JESUI’ SUAHNAK JUDA HNAM

By- Hngakbawih Pa

Judah nang cu na unaupawl in an lo thangthat ding, na ralpawl an hngawng in na kai ih, na hmaiah na unaupawl an kun ding. Judah cu Kiosa note vek a si. Sa a deh thluh in a relhnak ah a kir sal, a dokaw ih, a vawng bok sal. Zohman in an thang ngam lo. Siangpahrang fung a kengih, a tefa sinpawl cu uktu an si ringring ding. Miphun tampi in ngunkhuai an pe dingih, upatnak in a hmaiah an kun ding.
(Thup.5:5) Gen.49:8-10

Thuhmaihruai: Leitlun thuanthu kan hmuhban tawkte ih kan thlir tikah hruaitu ropi taktak, mihrat khawkheng, mi cakvak, mi cungcuang le huham nei tampi hmuh ding an um. Cubangpawl cu zoh sehla, an suahkehnak bulhram (nulepa) pawl kha mi nasa, mi hminthang le raltha an si deuh tlangpi a si. Siangpahrang fapa pawl cu an hawng pitlin tikah cun Siangpahrang an tuan deuh ngenge a si. Ziang a va si khallen leitlun hin kan suahnak(hringtu) nulepa mizia le sinak hi a tlangpi thu in kan zon in, kan thlun ciau cu a si. Kan Bible ih kan hmuh bangin, Jacop in unau (12) a neiih, cumi lak isin Judah khal an unau lakih tel ve mi a si. Judah hi Jacop in a duh lo sawn mi Liah thawi an hrin mi a palinak fa a si. Judah hi Jacop in a duhzet mi Rachel ih fa khal asilo ih, a suahkehnak thuhla ah cun, a unau dang hnaki, a sunlawinak le a ropitnak hranpa a um cuang lo. Suahkeh sinak lamah cuangmuar hleicenak nei cuang silo, ziangruangah saw Pathian in a fapa rundamtu Jesui suahnak dingah Judah miphun kher a rawn hrilnak san si ke ti hi ruah ding tampi a um a si. Kan Bible sungah cu mi ruangah a si ti cekci cun ngan a um lo nan, Judah i nun lamtluan thawi a pehpar ruangah a hnuailam ahhin kan zoh tlang pei.

1.A Hmin Sullam : Kan theih ciau bangin Judah cu Leah in a hrin mi Jacop ih fa palinak a si. Leah cu a pasal(Jacop) in a duh lo deuh mi sihmansehla, Pathian in a zangfah ih, ril ih rah fa (3) a neih hnu ah, fa (4)nak Judah a hawn nei hi cu a lungawi tukih Pathian in a thawsuahnak ropi tak in co tir a si tiah, tui tum cu Pathian ka thangthat ding tiin, JUDAH tiah a hmin a sak. Cuiruangah Judah i hmin sullam cu “THANGTHAT” tinak a si. Bible sungih mi thianghlimpawl cu an hmin sullam vek hin an nun khal hin a thlun theu. A hmaisabik ih kan hmuh mi cu Judah cu thangthat nun neitu a si cu, kan ni khal Bawipa thangthat nun neitu kan si ding hi a thupi tuk mi a si.

2. Kiosa : A tlunlam ih catlang kan tar bangin Judah cu Kiosa thawi tahthim mi a si. Kan theih ciau bangin, ramsa hmuahhmuah lakah a cakbik lawng siloin a ral khal a tha a si. (Thuf.28:1) Judah hi a nun lamtluan kan zoh tikah a hmaiih thil ti ding le tuanvopawl hi dungsip mei loin a tuahsuaktu a si. Zumtu kan nunah Pathin hmin ih kan ti ding mi tuanvo tete pawl tla hi har zet cing le paih lo deuh cingte khal in, raltha takih kan tuah suak asiahcun Judah bangin kan Pathian ih thlawsuah mi kan si ve thei ding.

3. Runhim Duhnak Lungput: kan theih ciau bangin Joseph cu a unaupawl in an hua tukih thah an duh lawng si lo, tihal rilrawng in a um kei, thi she ti duhah tikhur caar sungah an thlak. Cumi lai fangah Ismael sumtuahpawl  kha Izypt lam feh ding an kiang an ra thleng. Cutin Judah cun a unaupawl hnenah  kan nau Joseph hi thi dingin hi khur sungih tanta men cu a tha lo ding, kan thisen zompi rori asiih, cuhnakin Ismael sumdawngpawl hnenah zuar sehla, a nunnak kan hum ngah sawn ding tiah, zangfah lainatnak thinlung thawn a ti tikah, a unaupawl khal in ram an ti tlang ih, cutin Ismael sumdawngpawl hnenah an zuar. Hitawkih Judah nun ihsi kan zir thei mi runsuah tul an um tikah duhdawt zangfahnak thinlung thawn kan nun kan hmang asiahcun, Pathian lungawi zawng mi kan si thei ding.

4. Tuanvo Lakngamnak: Joseph cu Bawi upa a tuan hnu ah, a unaupawl a hnenah buh(fang) lei dingin an va feh ih, an tlun zawngah Joseph in an hnenah tuihnu nan rat sal asilen nan nautabik nan rak hruai pei, nan hruai lo asiahcun ka hmel nan hmu thei lo ding tiah a ti. Cutin buh lei dingih feh a tul sal tikah, an pa Jacop in an nautabik Benjamin hruai a siang loih an feh lohli thei lo. A netnak ah rawl ei ding an nein awn lo cuahco thlangih, Judah cun hitin- ka pa Benjamin cu kan hruai hrimhrim ding, a parah ziangvek thil khal a thleng asiahcun , keimah in a mawh hmuahhmuah ka phur theh ding tiah, tuanvo la in a ti tikah a pai lung a tongih rawl lei ding cun an pok thei. Judah ih nun kan zoh tikah an sungkua ei ding nei loih an thih thluh ding hnak cun ziangkim ah mawhphur ding in a nun a thap a si. Zumtu kan ni khal mai innsang le kawhhran ah a tul mi thilah tuanvo la ngamtu kan si a tul.

5. Thu Tlangkawmnak : Judah nun Bible ih a record mi lak ihsin malte kan laksuah mi kan zoh tikah a nun hi a ropi ih, Pathian thawsuah dawng tlak khal a si. Unau (12) lakah siangpahrang hrinhnam asiih, rundamtu Jesui suahnak miphun tiangah a rawng cang tariai.  A nun ih kan hmuh thei mi cu thangthatnak, ralthatnak, duhdawt zangfahnak le ziangkim parih tuanvo lak ngamnak pawl tla hi an si. Kan ni khal Judah bangih kan nun a hmangtu kan si ahcun, thlarau lam thlawsuah a dong mi le Jesui nun mi dang hnenih pe suaktu ah kan cang ding. Amen!