NUN PHUN THUM

By, Elihu Hrinte

Rinnak rori in Tuluk ram ih Missionary hnatuan le mission dintu Hudson Taylor thuhla kan siar tikah mi nun a tham ih, amah vekih nung dingin mi tampi tha a pe. Cuvek thothoin cathiam sang si lo, Amerika rampi hmintertu, thlarau hlo a thawng a thawng ih runtu D.L Moody thuhla kan siar. Mirangnu cathiam sang lo, cawmtu khal nei loin thlarau hlo a lainat tuk ruangih Tuluk ram ih missionary feh, leitlun pi ih theih mi hung si Gladys Alyward-ih thuhla tla kan thei ih, kan siar. Santhar missionary cangvaihnak hmaihruaitu William Carey thuhla siseh, Amerika ram ihsin protestant ram dangih missionary feh hmaisabik mihuaisen, mituru Kawlram ih ra Adoniram Judson thuhla kan thei ih kan siar. Cuvekin Khristian miropi dangdang thuhla kan thei.. Hipawl hi nun sang zetih nungpawl an si. An thuhla theih hi a nuam ih, nun mi a tham zet. Nitin ih kan hmuh mi kan kiang kan kapih um milai nun zoh hnik sehla nunram bangaw lo zetzet kan hmu. Mi hrekkhat cu nun sang zetih nung, nehnak nun nei, Thlarau ih khat, lungawi le hlim thei ringring kan hmu ih, Khristian hrekkhat vethung cu lungawi nun nei lo, mi huat nei, phunciar, beidawng, phurrit tiaitiai ih um, mi relhmang tivek khal kan hmu thei. Milai hrekkhat lala cu sumpai rori atcilh, thlarau lam thu ruat lo lawlaw, tanghmasial nun hmuh ding an um lala. Bible sung kan zoh tikah leitlun milai hi phun thum um in kan hmu. Thlarau Thianghlim kaihhruainak in Paul in milai phun thum a tarlang ih cu pawl tla cu: Khawvel mi (natural man) 1Kor. 2:14, Thlarau mi (spiritual man)1Kor.2:15-16 le Tisa mi (carnal man)1 Kor.3:1-4 an si.

1.Khawvel Mi 
1Kor.2:14 Khawvel mi cu rundam si lo, piangthar lo a si. Pathian Thlarau amah ah a um lo. Khawvel mi ih sinak dinhmun langfiang zet pahnih a um. Cupawl tla cu:

(a) Khawvel mi cun thlarau lam thil a lawm lo, a cohlang lo (1Kor.2:14a). Bible in, " Khawvelmi cun Pathian Thlarau thilpawl a cohlang lo, ziangahtile cupawl cu a hrangah cun atthlak an si..". Tawng dangih kan sim asile, thlarau lam thilpawl cu a hrangah sullam nei lo an si. Anih cun thlarau lam thilpawl  “a thawtnak” a thei lo. Zingtei' tho ih thlacam, biakinn ih Pathian biakkhawm, rawlulh thlacam, bible siar tivek cu a tui lo lawlaw. Sermon rei deuh, khawm rei deuh khal a tlin lo. Khawm ding ih feh hiarnak khal a nei lo, Pathian ram hrangah tiih thawhhlawm pek khal a siang lo.
(b) Thlarau lam thilpawl a thei thei lo (1Kor.2:14b) “Cui thilpawl cu thlarau lawngin a thleidan thei ruangah a theih khal a thei thei lo.” Khawvel mi cun thlarau lam thu a thei thei lo lawlaw. Anih cu hi leitlun ih rung suak pek nausen in leitlun thuhla zianghman a theih lo vek a si. British ram ih sal zalennak tuahsuaktu William Wilberforce hi piangthar Khristian tha zet a si. A rual tha mino a kum 21 ih Prime Minister tuan William Pitt hi a pianthar ding a duhsak zet. Vawikhat cu evangelist Robert Cecil ih Crusade tuahnak ih va khawm dingin William Wilberforce cun a sawm. Evangelish Robert Cicil cun rundamnak thuthangtha tha tuk a sermon ih, rumdam si fiang khal an um hnuaihni.Wilberforce in an tlun lamah a rualpa Pitt cu, evangelist paih thusim cu ziangtin na ruat tiah a sut. William Pitt cun, " A thusim kha a thawk ihsin a cem tiang mitthep loin thaten ka ngai ih, ziang a sim ti ka thei thei lo lawlaw" tiah a sawn. Pitt cu mithiam, thluak tha tuk, mifim a sinan, thlarau lam thu cu a thei thei lo. Thlarau lam thilpawl cu thlarau lawngin a thleidang thei a si. thlarau lam thutak thei thei ding cun khawvel mi kha Thlarau a neih phawt a tul, a pianthar a tul. Mi pakhat in thlarau lam thil duhnak, hiarnak, thaw tinak a neih lo a si ahcun khawvel mi a si tinak a si. Khrih thawn pehzawmawknak a neih a tul. Rundam a si a tul. Rundamnak in thlarau lam thil thaw tinak, duhnak le theih theinak a run keng.
Peh leh ding…