“BAWIPA AH LUNGAWI UH”

 (Phil.4:4)

By, Kawhhran Duhdawtu

Minung hrangah lungawi ringring hi thil harzet mi a si, hnih ringring khal thil cang thei lo tluk a si. Hni hmukhmo thei ringring pawl tla cu mi hmukhmak (mi bangtuk lo) ah kan ret mai theu.

Hring mi kan nun hi, thah dingah caw rualrual an khor mi vekin vawn tahthim hnik sehla: zokhal in kan thihnak lam pan in ke kan pen rero cio cu asiih, nitin hin cui ni cu kan naih vivo a si. Caw khortu cun a caw khor mipawl cu pakhat te khal lam zin an pial ding a duh loih, a tum hmun tiang a khor vivo. Caw hrekkhat cu an ke a naa, an cauh zet khal ah cawl lo in a khor thotho. Kan hring nun khal hi kan duh khalah duhlo khalle a feh a cawl dah loih, mi hrekkhat cu nuam titakin, hrekkhat asile harsa ti zet cingin, asinan caw thau khal an rak thatih, a tawl deuh khal an thah thotho vekin, ziang tikah simaw cun kan nunnak cu a cem ve leh ding. Mi lian, mi farah, mifim le mi aa, mi cak le cak lo ti um loin kan caan net lam cu kan pan ve rero cio a si.

Zozo khal in harsatnak hi kan hmaiton theu ih, kanmah tawkten phurrit a nei cio mi kan si. A caancaan ah cun, kanmai fello, ti sual ruangah vansan\mangbang kan tong theu. A caan ah cun, kan tisual le fello ruang si cuang lo ih harnak tuarih kan theihawk caan khal a um theu. Zumtu ziangtlukih thlarau mi le tisa mi zokhal in hring nun lamtluan ih kan suhsonak ahhin harsat,mangbang le lung retheinak hi kan tong theu a si.

Jesu in, “Nannih hnatuan har zet a tuantupawl le thilrit a phurtupawl hmuahhmuah, ka hnenah ra uh, cawlhhahdamnak ka lo pe ding. Ka hngawngkol bât uhla, ka hnen ihsin zir uh. Ziangahtile kei cu minunnem le thinlung tăngdawr mi ka si ih, nan thlarau hrangah cawlhhahdamnak nan hmu ding. Ziangahtile keiih hngawngkol cu hman a hahdam ih, ka phur khal a zâng a si,” tiah a ti (MATHAI 11:28-30). Jesu hin phur nei loi umter in tum loih, kan hngawngkol in thlengter hi a tum mi cu a si. Apostle Paul khal in, Pathian ralthuam famkim in thuamaw uh tiah in ti. Ziangahtile leitlun kan nun sungah sual, thil tha lo, vanduainak, mangbangnak le harsatnak hi a hlo thluh dah lo ding. Pathian hin sualnakpawl hi kan hmuhban lo le thamban lo ah ret a tum lo, kanmah sawn hi sual tuah duh nawn lo le tuah nawn lo ih umter in duhsawn. Eden hmuan ah khan, Evi le Adam ih an hmuh le tham ban ah Ei sian lo theirah a ret hrim vekin, leitlun ih kan dam sung caan ahhin kan hmuh ban le tham ban ah sual, thil tha lo hi a um ringring ding. Zumtupawl hi Pathian thu ih kan humhimawk ringring a tul a si.

Kan duhdan vek siloin, kan remruah mi vek khal si cuang lo hin, kan parah thil duhum lo a ra thleng theu. Ti thei tawk suah in Pathian hrangah tiin, hna kan tuan, kan nung, kan caan tampi cu Pathian Kawhhran hrangah kan hmang liam rero, asinan harsat mangbangnak ihsin kan luat cuang lo, bulpak ah innsang ah le khawtlang khal ah mangbang, mitthli tlaknak ihsin kan luat cuang riai lo. A caan ah cun, Pathian le Kawhhran ngaihsak lemlo pawl khi an hmuingil sawn silosawm tiih, vun dawt zik mai caan tla a um theu.
Kan Bible in, Bawipa ah lungawiaipuangin um ringring uh, ka simsal ding, lungawiaipuangin um uh! (FILIPI 4:4), in ti, harsat, mangbangnak ih in cim buai khal le Bawipa ah lungawi aipuangih um ding tinak a si. Ziangahsaw Bawipa ih kan lung a awi thei theu lo? Kan lungawinak le hlimnak ih thumawknak a rak dik lo ruangah a si. Kan ton mi ruangah Bawipa thangthat nuam kan ti loih, kan paih lo theu a si kha. Innsak pawl in a foundation tha le uluk tak ih an tuah hmaisa lo cun ziangtlukih mawi khal an sak asile, a tlo loih rei a daih thei lo. Cuvekin kan lungawinak le hnangamnak hi poisa ah, khawvel thilri ah le hnipuan tivekih kan thumawk asile, rei a daih thei dah lo ding.
Zumtu cun kan lungawinak hi hmuh theih thil ah siloin, Pathian ah kan thumawk thiam ringring ding hi a poimawh nasa. Kan duhdan le beisei vek hlir in thil ra thleng lo khal sehla Pathian remruat ih kan thumawk thiam asile, nun hahdamnak, lungawinak in kan khat thei ringring ding. Kan hrang tha ding cu ziangkim thei thluhtu Amah Pathian in a thei bik a sisi. Ziangvek thil a parih a thlen khalih Bawipa ih a thumawk ringring tu cun Kawhhran innsang le kiangkap minung parah Vuivainak hrimhrim a nei dah lo. Kan thatnak dingih Bawipai remruat a si tiin Amen a ti thei ringring theu a si.