Tuluk ram, Mountin khua ih kan beunak innte sungih khumbeh awk ringring khal a nin um duh thlang nasa. Cuihleiah mi ngaihtuah zet vek an bang nan, umnak man sumpai pek ding neih lo cun an lung awi hmel hmuh ding a har fawn. Cutin rinsan ding kan neihsun Pathian hnenah zantin thlacamnak kan nei theu. Sumpai cu puk ding kan hawl ih kuat awk dan khal kan tawlrel ngah thei. Sinan kan sumpai ngah mi in rei a daih thei lo, a cem cingcing.
Zuk: kan beunak innte
Cuvekih thinhar le mangbang zetih kan umnak hmun khal ah cun Pathian in a kutcak le in ngaihsaknak cu kan parah a run langter. Kan driver pa hin in ngainaa ih kom in rak duh zet, an inn ah tla rawl ei in sawm. Driver a si vekin a fehnak( passengers a phurhnak) hmun ah tla voihnih khat in hruai theu. Anmah hi dawr kai ansiih, Beer do in tum theu nan ka in lo thu ka sim ruangah theiti in ding in pe theu. Cutin hitawk nan umnak pek ding le nan nei nawn fawn lo, hna tuan ding ka lo hawlsak mai ding mawsi in ti ih, keikhal in 'si e, a um um kan tuan ding' tiah ka sawn ve. Ka thinlungten thu phunphun ka ruat, aww Bawipa ka lungawi tuk, zianghman si lo mi kei hitiih ngaihsaktu in pek hi a va mak ve tiin ka mitthli a for.
Zuk: Driverpa phone be lai
Hna tuan ding mi, mi pahnih hrang a um, a caan le pathum tiin kan tuan sawng aw phahphah theu. Nikhat cu nan zatei tuan ding hna a um, tiin in sim ih.. zingpit ah kan tho inntekpa in pahnihpahnih in a bike thawn in thlah, Mawtaw tumpi ahhin thirsia kan ttin😁😁😁.. rawl ei caan ti lo cu cawlh a um mumallo, hmun so deuh ih hun thiarso a tul bawk siih ni le saa nawn cuh, ol lo zetsi. Zaan khawthim rual hrawngah kan theh thei, driver-pa mawtaw thawn a ra ih cau hnephnep in kan beunak inn ah in phur tlung. Minung pakhat ah zakhat cio kan hlawh ngah ih tihzia deuh. Sinan zakhat khal cun rei in daih thei cuang lo, ni thum hrawng cun a cem lala si ko.
Zuk: thirsia mawtaw ih tiin lai
Zaan khat cu kan leng ke, ra aw! Zanriah tla dawrah kan unau in kan ei tlang ding tiah in ra sawm ih, keikhal cun hleuhhli tiah kan rak thlun ve leh mai. Lamzin ah ka thuhla le ka kum zatpawl in sut ih thaten ka sim thluh. Ee, kei ai na nauhak deuh si cu ka uu tin in ko aw tiah in ti, curuangah tutiang kan biakawk caan ah ka uu tiin ka ko theu. Na hmel ah rinumnak ka hmu, hmailam ah nangmah thawn hna kan tuan tlang leh thei ka beisei khop mai, kawlram ah tla kum hnih thum lai ka um dah, nannih chin mi hi nan fel, ka duhzawng nan si, tivek leh a thuhlapawl tla tampi in ruah phah rero.
Zaanriah kan einak ding dawrah cun a makpa le rualpi pawl an rak um ruangah an kiangah kan va to ve. Beer le zu, saa thawthaw le ei ding a phunphun an hun aw tam khop mai. Cucu ei theih tapauh in ka thua ve nasa, beer inter in tum le kan driver pa cun thaten anih cu a in lo tiah in sim sak cingcing. An tong tam si, an aw le ring fawn ninum duh nasa, ka thin khal a nuam lo thup reuh khop mai. Ka rualpa cun Siipuazi thuhla kan rel hokhaw, nangnahte na duhduh kha rak ei rero men awla tiin in sim. Cutin rawl khawh in a rualpipawl ih mawtaw ah kan to cih ih KTV ah kan feh ta ding tiah in sim.
Khawpi sung a si ve ruangah mi tla an tam reuh nasa. KTV cu kan va thleng ih, gate kiltu le sangka kiltu pawl cu kan hmai ah an lu an rak kun, an kut in fehnak ding in sim. Cutin inntlun ah kan kai so vivo ih room pakhat ah kan lut. Tleirawl mipahnih an rak um ih an manager pa a ra thlen in thu an rel hnu ah, mi pahnih cu an suak sal. Beer a phapha le ei ding thil tete an run keng lut ciamco, cutin Karaoke sak phah in an nuam aw si bik ko.
Fala nonal taktak, mi panga hi an ra lut ve ih cupawl cun beer an ra in pi, hla an sak tlang. A ku, beer tauh ba.. tiin an kawltong thiam sun cun in lem rero nan, nga ma tauh buu... tiah ka sawn hai.. tu le tu zu le beer cu an cheer aw ih an in rero.. a caan le ding in an lam. Ka um hmun ih ka to menmen kha in hmu thei lo deuh si ding, ka ban in ra dir tho thul, a caan le zu in ra cheer thul.
Hmmm.. buaithlak emai ka tiih, ka hmai cabuai parih an hun mi cu, ka no khat in ka thlet aw ve ih in ra cheer le cui ka no sungih tidai ka thlet mi cu ka rak cheer ve hai ih cutin tu le tu tidai ka in rero ve. Khaizan kha cu tidai puar in ka puar hi si ringawt mai. Zaan khua a sim non thlang, an rii deuhdeuh, an beer le a phapha in an rak keng lut cingcing, tlun ka duh vio nan, mahte tlun mai theih ci si lo (kan umnak ihsin khawpi sung hi a hla ve nawn cuh). Cui sapbei ah kan driver pa in le "khavek fala in beer in aw an lo ti cun rak in ve thlang men aw.. na rit pang khal le zianghman phang hlah, hotel ah ka lo riahter mai ding. Tuizan cu kan nuam ding, hivek caan hi kan hmang khát zet hokhaw," in ti. Cucun ka thin a nuam lo deuhdeuh..
Thinlungten thla ka cam rero, "Bawipa hi dinhmun ihsin i luat ter hram aw, ka tuar thei lo ding tiang hniksaknak/thlemnak ka par ah thlen ter hram hlah, in bawm hram aw" tiin tu le tu Bawipa ka ko. Loh theih loin in iñ ter lole in tulh kha ka phang thlang si bik. Asinan ka ding lohli ih, ka hun lam pi ve hai, mangbang le hni phah in kan zaten kan lam dialdo😁😁😁.. driver pa in a mit i sin dupdo phah, a lungkim nasa ti cu a mithnai in a lang. Cutin caan a herliam ve vivo mai, inn hnuailam ah kan vung tum thluh ih hrekkhat an tlung.. kannih nigh club room ah kan lut bet lala. Zinglam nazi 2:00 kim cuahco, thawmvang ring leh thinnomlo, ihhmu thawn, inn lam ih rualpipawl in ziangtlukin saw in rak ngaihtuak ke aww ti ruat phah thawn ol cu ol lo ve si.
Sumpai cemliam mi hmuahhmuah kha a rualpi pawl in pe loin amah an pek ter thluh ruangah, lungawi loin a buai nasa. Tlun khal a duh nawn lo, kan suak lawk nan anih a lut kirsal cingcing security in an kham phahphah cutin rei nawn kan buai, Ka thin cu phu dupdo si ko. Lamzin ah a makpain in thlun, ke in kan feh, kir a tum cingcing, Kan hruai aw hnohno vivo. Kawltong in ka bia, kan kiangih um mi hi police motor a si hi tong hrih hlah tiin dimten i run sim. Huiha a va han thawven thlak lo thei em. A tawptawp ahcun amakpa ih rualpa cu mawtaw thawn a ra thleng. Cui mawtaw ah cun kan lut ih amai' mawtaw cu zinkap ah cun kan tanta. Kan beunak khawte kan thleng, an inn khal ah lut duh mai loin an inn hmai ih dawr fate ah in luh pi bet hrih lai, sa kio mi a lei kan ei rerolai ah a nu in le a ra ko hnuaihni lala. Anih le rii tuk, Na rualpipawl kha va ko thluh awla hinah thil kan ei hai ding in ti, hleuhhli dah ka tiih, ka pok cih vurvo, ka thil ton mi thil tha lo le thlaphaan um lakih ta in humhim sal ruangah Pathian hnen ah lungawi thu ka sim ih cutin hahdam ten ka it.
Curuangah dingih a ruatawtu cu fimkhur seh, culoasile a tlu pang ding. Mi zo cio par khalih a thleng mi siarlo nan parah sualfawrhnak a thleng lo. Asinan Pathian cu a rinum a si. Anih cun nan tuar thei lo ding mi sualfawrhnak nan hnenih thlenter a siang lo ding. Cuih sualfawrhnak nan tuar theinak dingah tlansuahnak lamzin a lo tuahsak ding.1 KORINTH 10:12-13
By; Salai Bawisiamthar Sunthang,
Jianxi, China
Peh leh ding..
No comments:
Post a Comment