uh an ra lo hruai thlang ding inti cun, khuiha kan tiih kan tim kan tuah vutvo, sinan hruaitu mawtaw cu thlen ti um lo. Thai zan ah a ra thlang ding, tipzan ah tiin in bum rero sibik hin kan thei thlang. Online in innlam khal ca kan kuat cio, kan feh suak ngah zik thlang hokhaw tiin.. Beiseinak in tuahsak ve mi cu beidonnak ah a cang, kan hlimnak a siatbal sal cingcing. Curuangah kan lowban nu hin in hruai duh ngaingai lo a rak si hi, nangmah in hmundang ah lowban in hawlsak awla, hiti cun kan feh suak thei dah zik si lo tiin kan driver-pa cu ka beidon thu ka ruah. Asinan anih in le "a lo bum lo pi, a lo hruai duh ringring si, lamzin thuhla a buai tuk ruangah si" tiah in let ve fawn.. huiha, zum ding le ding lo khal a har.

Cutin zing khat cu kan driver-pa in "sumpai an nei non si lo mizan an umnak khal an pe kim thluh thei lo, curuangah hitawk ah ka enkawl thei nawn hai lo, sumpai rak kuat hai aw, culole ra hruai zangzang uh," tiin a wechat ah voice in a kuat. A run reply ve lohli ih "tuizan ah hruai an si thlang ding, kaih le kaih lo cu anmai vansiat vanthat si thlang seh, an paisa daih lo zat cu ziangzat saw" tiin a run sut ih, zali a run kuat cih. Cuti cun sumpai tla a run kuat thlang cun kan hna ngam deuh rori.

Hitawk innte ih kan umnak hmunih um ve kawltlangval pali lakih pakhat Shan-pa cu kan fehnak ding hmun a bangaw. Anih tong a thiam nal zet, company ih tonglettu rak tuan ringring theu a si. Zaan khat cu innleng ihsin thawngvang ngainuam lo ti ruihro kan thei, sangka an run ong thutthi ih hmai thi biambiam le lip ttiattia hin an run in hnuk lut. Kan driver pa cun cui Shan-pa cu ka lo that lawlaw ding mawsile a tiih leirawhcan thawn vun den a tum.. sinan kan inntekpa le kawl, nu thau nu in an kham ciamco, kan nih cu cangvaih in awih lo, thin hahdam lo, nuam ti lo zet in zial ah cun kan to khelkhi hai. Anih hi a hngal tukih cunah si midang cu nan tha, thinphang hlah uh tiah in ti nan kanthin cu a nuam cuang lo😁😁..

Nikhat leh cu nan umnak hi miin an lo hmu tam tuk thlang si, nan him sawn nak dingah hmun dangah ka lo thawn ding intiih, zan khawthim zawngah kan thawmhnaw le ziangkim in ka kengaw suak thluh. Cutin hmun fianrial deuhah kan hung um, inn thar uluk lo non ih sak mi ti a theihtheih nasa, a hahdam lo khop mai. Himi ah cun kawl mipapawl an um ve non lo, ramri a luhsuah a theih veten an kir thluh zo.  Hitawk hmun fianrial deuh ah cun zan hnih lawng kan riak, cuisi cun nunau pathum khal beidong in an kir sal ve. Amah kel ah in hruai kir sal, kanmai phuaih lawng kan tang thlang. Umnak kan vung thawl nuam thlang nasa.

Zuk: kan hung in thawnnak hmun.

Zaan khat cu kan driver pa in " nan timtuah uhlaw mawtaw a ra thleng zo, khawpi ah ka hei lo thlah ding" intiih, kan pawh hlanah thlacamnak te cu kan zate aiawh in ka vun hmang ta.  Cutin a zanzan in mawtaw kan to vivo, hmun dangih rak beu ve pawl thawn mawtaw pathum kan to khat thluh ih, cutin thlunaw in kan feh. Lamzin cu tlanglak hlir a si vekin khu le kham, zin suk le so hlir a si. Zinglam khawvan hlan deuh hrawngah nunau ih mawn mi mawtaw (malte a tum ve deuh)pakhat ah kan zate cun kan ben lut aw top. Driver Nunau nu hi mawtaw mawn a thiam tuk lo ti a theihtheih danzia cu a caan le hmunso ah mawtaw khawl a thi thutthi, a caancaan le a ding cutci, zun vek a thawh caan ah zo hman thawh ve in awih lo lailai. A ben in kan ben aw fawn si, a hahdam lemlo nasa. Cutin zinglam nazi 11 hrawng ah hmun pakhat (laitlangih hotel vek) ah kan cawl, kan cawlhnak ding hmun tla kha kan feh lan vel😁😁 phone an be aw ih, mawtaw kirsal ding in ziinpi le a tum tuk lo thawn mawtaw a heraw thei lo, kham ah kan back liam zik leuleu, kan to mi mawtaw in zinpi a kham laklawh fawn ruangah mawtaw dang an feh thei silo, in hngak cuahco tingaihnak thei loin kan mawtaw cu in ra mawnsak tivek hnuaihni thawn kan lamzin tluan hi a awl lo zet.

Zuk:Kan khawmi pali ka ton mi

Zuk: Laitlang hotel si ko

Zuk: A dai ve non

Cawlhbuk ah cun kan khaw mi mi pali lai an rak um ve. Zinglam cu mami kan ei, sunvu kan cawl, khawdai lakah puansin in kan it a caan le maisa kan ai. Zanriah kan ei hnu ah kan pok suak lala. Khaw pakhat kan thlen cun driver mipa pakhat in kan mawtaw cu a mawng ih a tihzia sutsi. Zinglam  khawvan hlante ah mawtaw dangah kan to lala. Cui mawtaw te cun hmun pakhat (hotel) ah kan cawl duak ih mami kan ei lala. Sunhnu deuh ah innteknu in hmanhmawh nawn in " ra uh nan to ding mi bus a ra thleng zo," intiih, kan thilri pawl thawn a tlan in kan tlan so ciamco. Cutin Bus sungah zanvar kan itthat huahhi, an lanzin faizia, kauh non zia le tlang an virh mi pawl ropit hlom zia cu mak lawlaw, tuluk lamzin tluan cu a rak turu paam si. Khua a dai nasa khop mai, mawtaw lengah cun zun thawh duak tilo cu um rei a ol lo zet.

Zinglam khawvang rual hrawngah kan hnatuannak ding hmun tiang in hruaitu ding mawtaw te pahnih in ra hmuak ih, a ving in kan ving si ko. Gate pakhat ah in dinter cutci, kan hmel in zoh, phone a bia, an tong zianghman kan thei silo, in kai thlang a si lo sawm tiin mangbang anhai zetin kan um cuahco. Cuitlunah kan tuluk tongthiam neihsun pa in "in kai thlang si ko ding" tiih a tong mi cun khawruah a ti tam zet. Kan upa kha thlacamnak neisal ta awla in ti ruangah, Bawipa hi tiang hman in hruai thleng zo ih, kan tumram tiang khal tluangten in hruai thleng hram aw, tu ah ziangsaw kan dinhmun hi, in kai mawsi ti khal kan thei lo. Na kutsungah kan um, kaih awknak lak ihsin in humhim hram aw tiin..  aw thia nawn te cun mawtaw sungah thlacamnak ka vun nei.

In kai a si pang cun Tuluk thawnginn kan thleng ding, thlahnih hrawng kan tan hnu ah kawlram ah in kuat, paisa kan neih lo ruangah inn lam kan bia ih paisa in kuat uh tivek kha kan thinlung in a ruat lo thei lo. Asinan minung to thei zat hnakih tam kan rak to ruangah siin, mawtaw dang pakhat a ra sal ih cunah hrekkhat an thawnawk ter hnuah kan feh thei sal.  Cutin Bawipa ka lungawi, nang cu a cakbik mi Pathian na si, in hngilh dah lo ih in ngaihsak ringringtu khal na si.. tiin thinlung ten lungawi thu ka sim non rero. Himi ni cu March 22.2019 a siih, zing 11 hrawng ah Jiangxi kan hnatuannak ding hmun (Jianshi Polyhistor Industry Company) cu damten kan thleng ngah ta riai.

Zuk: Company kan thlen vetei ka zukawk mi

Company compound sung kan lut, mawtaw ihsin kan tum, kan thilri kan suah, kan hun hawi kualvel cuh, inntlun lamih kawlram mi hnatuan rak um pawl cun in run thlir nasa..

By; Salai Bawisiamthar Sunthang

(Jianxi, China)

Peh leh ding

KA KHUALTLAWNNAK LAMTLUAN Part-2

(Tuluk ramih Beunak)
Tuluk ram, Mountin khua ih kan beunak innte sungih khumbeh awk ringring khal a nin um duh thlang nasa. Cuihleiah mi ngaihtuah zet vek an bang nan, umnak man sumpai pek ding neih lo cun an lung awi hmel hmuh ding a har fawn. Cutin rinsan ding kan neihsun Pathian hnenah zantin thlacamnak kan nei theu. Sumpai cu puk ding kan hawl ih kuat awk dan khal kan tawlrel ngah thei. Sinan kan sumpai ngah mi in rei a daih thei lo, a cem cingcing.

Zuk: kan beunak innte
 Cuvekih thinhar le mangbang zetih kan umnak hmun khal ah cun Pathian in a kutcak le in ngaihsaknak cu kan parah a run langter. Kan driver pa hin in ngainaa ih kom in rak duh zet, an inn ah tla rawl ei in sawm. Driver a si vekin a fehnak( passengers a phurhnak) hmun ah tla voihnih khat in hruai theu. Anmah hi dawr kai ansiih, Beer do in tum theu nan ka in lo thu ka sim ruangah theiti in ding in pe theu. Cutin hitawk nan umnak pek ding le nan nei nawn fawn lo, hna tuan ding ka lo hawlsak mai ding mawsi in ti ih, keikhal in 'si e, a um um kan tuan ding' tiah ka sawn ve. Ka thinlungten thu phunphun ka ruat, aww Bawipa ka lungawi tuk, zianghman si lo mi kei hitiih ngaihsaktu in pek hi a va mak ve tiin ka mitthli a for. 

Zuk: Driverpa phone be lai
Hna tuan ding mi, mi pahnih hrang a um, a caan le pathum tiin kan tuan sawng aw phahphah theu. Nikhat cu nan zatei tuan ding hna a um, tiin in sim ih.. zingpit ah kan tho inntekpa in pahnihpahnih in a bike thawn in thlah, Mawtaw tumpi ahhin thirsia kan ttin😁😁😁.. rawl ei caan ti lo cu cawlh a um mumallo, hmun so deuh ih hun thiarso a tul bawk siih ni le saa nawn cuh, ol lo zetsi. Zaan khawthim rual hrawngah kan theh thei, driver-pa mawtaw thawn a ra ih cau hnephnep in kan beunak inn ah in phur tlung. Minung pakhat ah zakhat cio kan hlawh ngah ih tihzia deuh. Sinan zakhat khal cun rei in daih thei cuang lo, ni thum hrawng cun a cem lala si ko. 

Zuk: thirsia mawtaw ih tiin lai
 Zaan khat cu kan leng ke, ra aw! Zanriah tla dawrah kan unau in kan ei tlang ding tiah in ra sawm ih, keikhal cun hleuhhli tiah kan rak thlun ve leh mai. Lamzin ah ka thuhla le ka kum zatpawl in sut ih thaten ka sim thluh. Ee, kei ai na nauhak deuh si cu ka uu tin in ko aw tiah in ti, curuangah tutiang kan biakawk caan ah ka uu tiin ka ko theu. Na hmel ah rinumnak ka hmu, hmailam ah nangmah thawn hna kan tuan tlang leh thei ka beisei khop mai, kawlram ah tla kum hnih thum lai ka um dah, nannih chin mi hi nan fel, ka duhzawng nan si, tivek leh a thuhlapawl tla tampi in ruah phah rero. 
 Zaanriah kan einak ding dawrah cun a makpa le rualpi pawl an rak um ruangah an kiangah kan va to ve. Beer le zu, saa thawthaw le ei ding a phunphun an hun aw tam khop mai. Cucu ei theih tapauh in ka thua ve nasa, beer inter in tum le kan driver pa cun thaten anih cu a in lo tiah in sim sak cingcing. An tong tam si, an aw le  ring fawn ninum duh nasa, ka thin khal a nuam lo thup reuh khop mai. Ka rualpa cun Siipuazi thuhla kan rel hokhaw, nangnahte na duhduh kha rak ei rero men awla tiin in sim.  Cutin rawl khawh in a rualpipawl ih mawtaw ah kan to cih ih KTV ah kan feh ta ding tiah in sim.

Khawpi sung a si ve ruangah mi tla an tam reuh nasa. KTV cu kan va thleng ih, gate kiltu le sangka kiltu pawl cu kan hmai ah an lu an rak kun, an kut in fehnak ding in sim. Cutin inntlun ah kan kai so vivo ih room pakhat ah kan lut. Tleirawl mipahnih an rak um ih an manager pa a ra thlen in thu an rel hnu ah, mi pahnih cu an suak sal. Beer a phapha le ei ding thil tete an run keng lut ciamco, cutin Karaoke sak phah in an nuam aw si bik ko.

 Fala nonal taktak, mi panga hi an ra lut ve ih cupawl cun beer an ra in pi, hla an sak tlang. A ku, beer tauh ba.. tiin an kawltong thiam sun cun in lem rero nan, nga ma tauh buu... tiah ka sawn hai.. tu le tu zu le beer cu an cheer aw ih an in rero.. a caan le ding in an lam. Ka um hmun ih ka to menmen kha in hmu thei lo deuh si ding, ka ban in ra dir tho thul, a caan le zu in ra cheer thul. 

Hmmm.. buaithlak emai ka tiih, ka hmai cabuai parih an hun mi cu, ka no khat in ka thlet aw ve ih in ra cheer le cui ka no sungih tidai ka thlet mi cu ka rak cheer ve hai ih cutin tu le tu tidai ka in rero ve. Khaizan kha cu tidai puar in ka puar hi si ringawt mai. Zaan khua a sim non thlang, an rii deuhdeuh, an beer le a phapha in an rak keng lut cingcing, tlun ka duh vio nan, mahte tlun mai theih ci si lo (kan umnak ihsin khawpi sung hi a hla ve nawn cuh). Cui sapbei ah kan driver pa in le "khavek fala in beer in aw an lo ti cun rak in ve thlang men aw.. na rit pang khal le zianghman phang hlah, hotel ah ka lo riahter mai ding. Tuizan cu kan nuam ding, hivek caan hi kan hmang khát zet hokhaw," in ti. Cucun ka thin a nuam lo deuhdeuh.. 

Thinlungten thla ka cam rero, "Bawipa hi dinhmun ihsin i luat ter hram aw, ka tuar thei lo ding tiang hniksaknak/thlemnak ka par ah thlen ter hram hlah, in bawm hram aw" tiin tu le tu Bawipa ka ko. Loh theih loin in iñ ter lole in tulh kha ka phang thlang si bik. Asinan ka ding lohli ih, ka hun lam pi ve hai, mangbang le hni phah in kan zaten kan lam dialdo😁😁😁.. driver pa in a mit i sin dupdo phah, a lungkim nasa ti cu a mithnai in a lang. Cutin caan a herliam ve vivo mai, inn hnuailam ah kan vung tum thluh ih hrekkhat an tlung.. kannih nigh club room ah kan lut bet lala. Zinglam nazi 2:00 kim cuahco, thawmvang ring leh thinnomlo, ihhmu thawn, inn lam ih rualpipawl in ziangtlukin saw in rak ngaihtuak ke aww ti ruat phah thawn ol cu ol lo ve si. 


Sumpai cemliam mi hmuahhmuah kha a rualpi pawl in pe loin amah an pek ter thluh ruangah, lungawi loin a buai nasa. Tlun khal a duh nawn lo, kan suak lawk nan anih a lut kirsal cingcing security in an kham phahphah cutin rei nawn kan buai, Ka thin cu phu dupdo si ko. Lamzin ah a makpain in thlun, ke in kan feh, kir a tum cingcing, Kan hruai aw hnohno vivo. Kawltong in ka bia, kan kiangih um mi hi police motor a si hi tong hrih hlah tiin dimten i run sim. Huiha a va han thawven thlak lo thei em. A tawptawp ahcun amakpa ih rualpa cu mawtaw thawn a ra thleng. Cui mawtaw ah cun kan lut ih amai' mawtaw cu zinkap ah cun kan tanta. Kan beunak khawte kan thleng, an inn khal ah lut duh mai loin an inn hmai ih dawr fate ah in luh pi bet hrih lai, sa kio mi a lei kan ei rerolai ah a nu in le a ra ko hnuaihni lala. Anih le rii tuk, Na rualpipawl kha va ko thluh awla hinah thil kan ei hai ding in ti, hleuhhli dah ka tiih, ka pok cih vurvo, ka thil ton mi thil tha lo le thlaphaan um lakih ta in humhim sal ruangah Pathian hnen ah lungawi thu ka sim ih cutin hahdam ten ka it.

Curuangah dingih a ruatawtu cu fimkhur seh, culoasile a tlu pang ding. Mi zo cio par khalih a thleng mi siarlo nan parah sualfawrhnak a thleng lo. Asinan Pathian cu a rinum a si. Anih cun nan tuar thei lo ding mi sualfawrhnak nan hnenih thlenter a siang lo ding. Cuih sualfawrhnak nan tuar theinak dingah tlansuahnak lamzin a lo tuahsak ding.1 KORINTH 10:12-13

By; Salai Bawisiamthar Sunthang, 
Jianxi, China
Peh leh ding..

KA KHUALTLAWNNAK LAMTLUAN Part-1

(Tuluk ram lam pan in)

Ka khualtlawnnak Lamzin tluanah tihphannak/ harsatnak le thlemnak a phunphun ka tong, asinan Pathian in himdam ten in hruai vivo.

  Date 26.2.2019 zingah Tuluk lam pan dingin ka poksuak (mi pathum kan si), kan fehpi ding Mizoram lam mi minung (10) pawl thawn Kalay ih  kan tonawk hnu in zanlam ah kalay-mandalay motor cu zanvar kan to, a nuam lemlo khop mai, Mawtaw ka rii ciamco silom mawle(ka luak nasa😁), a thaizing khawvang rual hrawngah Mandalay kan thleng.

Mandalay cawlhbukih sunvu kan cawlh huahhi hnu ah zanlam thim zawngah Muse (Shan State) lam pan in zanvar mawtaw kan to lala, ka rii lem nawn loih tihzia deuh, cutin zing khawvang rualah Muse cu tluangten kan thleng thei. Ruah a sur nasa khawp mai ih boruak a nuam lemlo nasa. Muse ihsin Tuluk ram lut tum kan si nan, boruak a that tuk lo ruangah lut thei mai loin Muse hotel ropi lemlo ah zanthum riakin kan hngak cuahco. Zantin zuri le thawmvang celcel, buai hnawk ruairi lakih um cu a nuam lemlo khop mai. Ka thinlung ten "Bawipa, in thlahthlam hram hlah, ka hmailam ah ziangvek boruak tha lo khal tong hmanningla na hnenih ka lo hlan cia zo vekin in hruai vivo hram aw tiin...

Sunday asiih  ChinShewhaw lam ihsin a luh theih ding ti thu a um ruangah, cu lam cu kan pan lala, zing khawvang hlan in mawtaw fate ah minung (13) cu a ben in kan ben aw hi si ringawt mai (awl lo zet si), kan fehpipawl hi mizoram mi an si ruangah Hmatpungtin le nei hlah hai, lamziin gate ah thin a nuam duh lo zet.  Chinshewhaw cu sun padir hrawngah kan thleng thei. Cutawk hotel tawp deuh mai ah cun kan cawl huahhi ih zanriah kan khawh hnu ah zan 8:30pm hrawngah china ram ah cun minung(8) cu a thupten kan lut.

Tuluk mi pakhat hin in hruai ih mi pali a hmaisa deuh ah kan feh, ziinpi kan kân hnu ah nunau pakhat hin a kut in rak zãp ih culam ah cun kan va tlan phei.. cutin ziin hnuai thingkung tampi umnak khawthim lak ah cun cang lo (dai thepthi) ten, kan dungih ra pawl kan rak hngak. Khatlam ziinpi ah cun a feh kual zukzo rero mi police motor si awm tak khi kan hei hmu. Tih le thlaphang zet cing cun hmanhmawh zet in nunau le mipa ziin in hruaitu cu kan thlun ih mi inn dungah in relhter, lamzin ah police motor le minung au thawm khemkhem ngai nuam tuk lemlo in an tong celcel mi cun thin a ti phang in khawruah a ti tam zet.  Cutawk khawthim lakah nazi 1:30 sung hrawng cangkhai lotei kan um lai ah mawtaw mit eng cun in run tlet ngah zik leuleu theu. Thin a khur, tu le tu thinlung ten thla kan cam, nazi pakhat le khuai sung cu a rei duh khop mai, kan thisen khal a kang zik leuleu in ka thei, dan loih lut kan si ruangah, kaih kan si pangah cun tum lo lam ih thlen a tul zik si. Sinan Pathian in, in humhim ih  in phurtu ding motor cu kan relhnak inn fate hmai ah a ra ding cutci, thawmvang dang a reh deuh hnu ah nunau nu a ra ih a kut in rak zap ciamco ruangah zamrang zetin kan va pan, cutin Tuluk Driver pa cun a mawtaw sungah in thunlut toptop ih kharhkhum kan si hnu ah cak tawkin mawtaw cu a mawng cih vurvo hngal. Kan pariat lakah China tong thiam zohman kan um siloih kan va buai awm ve aw tiih ka ruah rero lai ah kan driver pa cun  Kawltong a rak thiam ziar hi siin, lamzin tha deuh kan thlen cun mawtaw a cawl ih a hmai lam ah mi pali in toter. Cutin kan be aw vivo phah thei ih a tihzia nasa, lamzin ah kaih a phan um vio ke maw tiin ka sut ih anih in "kan hmai lam ah mi pakhat bike thawn lamzin zoh tu a tlan silom, tihphan ding a um lo, boruak a that lo cun in sim lohli ding" tiin in sawn. Nazi 1:30 sung hrawng motor kan to hnu ah khawte pakhat ih inn fate ah kan thleng. "Hitawk tiang hi kei ka tuanvo a si, hi hmun ihsi cu mawtaw dang nan to leh ding", tiah in sim.

Zan hnih kan riah hnu ah kan fehpi minung (5)pawl khal buai emem lee paisa nei nonlo in zan ruahsur lakah bek le ciar thliauthliau in an ra thleng ve thei ( kan zaten minung hleithum kan si ih, mi pariat kha kan lut hmaisa, panga pawl neta ah an ra lut tinak a si).

Zuk: hitin kan it khelkhi theu

Hitawk hmun ahhin Mon miphun nunau pathum le kawl mipa tleirawl mi pali khal an ra thleng ve. (Kan zate cun mi 20 kan um khawm tinak a si. Khawleng suahvak in siang lo ih, zunram thiarawk le bualawk duh caan ah cun mi pahnih pahnih ten nan thlun aw ding (an ekinn cu rura tak a si😁), inn sungah hin um ringring uhla sangka hi khar ringring ding a si, tiin kan driver pa cun thu in cah. Nikhat hrang mipakhat (rawl ei man le riah man) ah yuan30 (ks. 6500 hrawng) asiih sumpai a cem zutzo si ko. Inntekpa hi amah lawng um mi val senior ve nawn,( kan driverpa ih lamzin zoh sak theutu) asiih, amah in rawl in suansak theu.

Zuk: Inntek pa thawn

 In hruaitu dg mawtaw hi ziangtik ah a ra thleng ding ti a rel theih lo. Kan umnak khua hotel ih umpawl khal police in an kai nasa tuk. Lamzin ah mawtaw ih feh lai pawl khal an kai cupco ti thu kan thei. Kan umnak hmun ihsin Fehsuak dingin tih thei kan nei lo, kirsal ding khal in lamzin a um fawnlo, ramri kha luh le suah a ngah hrih nawnlo ih, um bet ding in le sumpai kan nei nawn fawn lo, Pathian kutcak hngakin kan um cuahco a si bik thlang.

"Sumpai pek ding nan neih lo cun hi innte ah a lakin um a ngah lo, nan rawl le rawl hmeh ei ding ah nitin bazar a tul, sumpai a um lo cun tingaihnak a um lo" ti mi tongkam cun thin a ti nuam lo duh khop maiih, kan hei hmuhban mai ih um thlai ciin nak lam ih thlam tete kan thlir, kan cuan rero phah, khui lam ah saw feh sehla tha ke aww tiin thu kan rawn aw rero. Kan thlen zan ih kan driver pai' thu in cah mi "kawltong in miin an ra lo biak pang asile hinah hrawngih fu sat ding vekin rel aw uh" a ti kha hngilh lo in fu sahnak hmun khal kan kiang nai ah a um ko dingih culam khal cu thlen thei dandan a um ko ding. Tiin thu phunphun kan ruat rero.
 

By; Salai Bawisiamthar Sunthang

(Jianxi, China) June, 2019

PEH LEH DING...

SANGSIN AH ZUANGSO AW

 By, Salai Bawisiamthar Sunthang

"Tlangpawl lam khi ka mit in ka hei thlir ding, Khui lamin so keimah băwmnak a rat ding? Keimah băwmnak cu lei le van tuahtu, Jehovah hnen ihsin a ra."(Sam 121:1-2)

Pilot (Vanzam Mawngtu) huaisen tak mai, vanram mawn thiam emem hi, an ramih mi pawimawh bik phur dingih fial a rak si. Zumtu mi felfai tha tuk a si ruangah, Vanzan a mawnsuah hlanah cun, a co-pilot (a hnatuan pi) thawn thlacamnak an nei tlang ta. Mi thupi emem phur ding a si ruangah a zam ve deuh si ding, "Cahnak i petu Khrih thawngin thil ziangkim ka tuah thei"(FILIPI 4:13), timi kha dim teten a sal non rero.
Tui tumih an zam ni hi, a fuh emem, nikhua khal a tha, vanzam khal tha takih check-up a si ih tlunah thil le ri an phur tam lo. Cu lo khalah, A mawngtupa hi ni khawsia lak khalih buai dah lemlo mi a si. Mero sah pipi le thlipi karlak khalih himdam tei vanzam ih a phurh mipawl a tum pi thei theunak cu ziangkim hrangih a timlamawk that emem theunak hi a si tiin an rel theu.

Vanzam cu, tlun lamah a zam so thawk thlang, van sang tak mai Pi thawng sawmthum an hung thlenhnuah cun, passenger pawl khal an seat belt (taikhap)an phelh ih, zalen takin an um. Air hostess pawl khal in ei ding a zem curco, pilot hnenih ei ding an hun pek theh ciah cun, cockpit (vanzam controlnak hmun thupibik) bawr velah cun thil awn kerhko thawmvang an thei thok thlang. Thaten an hna an vun thawng ciang cu, Highlander Rat (tlang sangih um ci zinghnam) thawmvang siin an thei, tlangsangih um theu zinghnam a si ruangah, Pi Thawng sawmthum ih sang khalah a thi maimai hrih lo a si an zum. Pi thawng sawmthum cu (Mount Everest) leitlun ih tlangsangbik ai hmanin a sang sawn zo, boruak (thli) khal a mal thlang vio ding nan, zinghnam ih mamawh tul tawk boruak a um lai si awm tak si, cui zinghnam cu a nung thei lai tlat mai. Lei lamah cun um sehla, zinghnam ve menmen a si, tihnak ding zianghman a um lo, asinan cockpit-ah a um ih wire pakhat te a keu cat pang simaw, a si dan ding vek siloih a danglam ter pang vaih ahcun Vanzam a cangsual ter thei ruangah pilot huaisen(ral tha) emem pa khal cu a ti zam(thlaphang) emem thlang a si.

Zinghnam cu ummen lon a vak kual rero leh hngal ih, pilot le co-pilot cu an thlan tifim a luang thluahthlo si bik mai. Cockpit sung cu khawl pawimawh ih khat a si ruangah, vun tawh thai kual ci a rak si fawn silo, cutiih mangbang emem ih an um lai ah cun, pilot cun tih dan a vun ruat suak, passenger pawl cu an tonak ih to ding in le an seat belt (taikhap) khapaw dingin a sim hai. Vanzam cu a sang thei bikih zam so ter a tum a si.
Pi thawng sawmthum hrawngih harhdam emem mi cockpit zinghnam cu Pi thawng sawmthum le thawng riat (38000) sangih a zam so pi hnu cun, a cangvaih thawm a dim sutsi thlang, hmansehla a reh taktak hrih lo ruangah pilot cun air hostess pawl cu an zaten to thluh dingin a fial hai. Cu hnuah Pi Thawng sawmnga hrawngih sangah cun a hung zamso bet ta riai mai, cui si cun zinghnam thawmvang cu a dai khepkhep thei thlang, cutin an tumtahnak hmun ah cun himdam ten an tum thei sal.

Hi Zinghnam vek ciah hin, kan thinharnak hi hmun sang, Bawipai hnenah cun a nung in a cangvai thei lo hokhaw. Na thin a bang asiahcun, Bawipa naih sin dingin a sannak hmun ah zam(zuang) so hrih hnik aw. Nazi pakhat sung khukbil ih thlacam a tul asikhalle vun ti mai awla.. cuvekih hmun sang Bawipai' hnen ih na hung thlen cun, na lung retheihnak cun um ngaihnak a thei nawn lo ding.

KA RUAH THEU MI THU ZUNGZAM (Kawhhran thawn pehpar aw mi) – Part 2

By, Biak Lawm Zual

*Kum upa vial thil ti khawmnak le nauhak telnak ding awm lonak ih, nauhak an tel le hruai hi cu midang hrangah phurrit tak cu a si.
*Mai tualsung Kawhhran thu le a lenglam (khawdang) ih relsuah hmangpawl hi cu rinsan tlak ngaingai an si dah lo.

*Mah lam hmuah in midang parih kan tuah thei (paih) lo mi thil tha, mai parih tuah ding kan beisei tlat mai hi cu, mi hawizawng lo le zohthim tlak lo tak a si.

*Kawhhran pi, Nubu le Mino hruaitu rori mai duhhrilnak le paih lo ruangih khawm kan pelh mai hi cu, ka nunnak ih pakhatnak Jesu timi hla thaw cun a nai aw lo tak kan si ding.

*Kawhhran lairel (meeting) nak ah hruaitu in kuttunnak caan a tuah tikih, khui lamlam hman ih kut rak tung lo hi cu, lairel pi pawl hrangah anhai thlak tak cu a si.

*Kawhhran ruaitheh rawl ei khawmnak ih rawlhmeh zemtu in mai sungkhat laina pawl, rawl hmeh thawthaw le a tit thatha a hleice ih an pe thup theu hi cu, thinlung tenau, hmin siat ding khal ruat ban lo an si.

*Rawl hmeh zemtu in sa ei (khai) phah cing ih ningzahnak cang khal thei lo mi hrawng ti tawk a si.

*Kawhhran ruai theh nak ah rawlhmeh hlei a thup tei mai inn lam ih tlun thup hmangpawl cu Pathian tihzahnak nun tlasam deuh an si.

*Midang thurel mi a thazawngih lak tum dah loih, a peng (thalo) zawngih la (cohlang) ringring theu pawl cu, midang ih thatnak tep dah lo an si.

*Kawhhran hmin ih thil ti nak kip (pohpoh) ih  tel thei ringring pawl cu mi duh nung tak, cawn tlak rori nun neitu an si.

*Thil ti khawmnak (hnatlang, meeting) tinkim ih hngah cop tul ringring muangmuah (zam neilo) pawl cu ziangtik hman ah hruaitu tha an si dah lo ding.

*Thil ziangkim ah ngol rori tum ringring pawl cu, mi burpi lakih tel tlak khal an si lo.

*Mai hnatuannak ah hmuah cak (tuan thei vio) emem si, kawhhran hmin ih hnatuan nak ah hmuah bang cau fialfial pawl ih nun hi cu midang (zaran) hrangih theih pi ban lo thuthup maktak cu a si.

HRUAITU

By, KRBYM Secretary

 Frederick tha Great cun General hnenah ralkap thawngruk a kuat thu ava sim. Asinan ralkap cu thawngnga lawng anrak si, General cun a va sutfiah salih Frederick cun "Nangmah hi ralkap thawngkhat tluk na si" tiah arak ti.

Hruaitu tha cun mi theinak le theilonak lam a theifiang ih an thei bangih tha tawk dingih thazang pek a thiam. A thlun tu pawlih cawn tlak dingih a nun hmangtu cu hruaitu tha asi.

A theihlo zia theilo tucu miaa a si, fehsan aw. A theihlo zia thei tucu nauhak asi, zirh aw. A theihzia theilo tucu a itthat asi, thang aw. A theihzia thei tucu mifim asi, thlun aw.

Hruaitu sihi that vio ringawt a silo. Dik le cak zetih um khi a si sawn.

Hruaitu ropi cu thla a cam nasa ih a ding hnget. A tummi a ciang ih a thutiam ah a rinum.

Ropitnak dik cu midang ropitnak phuanlang thiam khi asi.(J.C.McCauley)

Hruaitu tha cun ralthatnak, ngaihtuahnak caknak le nuncan tha anei.

Mi pakhat in General Douglas McArthur hnenah hitin thu a sut "Hruaitu hrangah ziang a tulbik" tiin. Anih cun "Tanghmasiallonak" tiin a sang.

Leitlun hruaitu le Khristian hruaitu danglamnak
Leitlun hruaitu cu a inring tawk ih,- Khristian hruaitu cun Pathian a rinsan
Leitlun hruaitu cun minung a theifiang ih,-Khristian hruaitu cun Pathian a thetheifiangLeitlun hruaitu cun amah ten thutluknak atuah ih, Khristian hruaitu cun Pathian duhdan a feh.
Leitlun hruaitu cu a puarthau ih, Khristian hruaitu cu a tangdawr
Leitlun hruaitu cun bulpak hlawknak a hawl ih, Khristian hruaitu cun Pathian le minung a duhdawt
Leitlun hruaitu cun a theihnak, a fimnak, a cahnak pawl a rinsan ih, Khristian hruaitu cun Pathian a rawn theu

Hruaitu cu thiltum tipitling dingih midang kaihruai theitu asi.

Hruaitu cu lamzin thei le feh hmaisa, amh thlun dingih mipi hruai theitu asi.

Hruaitu tha cu midang pawlih an ti dahlo le an duh dahlo mi tih tirih, duh tir hi asi.

Hruaitu cun a hruainak lamzin a theitu a si dingih, amah khalin a zawh ve ngei ding asi.

Hruaitu zirnak hrang ahcun Buble sungih hruaitu hlawhtling pawl thuhla, mipi thuhla zir ciannak le mah ten timlamawknak pawl a tangkai.

RAWLUL IH THLACAM THU

 By, Kawhhran Duhdawtu

A Umzia : Rawl ei lo ih Pathian thawn pawlkomawknak/thlacamnak ih pumpekawk a si. Thlacam le rawl ulh hi fehtlang ding mi thil an si. Asinan rawl ul loih thlacam a theih, thlacam loih rawlulh khal a ngah thotho fawn. A pahnih ih an fehtlang tikah hmual a nei ih thil a ti thei zet a si.

A Tul Maw? : Cule Jesu in an hnenah, “Mo neitupa an hnenih a um sungah mo lawmtupawl an riah a se thei maw si? An hnen ihsin mo neitupa lakhloh ni a thleng leh ding ih, cuih cān ah rawl an ul leh ding(MATHAI 9:15).

Bible Ah Ziangtin A Lang? 
1. Thukham Hlun ah
 A. Rawlulh caan an nei (Jer.36:6; Apos.27:9)
 B. Moses in ni sawmli le zaan sawmli rawl a ul. (Suah.34:23)
C. Moab le Amon pawl in do an tum tikah Jehusafet in mipi pawl rawl ul ding in thu a suah. (IISan.20:3)
 D. Nineveh pawl rawl an ul. (Jonah 3:5)
 E. David cu Soul le Jonathan an thih ruangah rawl a ul. (IISam.1:12)
 F. Nehemiah cu Jerusalem siatnak ruangah rawl ul in thla a cam. (Nehem.1:4)
G. Darius Persia Siangpahrang cu Danial kiosa puk sungih an ret ruangah rawl ul in a um. (Danial 6:18)

Rawl ulh le thlacam hi harsat, mangbang vansannak ton caan ah hman tlangpi theu a rak siin a lang.

2. Thukham Thar ah
A. Anna, Biakinn ah sunzan rawl ul in thla a cam ringring. (Luk.2:37)
B. Baptisma petu John ih dungthluntupawl rawl an ul. (Mk.2:18)
C. Jesu in ni sawmli le zan sawmli rawl a ul. (Mt.4:2)
D. Antiock khua ih kawhhran pawl rawl an ul. (Apos.13:2)
E. Paul le Barnabas cun rawlul le thlacam in Kawhhran upa hlannak an tuah. (Apos.14:23)

Rawlul ih Thlacam Ding in Sawmnak/Thupek Bible ah a Um Maw? Rawlul ih thlacamnak thawn can hmang ding hin Bible ah sawmnak le thupek hmuh ding a um lo. Asinan Pathian thawn kan pawlkomawknak le pehzomawknak thuk sin le, a hnget sinsin theinak dingah le thil pakhat khat kan tul mi, duh mi hrangah le mangbang vansannak kan ton can khal ah rawlul rori ih thla vun cam curco cu a direm thlak in a manhla curco rori ding a si. Kan taksa siatsuah ding tiangtiangih rawl ulh ding asiloih, caan bikhiah tawite nei ih ulh hi cu thil tha a si. (Fasting is not a method of punishing our body, rather to gain a deeper fellowship with God) Cun, miih fel le tha ti hlawh duh men ah siloin, leitlun ih sunlawinak hrangah mitsing in Pathian lam ih mit meng ih rawlul thla cam hi a tha a si.

“Cuihtlunah rawl nan ulh tikah midepdepawl vekin riahsia mithmai in um hlah uh. Ziangahtile annih cun rawl an ul ti mi hnenih an lăng theinak dingah an hmel an pawrter. Thungaiin ka lo sim, annih cun an lawmman an ngah zo a si. Asinan nang cun rawl na ulh tikah na lu hriak thih awla, na hmai phiah aw. Mi in rawl na ul ti hmu loin, zohman ih hmuhlonak ih um na Pa lawngin a lo hmuh theinak dingah cutin tuah sawn aw. Cule zohman ih hmuh lo mi hmutu na Pa in langhnganin lawmman a lo pe ding.(MATHAI 6:16-18)

Thu Netnak
Rawlulh ah siseh, ulh lo ah siseh, Pathian cun amai' duhnak thawn milaw ih kan dil lawngah thlacam mi a sansak theu (IJohn 5:14).
Isaiah 58:1-12 sungah Israel pawl cu an nun tha lo, sual cingin rawlul ih thla an camnak cu sansak an si lo.
Curuangah Pathian sunlawi, ropitnak ding le a ram kauhnak ding hrangih kan tumtah mi hlawhtlin ter dingah amah thawn thuk zetih pehtlaihawknak hrangah, rinsan pumhlumnak thawn, titerawknak um riai lo le tangdawr zetin thla kan cam a tul a si.

2019 VEHVAITU SPONSORS

Khampat Revival Baptist Youth Ministry ih thlakhat voikhat ca a suah theu mi Vehvaitu cu 2019 sung, Mai Malsawm Kim(Singapore), Mai Laldin Thar (China) le Mai Lalrin Mawi(Singapore) tei unau thum in an sponsor a si.

Pathian in an nun ah a duhnak kim ter vivo in hna an tuannak khal ah thlawsuah in malsawm hram seh.

SAWMNAK

Kawhhran members hnenih theihter na duh mi, thazang peknak, na thinlung ih helhkam mi, Pathian thu, titi thunuam le thil dangdang khal asile, Vehvaitu ah ca rak ngan dingah kan lo sawm.

KRBYM ih UNIVERSITY BUAIH NGAH HMAISABIK

 Salai Vanram Lian, cun tuisun ah B.Sc a zirsuah mi Degree cu lungawi ten a ngah suak ta riai mai. Kawhhran in thla kan cam mi Salai LianLian cu a zirlai a takin theh suak tiang lam a hruaitu Pathian kan thangthat.

 KRBYM in kan lungawi pi tuk, hmailam a feh vivo nak lamtluan ah Hlawhtling vivo hram sehla, Kawhhran, Khawtlang ih hman tlak mi le tangkai mi si vivo hram seh tiah duhsaknak kan hlan..
Congratulations Salai LianLian

A SUAK CING DING

KRBYM ih Pathian Sunlawihtu Mino DVD cu Pathian in rem a ti le, Febuary 2019 thla thok ah a suak thlang ding a si.

2019 RBYF PALAI MEETING AH

   Revival Baptist Youth Fellowship Palai meeting cu January 23.2019, Berean RBC ah neih asiih KRBYM ihsin Palai pahnih Salai Vanram Hngak le Salai Vanram Lian thlah suak an si.
KRBYM ihsin RBYF ih E.C tuan hmaisabik Salai Bawisiamthar khal January 22.2019 (Tuesday) zingah Meeting a kai ngah ih, a thaisun Mino Palai pi meeting khal a kai peh sunzom  cih a si.

Kan rak theih cia dingih tha, ni poimawh le thu mallai run tarlang sehla,

Mino Rawlul thlacam - February 22.2019(Friday)

Mino Sunday - March 3.2019(Sunday) Sermon Thupi: Mino le Thansonak (Joshua 1:7)

 Mino Training  A hmun:Tanbu April 24-25.2019

VEHVAITU SPONSOR THEIH RINGRING LAI

Vehvaitu sponsor duhtu kan um asile a ngah ringring lai a si. Sumpai cemzat cu voikhat (thlakhat) ahhin Ks.4500 a si theu, Kawhhran inn kan pun vivo ahcun ks.5000 a si caan tla a um thei. Pathian hrangih ka ti thei sunte a sisi tiih, sumpai thawh duhtu cun thlakhat hrang te in simaw, thlahnih hrang simaw, kum khat hrang top khal in Sponsor a theih ringring lai a si.
Hminsin. Aliam cia mi kum hnih le hrek sung hrawng kha Salai Temuan in a rak sponsored mi a si.

KA RUAH THEU MI THU ZUNGZAM

(Kawhhran thawn pehpar aw mi)

By, Biak Lawm Zual

*Pathian biaknak ih Bible ken kan paih lo cun, thlarau lam thilah kan cak tawk lo ti langnak pakhat a si.

*Ziangtiklai khal ih khawm tlai ringring pawl cu thlarau lam lungawinak nei mal deuh an si tlangpi.

*Thlacam lai ah mitsing duh loih, mengpawl khi Pathian tihzah upatnak nun tlasamtu an si,

*Thlacam tikah, mai’ cam ding thupi lawng silo, thil dang tampi sal kual rero pawl khi, thil dang siloin, thlacam rei an duh hrimhrim.

*Thawhhlawm hlan thlacam tikah, a petupawl thlawsuah an donnak ding hrang cam tel a tul tuk lemlo.

*Sermon cem zawngih kan thusim mi tawite ti hi a tul hranpa lo. (A sau kha a poi tinak asilonan, sau viau si tawite ti kha a tha lo)

*Sermon hlan ih mai’ thuhla le thu nawi sim ciamco theu hi a ngaitupawl in thazang an ngah dah lo.

*Mi pakhat khat in hmailam ih caan a hman (thusim) lai ah ngaihsak lo deuhih, ca rak siar hi cu, huat um tak an si.

*Timlamnak um cuang silo, caan awl(lawng) le caan pek mi pohpoh ih, sermon (thusim) hluahhlo mai cu thazang le thlarau lam tihang(hnunman) a um lo hlei ah, a hul a si.

*Bible siar kan daithlan ruangah thusim ding kan tlasam tlangpi.

*Peknak, tuannak le cangvaihnak ah ti tha thei viau khal sehla, Pathian thangthat khawmnak kan daithlan cun thlarau nun ah mi hlawhsam kan si thei thotho.

*Mi pakhat khawmawk hman a paih lo ahcun, thlarau lam ih than (pitlin) nak dang a um lo.

*Kawhhran parih vuivai hmangpawl hi, pe mal bik, tuan mal bik, khawm mal bik le kawhhran duhdaw lo tu an si theu.

*Pek suah lam siloin, ngah lam(hamthat) lawnglawng ruatpawl cu thlarau le taksa dan khalah mi pitling lo tak nun a si.

*Kawhhran hnatlang nak ah raw lei belbel si, ei khawh hnu pok nawn lo nun hi cu cawn tlak lo tak, dinhmun niam tak ti tawk a si.

SUAL

By, Sunthang Tlangval

#Mi tampi cu sual lakah thinheng loin sual tuahtu lakah an thinheng theu.
#Sual hi thuthangtha asi. A san cu na bansan thei ruangah asi. Thinlung buai le atnak pawl hicu bansan le sirawk theih mi a silo. Sualnak le sirawknak hi beiseinak le hlimnak, pehzawmawk salnak le inkungkaihnak hlimum asi.
#Sual rak suahnak cu Pathian in in hmu tlang thluh ti ka theihlo ruangah asi.
#Rome Emperor Valentinian khan a thih hlante ah "Raal pawl ka neh hmuahhmuah hnakin ka thinlung sual ka neh hi a thupi sawn" tiah arak ti.
#Minung hin thiltha kan thei, asinan thil thalo ka tuah sawn theu.
#Hlawknak hrangih sual tuah hin hlawknak a thlen dahlo.
#Nauhak nute pakhat hi thil sual arak tuah theu ih a nu in cui thilsual atuah theu cu a theih tikah "Cuvek rel ka duhlo" ati tlat zel. Cuvek ciah in thilsual kan tuah asile Pathian hnenih thlacam kan duhlo theu. Thlacam kan hreh vio lai caan hi kan tul lai tak caan cu asi.
#Football player pakhat a offside ruangah an team zaten an tuar bangin mipakhat Adam ih sualnak ruangah mi hmuahhmuah in kan tuar.
#Sual cu Pathian pialhloh san hi asi.
#Sual tuahnak caan remcang ihsin inthiarfihlim awla Bawipa in sual lak ihsin alo thiarfihlim ve ding.
#Sual le mipa hmur hmul hi abang aw a si. Hmur hmul cu meh fai ringring locun ara tto ih hmel ati sia theu. Sual khal nitin in kan thianfai lo asile hmel mawinak a phen langsar theu asi.
#A lang lemlo ih kan ruahmi sualnak fate kan tuah theu asile a reihlan ah sual tumpi tuahtu ah kan cang leh ding.
#Sual na tuah tikah sualtuah aduhtu cu ralpa Setan cu a lungawi ih Bawipa a riahsia tikha hngilh hrimhrim aw hlah.
#Pulpit ah kiosa bangin raltha zetin um awla, sual puannak ahcun tuu bangin inngaitlawm aw.
#Lo neitu in thlai a cin nak dingah a lo a ti fai hmaisa bangin sual puannak hin Pathian thawn pawlawknak lamzin arak sial hmaisa asi. Ziangkim tithei Pathian hmaiah sual puan hrehlo aw. Na thlarau cahnak hram asi.

FIANRIAL THLACAM THUPIT ZIA

By, Rev. Than Fai

1.Mipum.7:89 – Moses, Biakbuk ih a lut tin in thukam kuang parih a um mi Cherubim karlak ihsin Bawipai aw a thei theu.

2. Suah.19:3 – Moses cu Pathian tawng dingah tlang parah a kaiih tlang par ihsin Bawipa in Moses a ko theu.

3.I Sam.3:3-4 – Bawipai thukam kuang retnak ah a it theu, Bawipai aw tum li(4) a thei.

4. Dan.6:10 – Danial nikhat ah voi thum thla a cam theu.

5. Luk.5:16 – (Pharnat a dam ter hnu ah) Misenpi hnen ihsin a feh ih, amah lawng thla a cam theu.

6. Mark 1:35 – (Kapernaum ih mi naa tampi a damter hnuah) A thaizing zing thlapit, ni suah hlanah Jesu cu a tho ih inn ihsin a suah hnuah khawpawn ah thla a cam.

7. Luk.6:17 – (Kutzengpa a damter hnuah) Jesu cu thlacam dingin tlangpar ah a kaiih, Pathian hnen ah zanvar thla a cam.

8. Luk.9:18 – Nikhat ah Jesu cu amah lawng thla a cam.

9. Jn. 11:1 – Nikhat ah Jesu cu hmun pakhatah thla a cam.

2019 KRBYM MEMBERS

01.Salai Bawi Siam Thar
02.Salai Van Ram Hngak
03.Salai Van Hlei Thawng
04.Salai Van Ram Lian
05.Salai Van Lal Hrin
06.Salai Van Biak Muan
07.Salai Ca Aung Thang
08.Salai Val Lal Buat Saih
09.Salai David Sui San Thawn
10.Salai Catuan Rem Lal
11.Salai Lal Tlen Zo
12.Salai Lal Pek Lian
13.Salai Rundam Cuang Bik
14.Salai Peter Bawi Khrih Nun Thawng
15.Salai Bawi Tin Thang
16.Salai Ngun Lian Mang
17.Salai Lal Pek Tluang
18.Salai Van Sui Hngak
19.Salai Van Siar Lawm
20.Salai Lal Pek Muan
21.Salai Lal Pian Thang
22.Salai David Thang
23.Salai Benjamin
24.Salai Run Lian Thang
25.Salai Zo Hming Mawi
26.Salai Lal Tha Luai
27.Salai Van Ro Mang
28.Salai Van Lal Hruai
29.Salai Lal Biak Ceu
30.Salai Tuan Hlei Tawng
31.Mai Van Ro Sung
32.Mai Van Nei Thiam
33.Mai Lal Rem Cang
34.Mai Lal Din Thar
35.Mai Mal Sawm Kim
36.Mai Lal Rin Mawi
37.Mai Lal Nun Thar
38.Mai Van Thiam Mawi
39.Mai Hannah Sui Hlei Mawi
40.Mai Cin Kim
41.Mai Cung Lawng Par
42.Mai Za Biak Mawi
43.Mai Siang Lian Par
44.Mai Lal Ngen Tluang

 Hminsin: Salai(30), Mai(14) Ram sung um(31), Ram leng um mi(13)

“BAWIPA AH LUNGAWI UH”

 (Phil.4:4)

By, Kawhhran Duhdawtu

Minung hrangah lungawi ringring hi thil harzet mi a si, hnih ringring khal thil cang thei lo tluk a si. Hni hmukhmo thei ringring pawl tla cu mi hmukhmak (mi bangtuk lo) ah kan ret mai theu.

Hring mi kan nun hi, thah dingah caw rualrual an khor mi vekin vawn tahthim hnik sehla: zokhal in kan thihnak lam pan in ke kan pen rero cio cu asiih, nitin hin cui ni cu kan naih vivo a si. Caw khortu cun a caw khor mipawl cu pakhat te khal lam zin an pial ding a duh loih, a tum hmun tiang a khor vivo. Caw hrekkhat cu an ke a naa, an cauh zet khal ah cawl lo in a khor thotho. Kan hring nun khal hi kan duh khalah duhlo khalle a feh a cawl dah loih, mi hrekkhat cu nuam titakin, hrekkhat asile harsa ti zet cingin, asinan caw thau khal an rak thatih, a tawl deuh khal an thah thotho vekin, ziang tikah simaw cun kan nunnak cu a cem ve leh ding. Mi lian, mi farah, mifim le mi aa, mi cak le cak lo ti um loin kan caan net lam cu kan pan ve rero cio a si.

Zozo khal in harsatnak hi kan hmaiton theu ih, kanmah tawkten phurrit a nei cio mi kan si. A caancaan ah cun, kanmai fello, ti sual ruangah vansan\mangbang kan tong theu. A caan ah cun, kan tisual le fello ruang si cuang lo ih harnak tuarih kan theihawk caan khal a um theu. Zumtu ziangtlukih thlarau mi le tisa mi zokhal in hring nun lamtluan ih kan suhsonak ahhin harsat,mangbang le lung retheinak hi kan tong theu a si.

Jesu in, “Nannih hnatuan har zet a tuantupawl le thilrit a phurtupawl hmuahhmuah, ka hnenah ra uh, cawlhhahdamnak ka lo pe ding. Ka hngawngkol bât uhla, ka hnen ihsin zir uh. Ziangahtile kei cu minunnem le thinlung tăngdawr mi ka si ih, nan thlarau hrangah cawlhhahdamnak nan hmu ding. Ziangahtile keiih hngawngkol cu hman a hahdam ih, ka phur khal a zâng a si,” tiah a ti (MATHAI 11:28-30). Jesu hin phur nei loi umter in tum loih, kan hngawngkol in thlengter hi a tum mi cu a si. Apostle Paul khal in, Pathian ralthuam famkim in thuamaw uh tiah in ti. Ziangahtile leitlun kan nun sungah sual, thil tha lo, vanduainak, mangbangnak le harsatnak hi a hlo thluh dah lo ding. Pathian hin sualnakpawl hi kan hmuhban lo le thamban lo ah ret a tum lo, kanmah sawn hi sual tuah duh nawn lo le tuah nawn lo ih umter in duhsawn. Eden hmuan ah khan, Evi le Adam ih an hmuh le tham ban ah Ei sian lo theirah a ret hrim vekin, leitlun ih kan dam sung caan ahhin kan hmuh ban le tham ban ah sual, thil tha lo hi a um ringring ding. Zumtupawl hi Pathian thu ih kan humhimawk ringring a tul a si.

Kan duhdan vek siloin, kan remruah mi vek khal si cuang lo hin, kan parah thil duhum lo a ra thleng theu. Ti thei tawk suah in Pathian hrangah tiin, hna kan tuan, kan nung, kan caan tampi cu Pathian Kawhhran hrangah kan hmang liam rero, asinan harsat mangbangnak ihsin kan luat cuang lo, bulpak ah innsang ah le khawtlang khal ah mangbang, mitthli tlaknak ihsin kan luat cuang riai lo. A caan ah cun, Pathian le Kawhhran ngaihsak lemlo pawl khi an hmuingil sawn silosawm tiih, vun dawt zik mai caan tla a um theu.
Kan Bible in, Bawipa ah lungawiaipuangin um ringring uh, ka simsal ding, lungawiaipuangin um uh! (FILIPI 4:4), in ti, harsat, mangbangnak ih in cim buai khal le Bawipa ah lungawi aipuangih um ding tinak a si. Ziangahsaw Bawipa ih kan lung a awi thei theu lo? Kan lungawinak le hlimnak ih thumawknak a rak dik lo ruangah a si. Kan ton mi ruangah Bawipa thangthat nuam kan ti loih, kan paih lo theu a si kha. Innsak pawl in a foundation tha le uluk tak ih an tuah hmaisa lo cun ziangtlukih mawi khal an sak asile, a tlo loih rei a daih thei lo. Cuvekin kan lungawinak le hnangamnak hi poisa ah, khawvel thilri ah le hnipuan tivekih kan thumawk asile, rei a daih thei dah lo ding.
Zumtu cun kan lungawinak hi hmuh theih thil ah siloin, Pathian ah kan thumawk thiam ringring ding hi a poimawh nasa. Kan duhdan le beisei vek hlir in thil ra thleng lo khal sehla Pathian remruat ih kan thumawk thiam asile, nun hahdamnak, lungawinak in kan khat thei ringring ding. Kan hrang tha ding cu ziangkim thei thluhtu Amah Pathian in a thei bik a sisi. Ziangvek thil a parih a thlen khalih Bawipa ih a thumawk ringring tu cun Kawhhran innsang le kiangkap minung parah Vuivainak hrimhrim a nei dah lo. Kan thatnak dingih Bawipai remruat a si tiin Amen a ti thei ringring theu a si.

Editorial..✏

Kum2019 sung khal thlakhat voikhat Vehvaitu hi amah kel ten suah peh vivo ding a si. Kum2016 January ihsi suah thok mi asiih, kum(3) sung cu Kawhhran inntin in vehvai ve zo ih, tucun kum(4)nak a si ve thlang.

Kan kiangkap ah hivekin Kawhhran mino hmin ih casuah hmuh ding le theih ding a um tuk lem lo, Pathian thlawsuah kan don mi liolio a si. Curuangah ca ngan le siar lam ah tan kan lakih thazang kan pekawk sinsin a tul.

2018-2019 Kum Thar Khawm Program Caan Hmangtupawl

31.12.2018 (zaan)
Khawmhruaitu : Rev.Fai
Sermon : Biak Lawm Zual
Solo : Mai NuNu
Thilpek Hlantu : Salai Bawisiamthar

Zaan lai khawm
Khawmhruaitu : Biak Lawm Zual
Sermon : Lal Dik Vel
Solo : Mai Vanro Sung
Thilpek Hlantu : SiangawiPa



1.1.2019 (Sun khawm)
Khawmhruaitu : Biak Lawm Zual
Sermon : Church Pastor
Solo : Salai Lal Pek Tluang
Thilpek Hlantu : Lal Ro Lian

1.1.2019 (Zaan)
Khawmhruaitu : Biak Lawm Zual
Sermon : Rev. Fai
Solo : Salai Uk Bawih
Thilpek Hlantu : Conkip Thang

2018 KRBYM C2 TLUANGTEN THEH SUAK

Pathian lamhruainak zarah Avoi(4)nak Khampat Revival Baptist Youth Ministry ih Composing Contest(Hlaphuah Zuamawknak) cu December 30.2018(sunday) zan khawmban hnu ah tuah asiih, a zan lala ah laksawng pekawknak tiang tluang felfai zetin theh suak a si.

Tui tum zuamawknak ahhin Hla fing (4) a rung suakih cupawl tla cu: #Tuanman_Laksawng (Phuah: Missionary Van lal Hrin)  Saktu: Mai Vanro le Salai Cerboihpa

#Pai_Duhzawng (Phuah&Sak:Catuan Remlal)

#Kan_Tuar_Khal_In_Siang (Phuah&Sak:Salai Bawisiamthar Sunthang)

#Mi_Van_Nei_Bik (Phuah&Sak:Salai Vanram Hngak)

Announcers: #Salai Vanram lian #Salai Lalpek Lian

Judges:  Pa Biak Lawm Zual (Leader) Pa Bawi Lian Sawn Pa Lal Ro Lian Pastor Than Fai

Lawmman ngahtupawl cu a hnuailam vekin a si;
1nak - Tuanman Laksawng 2nak - Kan Tuar Khal In Siang 3nak - Mi Vannei Bik People Choice - Vanro le Cerboihpa

KRBYM C2 Thuken: Sam.149:1 - Bawipai' hnenah hlathar sak uh.

RAWNGBAWLTU NA SI

 By, Kawhhran Duhdawtu

Kawhhran mipi tamzet ih kan ngaidan le hmuhdan tlangpi ahhin Pathian rawngbawl timi ah Pastor, Evangelist le Misionary tivekpawl lawng hi kan huap ter theu. Asinan Bible Pathian thu thatei kan siar le kan ruah tikah Pathian rawngbawlnak hi kaupi a rak si. Rawng kan bawl dan asilole Pathian hna kan tuan thei dan lawngte cu a bangaw lo.

Mi hrekkhat cu Pastor, Evan le Missionary kan si ve lo ruangah Pathian rawngbawltu ah kan ruataw theu lo ih kanmai tisa duhnak thlun in kan duhduh in le nuam kan ti dandan in thlahdah tak in kan rak nung pang theu. A taktak ahcun zumtu hmuahhmuah hi Pathian Rawngbawltu, a hna tuantu cu kan si. Kan tuanvo, sinak le tuan thei mi a bangaw lo mi men hi a si. Mi piangthar kan si hnu ah hin zumtu siseh, zumlo tu siseh, kan kiangkap ih a um mi pawl hin kan nun an zoh in an rak thlir ringring theu. Midang hrangah hin kan nun dan hi thazang ngahnak le lungawinak a si pei maw, asilole mi tluknak ding le miih thazang cak lo tertu sawn ha kan si ti hi kan ruat aw sal pei uh.
Kan theih lo sungah hin, mi tampi in kan nundan hi an rak thlir ringring theu ruangah ziangtiklai caan khal ahhin zumtu cu Rawngbawltu ka si ti thei in fimkhur takih ke kan kar a tul. Na hruaitupi in na nun dan ahhin a lungawi tawk thei kem, na member pi le na kawhhran pi pawl teh hin na nun dan hi tha an ti thei pei maw. A thupibik mi cu kan Pathian in teh kan nun dan, kan tongkam, kan um tlandan hi a lung a kim pei maw ti hi kan zohkir sal awk theu a tul zet si.
Zozo khal lei taksa ih kan um sungah mi famkim cu kan um lo ih kan um dah lo ding nan, kan nun hi a tha theibik le kan parih tuanvo a um mi hi mah tlin tawkih thabik in kan tuan maw ti hi ruat sal theu uhsi. Pathian le a kawhhran hrangah Kum hlun ih kan tlinlonak le thatlonak hmuahhmuah cu tanta in, kum tharah hmai kan nor vivo pei uh...

2019 KHAMPAT REVIVAL BAPTIST CHURCH HRUAITUPAWL

Chairman – Con Kip Thang
Vice------ - Lal Dik Vel
Secretary – Za Biak Lal
Assist---- - Lal Ro Lian
Thenhre Thenkhat –  Biak Lawm Zual
Thawhhlawm Kiltu – Khuang Nei Thang
Mission Sumkiltu – Catuan Remlal

KRBW Committee
Chairman – Lal Ram Muan
Vice----- - Zai Cin
Secretary – Lal Thawm Mawi
Assist      - Bual Kip Sung
Treasurer – Hrang Hlei Dim
Lawmbawm kiltu – Bual Kip Sung
Thawhhlawm kiltu  - Zai Cin
Members – No Hlei Par
Lal Chan Dam
Lal Rin Hnget
Saya Nu
Runhnget Nu


KRBYM Committee
Chairman – Salai Bawisiamthar
Vice------ - Salai David Thang
Secretary – Salai Vanram Hngak
Assist---- - Salai David Suisan Thawn
Treasurer – Mai Vanro Sung
Assist--    - Mai Lalrem Cang
Members – Salai Van Hlei Thawng
                    Salai Vanram Lian

CAAN A UM LAI

 By, Cerboihpa
"Ziang hmuahhmuah in caan an neiih, Leilung tlun thil tinkim hrangah tikcu remcang a um." (Thusimtu 3:1)
A tlunih kan Bible tarlan mi "Caan" timi khi english cun "season" ti a si. Fur, Thal le thlatang caan hi kumkhat sungah a thlengaw kual theu. Kumtluan in ruah a sur ringring loih, khua khal a hlum ringring fawn lo.

Harsatnak, beidonnak le thinharnak kan ton mipawl khal hi season(caan reilote) hrang lawng a si. Ziangvek thil khal hin thlengawk tikcu caan an nei theu a si. Tu caan ah ngaihzawng na nei(tong) hrih lo tla a si thei, nan sinpi thei lo tla a si men thei. Cun na hriselnak a tha thei lo tla si ding, Innsang nuam le hngetkhoh zet mi ah na thanglian in na um lo tla a si thei, Sumpai lamah harsatnak na nei tla si men thei, na ton mi, tui na dinhmun hi kumtluan cun a si ringring zik lo hokhaw. Season caan tawkfang sung hrang lawng a si ti hi thei ringring awla, beiseinak thar thawn ni engmawi, kum thar, nun thar caan duhum zet na hrang a suah ding caan khi thlir thiam tum aw.

Caan reilo te sung hrangih na ton mi, harsatnak ruangah na thanau in thu tluknak tha lo tuah pang hlah. Pathian ah na ruahsannak ret awla, amah cu rinsan aw. Na hmailamah season thar, tikcu remcang, caan tha le duhum tak a um lai a si.

HIHI CING RINGRING AW

Kawpi hnakin Pangpar khi a mawi sawn, asinan kawpi cu ei ding hrangih tuah a theih lai ah, Pangpar cu ei ci a rak si ve ta lo. Curuangah midang thawn tahthim aw rero theu hlah. Nangmah ih um cahnak, thilti theinak le na sunlawinak kha theithiam aw awla, cucu hman thiam tum sawn aw!

Noah ih lawng sungah khan, ransa cakvak hlir an lut cuanglo. Pathian in ransa lakih fehmuang zetzet cumkheng,hnapkhawn tvk tiangin lawng sungih an luh kim a hngak thei thluh bangin, na nun na remthatawk le na beisei mi dinhmun thleng dingah a lo hngak thei tuk, zuam tento hrih aw.

Nangmah kha niam tuk ah ruataw hlah awla, hnuallam zoh loin, tlunlam khi thlir sawn theu aw. Asinan puarthau in hngalhngawng hrimhrim pang hlah. Pensil bul tawite khal khin zuk mawite a suai theih lai thotho hokhaw.
​You are God's masterpiece!​ .... lettu:editor

AW KUM HLUN MANGTHA

By, Biak Lawm Zual

Sersiam mi hmuahhmuah le minung a tum a te, a fim a aa, dinhmun sang le niam, a lian, nunhar kan zatein bangrep teih kan neih tlan mi le kan hman tlan ciau mi cu tikcu le caan hi a si. Hi caan sunglawi tak hi zohman in a luan (hleifuan) in an hmang(nei) thei lo ih, a hrek a then khal an hlon (hrial) thei fawn lo. Bangrep tei kan neih tlan ciau mi tikcu caan hi kan hman dan lawng te cu a thlau aw (bangawlo) nasa ding. Mi tampi in thathnemnak le thil tha tuahnak ih an hman laiah, hrekkhat hrangah cun sual tuahnak remcang takah a cang. Ziang a si khallen nangteh na caan sunglawi neih mi kha ziangvekin na hmang theu ti hi, mikip hnenih thusuhnak thupi tak cu a si ko.

Ni le thla an her liam vivo ih, kan theih man lo sung te ah kumpi kumkhat cu kan hmang liam ve ta cu a si der mai. A liamzo mi kumkhat sungih caan than a neih mi nah man dan ah na di lo ti riamtu saw tam deuh, sir aw duahdo ko lo tuah ih, na mitthli lo tit la tu ti cu, nangmah kha a theifiangtu bik na si kha. Thil dang tampi cu an fehliam hnu khalah kawhkirsal an theih nan, tikcu le caan hi cu ka siang lo ti hman nungla kawhkir sal theih an si lo, an liam ruahro a si hi.
Cu ti vek a si ruangah, ziang tinkim hrangih a thupi bik mi cu a tu caan kan hman rero lai mi hi a si. Cui caan in ni khat hnu ni khat, thla khat hnu thla khat kum khat hnu kum khat tiin, kan duh khal ah duh lo khal ah, upat lam in panpi rero cu a si.


Pathian thu Bible kan zoh tikah dunglam ih a liam cia mi caan kha hngilh tahrat in, hmailam ih kan ton ding mi thil kha ruat dingah in forhfial mi kan hmu. Ziangruangahtile a liam cia mi ih, thil cang mipawl hin tui kan nun hrangah thathnemnak a nei non lo tinak a si cu. Kum hlun sungah beidonnak, zatlaknak, tlaksiatnak, hlawhsamnak le ninghannak na ton mi hmuahhmuah kha, ruat kirsal tahratin, tihhrutnak le thanaunak ah hmang hrimhrim hlah, cuti asilo ahcun hmai na nor thei lo ding ti kha cing ringring aw. A liam cia caan ih hlawhtlinnak na rak hmuh mipawl khal kha tui caan hrangah hmaihngalpi a tlak lo, cuti asilo ahcun na porhaw dingih, mi puarthau cu Pathian huatzawng tak a si ruangah, niam takah a lo hnuk thla mai ding. Joshua le a hopawl in Jeriko an nehnak le hlawhtlinnak kha suangin, Ai khua do dingih an daithlan ruangah, an hlawhsam ih an thih phah ti kan theih kha. A liam cia caan ih kan nun in a ton mipawl hi a tu caan hrangah le hmailam caan hrangah hman tlak an um lo. Ziangkhal asilen ziangtinkim hrangah a tharih tanlak le hmainor a tul bik a si ko.
Awle Pathian lamhruainak le kutcak ruangah kumhlun cu kan hmang cem sal ta a si hi. A hlun hmuah cu liam hmanseh a thar in tuanvo kan nei ti hi zumtupawl in hngilh hlah uhsi. Thin diriam tak le hahdam zetin AW KUM HLUN MANGTHA a ti theitu kan si ciau theinak dingah, duhsaknak ka lo hlan. Kum thar sungih tuanvo Pathian in kan liang parih a thum mi ciau hi, rinnak ah pacang zetih a tuan suaktu le a hlawhtling mi nun neitu kan si ciau theinak dingah Pathian in thlaw in suahsak hram seh.

Editorial...

December 2018

2018 kum cu a liam leh cuarco ta.. Pathian zarah Kawhhran sungah thihnak dar awn theih ding um lo ten caan kan hmang liam thei hi a ropi tuk. Kan fel le that tuk ruangah siloin, a zahngainak kan co mi sawn a si.
Tucun Vehvaitu khal in kum thum sung Kawhhran inntin a vehvai ngah ve ta riai mai. Hi khal hi Bawipai thatnak kan dawn mi thotho a si. A malsawmnak cu ni bang a tlang a mipawl kan hrangah, a siar thiam tui hrangah cun siar cawk ding rual a si lo.

Kum hlun ihsin, Kumthar sungah hmailam pan in ke kan kar vivo pei uh. Ziangkim ah thanso tum in dungsip mai lo ten, zuam tento hrih uh si.