(Tuluk ram lam pan in)
Ka khualtlawnnak Lamzin tluanah tihphannak/ harsatnak le thlemnak a phunphun ka tong, asinan Pathian in himdam ten in hruai vivo.
Date 26.2.2019 zingah Tuluk lam pan dingin ka poksuak (mi pathum kan si), kan fehpi ding Mizoram lam mi minung (10) pawl thawn Kalay ih kan tonawk hnu in zanlam ah kalay-mandalay motor cu zanvar kan to, a nuam lemlo khop mai, Mawtaw ka rii ciamco silom mawle(ka luak nasa😁), a thaizing khawvang rual hrawngah Mandalay kan thleng.
Mandalay cawlhbukih sunvu kan cawlh huahhi hnu ah zanlam thim zawngah Muse (Shan State) lam pan in zanvar mawtaw kan to lala, ka rii lem nawn loih tihzia deuh, cutin zing khawvang rualah Muse cu tluangten kan thleng thei. Ruah a sur nasa khawp mai ih boruak a nuam lemlo nasa. Muse ihsin Tuluk ram lut tum kan si nan, boruak a that tuk lo ruangah lut thei mai loin Muse hotel ropi lemlo ah zanthum riakin kan hngak cuahco. Zantin zuri le thawmvang celcel, buai hnawk ruairi lakih um cu a nuam lemlo khop mai. Ka thinlung ten "Bawipa, in thlahthlam hram hlah, ka hmailam ah ziangvek boruak tha lo khal tong hmanningla na hnenih ka lo hlan cia zo vekin in hruai vivo hram aw tiin...
Sunday asiih ChinShewhaw lam ihsin a luh theih ding ti thu a um ruangah, cu lam cu kan pan lala, zing khawvang hlan in mawtaw fate ah minung (13) cu a ben in kan ben aw hi si ringawt mai (awl lo zet si), kan fehpipawl hi mizoram mi an si ruangah Hmatpungtin le nei hlah hai, lamziin gate ah thin a nuam duh lo zet. Chinshewhaw cu sun padir hrawngah kan thleng thei. Cutawk hotel tawp deuh mai ah cun kan cawl huahhi ih zanriah kan khawh hnu ah zan 8:30pm hrawngah china ram ah cun minung(8) cu a thupten kan lut.
Tuluk mi pakhat hin in hruai ih mi pali a hmaisa deuh ah kan feh, ziinpi kan kân hnu ah nunau pakhat hin a kut in rak zãp ih culam ah cun kan va tlan phei.. cutin ziin hnuai thingkung tampi umnak khawthim lak ah cun cang lo (dai thepthi) ten, kan dungih ra pawl kan rak hngak. Khatlam ziinpi ah cun a feh kual zukzo rero mi police motor si awm tak khi kan hei hmu. Tih le thlaphang zet cing cun hmanhmawh zet in nunau le mipa ziin in hruaitu cu kan thlun ih mi inn dungah in relhter, lamzin ah police motor le minung au thawm khemkhem ngai nuam tuk lemlo in an tong celcel mi cun thin a ti phang in khawruah a ti tam zet. Cutawk khawthim lakah nazi 1:30 sung hrawng cangkhai lotei kan um lai ah mawtaw mit eng cun in run tlet ngah zik leuleu theu. Thin a khur, tu le tu thinlung ten thla kan cam, nazi pakhat le khuai sung cu a rei duh khop mai, kan thisen khal a kang zik leuleu in ka thei, dan loih lut kan si ruangah, kaih kan si pangah cun tum lo lam ih thlen a tul zik si. Sinan Pathian in, in humhim ih in phurtu ding motor cu kan relhnak inn fate hmai ah a ra ding cutci, thawmvang dang a reh deuh hnu ah nunau nu a ra ih a kut in rak zap ciamco ruangah zamrang zetin kan va pan, cutin Tuluk Driver pa cun a mawtaw sungah in thunlut toptop ih kharhkhum kan si hnu ah cak tawkin mawtaw cu a mawng cih vurvo hngal. Kan pariat lakah China tong thiam zohman kan um siloih kan va buai awm ve aw tiih ka ruah rero lai ah kan driver pa cun Kawltong a rak thiam ziar hi siin, lamzin tha deuh kan thlen cun mawtaw a cawl ih a hmai lam ah mi pali in toter. Cutin kan be aw vivo phah thei ih a tihzia nasa, lamzin ah kaih a phan um vio ke maw tiin ka sut ih anih in "kan hmai lam ah mi pakhat bike thawn lamzin zoh tu a tlan silom, tihphan ding a um lo, boruak a that lo cun in sim lohli ding" tiin in sawn. Nazi 1:30 sung hrawng motor kan to hnu ah khawte pakhat ih inn fate ah kan thleng. "Hitawk tiang hi kei ka tuanvo a si, hi hmun ihsi cu mawtaw dang nan to leh ding", tiah in sim.
Zan hnih kan riah hnu ah kan fehpi minung (5)pawl khal buai emem lee paisa nei nonlo in zan ruahsur lakah bek le ciar thliauthliau in an ra thleng ve thei ( kan zaten minung hleithum kan si ih, mi pariat kha kan lut hmaisa, panga pawl neta ah an ra lut tinak a si).
Zuk: hitin kan it khelkhi theu
Hitawk hmun ahhin Mon miphun nunau pathum le kawl mipa tleirawl mi pali khal an ra thleng ve. (Kan zate cun mi 20 kan um khawm tinak a si. Khawleng suahvak in siang lo ih, zunram thiarawk le bualawk duh caan ah cun mi pahnih pahnih ten nan thlun aw ding (an ekinn cu rura tak a si😁), inn sungah hin um ringring uhla sangka hi khar ringring ding a si, tiin kan driver pa cun thu in cah. Nikhat hrang mipakhat (rawl ei man le riah man) ah yuan30 (ks. 6500 hrawng) asiih sumpai a cem zutzo si ko. Inntekpa hi amah lawng um mi val senior ve nawn,( kan driverpa ih lamzin zoh sak theutu) asiih, amah in rawl in suansak theu.
Zuk: Inntek pa thawn
In hruaitu dg mawtaw hi ziangtik ah a ra thleng ding ti a rel theih lo. Kan umnak khua hotel ih umpawl khal police in an kai nasa tuk. Lamzin ah mawtaw ih feh lai pawl khal an kai cupco ti thu kan thei. Kan umnak hmun ihsin Fehsuak dingin tih thei kan nei lo, kirsal ding khal in lamzin a um fawnlo, ramri kha luh le suah a ngah hrih nawnlo ih, um bet ding in le sumpai kan nei nawn fawn lo, Pathian kutcak hngakin kan um cuahco a si bik thlang.
"Sumpai pek ding nan neih lo cun hi innte ah a lakin um a ngah lo, nan rawl le rawl hmeh ei ding ah nitin bazar a tul, sumpai a um lo cun tingaihnak a um lo" ti mi tongkam cun thin a ti nuam lo duh khop maiih, kan hei hmuhban mai ih um thlai ciin nak lam ih thlam tete kan thlir, kan cuan rero phah, khui lam ah saw feh sehla tha ke aww tiin thu kan rawn aw rero. Kan thlen zan ih kan driver pai' thu in cah mi "kawltong in miin an ra lo biak pang asile hinah hrawngih fu sat ding vekin rel aw uh" a ti kha hngilh lo in fu sahnak hmun khal kan kiang nai ah a um ko dingih culam khal cu thlen thei dandan a um ko ding. Tiin thu phunphun kan ruat rero.


By; Salai Bawisiamthar Sunthang
(Jianxi, China) June, 2019
PEH LEH DING...
No comments:
Post a Comment