Thuthan

KRBYM Music Album hrang July,24,2018 (Mon) zan ihsin hla zirkhawmnak nei thawh rero zo a si. Curuangah mino member zozo khal Zanlam 7:30 ihsi cun Biakinn lam pan cio uhsi!

Cule hmai Sunday(July.22,’18) ahkhin hla pawl kha studio lam ih kuat ding hrangah record curco thlang ding a si. Cutin a ranglam in thiam nal zauhzauh dingah kan zuam tlang cio dingih Recording-Studio lam pan in, 2018 sungih KRBYM in a tumtah mi Music Album cu hlawhtlinter lohli beisei a si.

MISSIONARY ELIHU VAN LAL HRIN TONSUHNAK

MISSIONARY  ELIHU VAN LAL HRIN  TONSUHNAK
(Date,22,2018, Sunday)

1) Vehvaitu: Hello, nan dam tha maw? Tuitum ah vehvaitu in biakkomawknak kan lo nei ngah thei hi kan lung a awi tuk.
- Hrinte : Um Pathian ih zangfahnak zarah kan dam tha ih, tu ti vekih vehvaitu tawnsuhnak in neihpi ruangah ka lungawi.

2) Vehvaitu: Missionary in ziangtikah khan nan poksuak ih, a lo thlahtu le ziangruangbikah saw hi hna ih na luhcilhnak san tvk.. in sim thei pei maw?
- Hrinte : Missionary ding in Jenuary ni 8. 2018 ihsin kan pawk suah hnu, ni 9.Jan.2018 zantim 12:30pm ah mission field cu kan thleng. In thlahtu hi Louiaville Chin Church (LCC) USA Kentucky ih um mi Kawhhran a si. (Kan theihawlsamnak dingah Pastor Thomas Suisan Lal ih Pastor tuan rero nak a si.) Hi hna tuan ding hin Pathian in boruak hmangin in rak ko. Cui boruak cu a zum hrih lotupawl hnenih thuthangtha va theihtertu ding ah nuam zetih a hnatuannak sungin kawhnak ka rak dawng.
( “Nuam zetih a hnatuannak sungin”  timi khi a nomnak hmun ihsin har deuhnak lamah tinak deuh si ko ti aw!

- si.. a umtuzia cu chinrawn level ih a zumtu ciapawl hnenih thuthangtha sim cu a rak nuam tuk ka tinak si.)

3) Vehvaitu : Tuih nan umnak hmun hi, khawitawk ciah saw asiih, ziang miphun saw an si?
- Hrinte : Tuih kan umnak hi Paku dei Okshitpin Myo asi ih, Kawl le Asu-Chin miphun deuh umnak hmun a si.

4) Vehvaitu : Pathian malsawm fanau nan nei zo ti kan rak theiih, na insang thuhla lam tiangin lo sut vivo sehla...
- Hrinte : Si.. Pathian thlawsuah in siarter mi a si. Kan fanu hmin cu Fibi Van Cer Mawi@Fibi Mawi ti asiih.. 5, May, 2018 zarhte sun ah pumkhuai in neih a si. Innsang dinhmun ah tlunlam ih in rak san sak mi inn ah thla ruk sung caan kan hmangih July thla in inn dang thawn-aw sal in thlaruk sung hrang sachuk tuah hrih asi.

5) Vehvaitu : Rawng nan bawl dan, ziangtivek in ke nan kar tivek teh in sim thei pei maw?
- Hrinte : Um, sim thei ding.. Rawng kan rak bawl thawk dan cu March thla thawk in "Love Summer English Class" tiin nauhak mirang tlawng in kan thawk ih cui sungah Pathian thu le hlapawl tla zirhawknak kan nei. May thla tiang..

6) Vehvaitu : Pathian rawng nan bawlnak ih har na ti bik mi le nuam na ti bik mi?
- Hrinte : Har ka timi bik cu phunhnam bangaw lo sinak hi a si. Cun nuam ka ti zet leh mi cu Pathian thu zik tluak vawn sim ngah hi a si.

7) Vehvaitu : Hmailam ke kar vivo nak ding hrangih na sunmang(tumtahmi) in ruah siang maw?
- Hrinte : Siang lutuk male.. hmailam ahhin Pathian in rem a ti asilen.. mifarah sin ding/fen ding neilopawl hnenih ti thei tawk ten an hrang peksuahnak le bawmnak tla nei thei ding hi kan tumtah mi a si. Cun Mirang tlawngte hmang khal ih sunzawm thei vivo ding tumtahnak kan nei.

8) Vehvaitu : A va ropi ve, A ram kauhnak ding le a sunlawinak ding hrangih nan tumtah mi Pathian in hlawhtlin ter hram seh!
Bible cang duhhleice/ kaihhnget mi tivek na nei maw?
- Hrinte : Amen! Aw hitiih vawn rel fukfi ding ah cun Rom.10:17 nak khi a si.

9) Vehvaitu : Pathian hna hi ziang mibik a si? Ziangmi kan tuah hin saw Pathian hnatuan kan si ding?
- Hrinte : Pathian hna hi mission hna asiih, tuan thu ah cun a hrang pumpekawknak hi asibik in ka hmu.

10) Vehvaitu : Kawhhran cak le caklo tahnak thabik hi ziang a si pei?
- Hrinte : Mission hna tuan le tuan lo parah asi ding.

11) Vehvaitu : KRBYM ih cangvaih dan le tuikum ih a tumtah mi Music Album ( tuih buai pit a si rero mi) thuthawn pehpar aw in rel duh na nei maw?
- Hrinte : Thu malte ka rawn rel hnik ding.. KRBYM cangvaihnak leh tumtah mi thu ah a tha lawlaw. hmansehla, khatlam ih ka rak ruah theu mi cu hmuh theih thil ah hin kekar can a tam a bang ka ti. Cun tuikum ih music Album thu ah cun ka tha a rak tho ciamco sal, in cawkphur zet. A saktu dingpawl in nun rorin sak suak hram hai seh law.

12) Vehvaitu : Hla lam thawn pehpar aw in lo sut sehla, zumtu pakhat hrangah Love Song hi ziangtivekin na hmu? Nangmah ah teh sual a si na ti maw?
- Hrinte : Sual ka ti lo, asinan pitling takin um pi sehla..

13) Vehvaitu : Missionary pakhat ih a thiam(neih) tul mi, tlinnak-pawl hi ziang mipawl an si tiah na ruat?
- Hrinte : Missionary tlinnak thu hi kan Bible ah a um lo ih, thlarau hlo veinak duhdawtnak thinlung hi a tulbik ding.

14) Vehvaitu : Hi Vehvaitu a siar rero laitu na minopi le kawhhran zapi hnenih thucah duh tivek na neih le..
- Hrinte : Aw malte ka nei.. Pathian hna na tuan cengmang len thungai thlak in tuan lawlaw aw. ziangahtilen Pathian thu na theihdan ih zir in Pathian in thu a lo then ding.

15) Vehvaitu : Vehvaitu hi ziangtivekin na hmu? (A thatnak/ duhthusamlonak na hmuh daan)
- Hrinte : Hi Vehvaitu ih vehvaihnak ca hi a tha tuk ih dam cak vivo seh. Duhthusamlonak cu KRBYM sung tuan ankaa hmuh ding a mal.

(Zangfahten, sungtuan anka na timi kha kan theithiam deuh loih in sim fiang deuh thei kem?

 – Committee member sung ihsin irawm suak thu siar ding a um tuk lo mi kha si)

16) Vehvaitu : Kan tonsuhnakpawl felfai zetih in leh/san saknak parah kan lung a awi zet. Dunglamih na kawhhran, na minopi dungtun loin, Thlatin deuh thaw mei hin Vehvaitu hmangin Pathian thu, thazang peknak thu thatha in hlawm theunak par khalah kan lung a awi tuk. A netnakah a rawng na bawl, na ren mi Bawipa in lo hmang vivo hram seh tiin duhsaknak kan lo hlan!
- Hrinte : Amen! Hi vehvaitu humhim ih thazang rak pe vivo tu zumtu si vivo dingah Pathian in malza lo sawm hai hram seh.

MI ROPIPAWL IH ANKA (13)

MI ROPIPAWL IH ANKA (13)

By; CerboihPa

1) A thabik kha beisei awla, a sebik tong ding khalin ralring cia aw!
Abraham Lincoln

2)Sia le tha theihnak hi minung hrangih rualpi rinumbik a si.
-Crabbe

3)Pathian um zumlonak hi minung thinlung hnakin hmur/ka ah a um duh sawn.
-Bacon

4)Thudik cu kha zet hmanseh, thuphan thlum zet hnak cun a thasawn thotho.
-Nikolai Ostrovsky

5)Sal lungput/ sinak kha nunpi hmaisa awla cuhnuah hotu si na thiam ding.
-Swami Vivekanda

6)Bible hi kan theihnak ti tamtu hrangih pek kan siloih kan nun thlengtu ding hrangih pek kan si.
-DL Moody

7) Pathian hrangih thil ropi zet tuah tumnak ah Amah Pathian a tello cun hlawhsamnak a si.
-John Edmund Haggai

8) Ka cak zet mi le tumtah mi bik cu Setan ih huat mi hmin-list lakih lang ding hi a si.

-Leonard Ravenhill

9) Mai' duhhrilnak Pathian hnenih hlantu cu Pathian in a thabik a rak hrilsak theu.
- Jim Elliot

10) Duhdawtnak tello in mi thil na va pe thei ko, asinan Peknak tello cun mi na va duhdawt thei lo.
-Amy Charlmichael

11) Miin in ral ding mi khi cu kan kham thei lo nan, midang kan va ral ding mi khi cu kan khamaw thei a si.
-Warren Wiersbe

12) Kawhhran hi mifel famkimpawl hrangih serhhran siloin, misuaksual/ mi fellopawl an feh khawmtheunak ding hmun a si sawn.
-James H Aughey

13) Nun remthatawk hi thansonak cu a si, famkimnak cu remthatawk ringring theu hi a si mei ko.
- Winston Churchill

DUHDAWTNAK

DUHDAWTNAK

 By, Kawhhran Duhdawtu

Minung ih kan tul poimawh emem mi pakhat cu duhdawtnak hi a si. Mi zokhal duhdawttu le duhdawtmi nei dah lo kan um a zum um lemlo. Duhdawtnak hi  rel dan phun tampi a um ko ding nan tui tumah cun Nulepai’ Duhdawtnak, Fala le Tlangval Duhdawtnak le Pathian Duhdawtnak tiin a tlangpi thu in, phun thum ten kan zoh tlang hnik ding.

(1) Nulepai’ Duhdawtnak
Himi duhdawtnak hi minung ihsi suak mi duhdawtnak sangbik a si. An ei ai, an sin le fen hrang hmuahhmuah hnakin fale hrangah an pe ih, fale ih tlinlonak le thatlonak hmuahhmuah khal tangdor le nunnem takin, an thatnak ding ruat le hngakin an kilkhawi theu. Duhdawtnak timi cu mi pakhatih duhnak hmuahhmuah tuahsak thluh tinak a si loih, tul mi le tlintawk ih a thabik ih tuahsak kha a si sawn. Fale in kan theih ban lo tiang khopin nulepa hin kan zawn in rak ruatih, a thawthaw khal ei ngam lo in an nunnak taktak ih  an duhdawt mi kan si. Kan siatnak ding an duhdah loih, kan hrang a thabikih in kilkhawitu cu kan nulepa an si.

(Cangantu amah rori khal fate a neih hnuah hin nulepa ih duhdawtnak hi a theifiang sinsin)

(2) Fala le Tlangval Duhdawtnak
Himi duhdawtnak cu minung ihsi suak duhdawtnak ah cun a cak zet mi le tihnung zet mi a si. Ningzah khal thei non loin mawi le mawilo thuruat thiam non lo tiangih ralthatnak pe theitu a si. Himi duhdawtnak ih mi a feh sual pang asiahcun damsung sirawknak le nunnak tiang hrang khalih tihnung zet mi a si. India ram khi leitlunih mahlemah thahawk tambiknak ram asiih, cumi ah fala tlangval karlakih duhdawtnak ruangih thataw an tambik an ti.

Billy Graham khal kha a thuhla an ngam mi ah, tlawng a kai laiah, a duh zet mi fala kha a duhzia langter dingah "Rose Pangpar " mawi emem a leiih, cucu fala-nu pek a tum, asinan fala-nu cun a rak cohlang duh  tariai lo mei. Cutin thinnuam lo zetin zinkap lihawng ah a pangpar cu a hlon hnuah, a rualpa Wendell hnenah hitin ca a hei kuat “ ka hrangah arsi ih mawinak hmuahhnuah an hlo zo, nun hlimnak ding ka nei ve non lo,”  tiin... nikhat cu Boston khawpi ah Crusade nei dingin a poksuak, crusade buaipitupawl a cibai vivo hai culai fangah a hlanih a pangpar pek mi rak cohlan sak duhlotu fala kha a hmu thutthi. Ziang khal tong loin daiten a ding ziarziar ih thinnuam lo le thlanti suak tiang khop in a thinlung a buai ve nasa.. ti a si.

John Wesley khal a rak si ve thotho an ti.. nikhat cu Bawipa zanriah a tawlrel(zem) laiah a hlanih amah rak hnawl zo tu fala kha a pasal thawn an rak khawm aw ve ih, Bawipa zanriah cu a zem kan  hai daih mei, an ti. Rel duh mi sawn cu himi duhdawtnak hi  kan hmailam caan hrangih thil thupi zet mi a si ve ruangah kan fimkhur a rak tul zet.

(3) Pathian Duhdawtnak
Duhdawtnak hmuah lakih thukbik le sangbik, ropibik mi a si. A tlunih nulepa, fala tlangval duhdawtnak cun cemni( tawk ti cin) a nei theu. Nulepa tampi cu an fale a huat ih hua saltu le ralaw zet mi khal an um. Fala le tlangval duhdawtnak khal tongkam kam hnihkhat men le thikthusiatnak ruang ah siseh, thil ho tete men ruangah a cuai le sal thei mi a si. Duhdawtnak cemni nei lo le a ropibik mi umsun cu Pathian ih in duhdawtnak lawng hi a si. Kan tlin le that, fel ruang si lo, kan phu lo cingin a duhdawtnak ruangah a fapa neihsun Jesu in pe(jn.3:16). Kan sual le that lo vekin in lehrul pang sehla cu zohman nungdam tlak kan um a zumum lemlo.

In duhdawt ti men lawng siloin, amah duhdawt le kan minung pi duhdawt dingah phut mi kan si (Rom.13:8-10; Mtt.22:37). Ral duhdawt dingin le leitlun hi duhdawt lo dingin Bible hmangin in sim fawn(Luke 6:35; 1Jn.2:15). Jesu leitlun ih a tlanlen lai ah khan a dungthluntupawl hnenah thupek thar a pe ih, cucu "pakhat le pakhat duhdawtawk ding" kha a si(Jn.13:34-35). Paul khal in " Duhdawtnak siar lo leiba neih a sian lo thu" Rom.13:8 ah ngan in a um.

Tulai leitlun kan thlir tikah kawhhran le khawtlang cu rello, mai' thisen zawm pi unau nulepa duhdawtaw taktak lo kan tam nasa thlang a bang. Cuvek cu zumtu ti aw fekfek lak khalah kan um hnuaihni men thei. John cun a cakuat mi 1Jn.4:20-21 ah hitin a ngan, “Zokhal Pathian ka duhdaw ticing in a unau a huatu cu thuphanper a si. Ziangahtile a mit in a hmuhmi a unau hman a duhdawt lo a si ahcun a hmuh lomi Pathian cu a duhdaw thei hrimhrim lo ding. Khrih ih in pekmi thukam cu hitiin a si: Zokhal Pathian a duhdawtu cun a unau khal a duhdaw ve ding.”

A Netnak Ah!

Duhdawtnak hi a va rak thupi tak em. Duhdawtnak umlonak hmunah cun kawhhran, khawtlang le sungkua a buai theu. Pumkhatawknak le remawknak a um theinak ding hrang khalah duhdawtnak hi a rak poimawhbik thotho. ICor.13:4-7  Duhdawtnak cu a thin a sau ih mi zangfah a thiam; duhdawtnak cu mi a iksik lo, tluang a khawng lo ih a puarthau fawn lo. Duhdawtnak cu nun hel-hlong in a nung lo, amah ih zawn lawng a ruat lo, a thin a tawi lo, cule tisual mi parah thinciin a nei lo. Duhdawtnak cu thil tha lo parah a lung a awi lo, asinain thutak parah a lung a awi. Duhdawtnak cu a bei a dong dah lo; ziangkim a zum, ziangkim a beisei ih ziangkim a tuar thei