By; Biak Lawm Zual
Minung kan nun le thil ziangtinkim ahhin a deu (a lem) le a ngai (a dik tak) hi thlir thiam har khawp hin an feh tlang mawsi ti ding hin a um. Midang in kan parah a ngaingai si lo (a deu) in thil an tuah (cangvai) tikah, a thok ahcun lungawi um vek hin a lang theu nan, thil dik lo nanana cu a tang (tlo) loih, thuphan ah a cangsal theu. Kan biak Pathian in thil dik lo (a deu) a huat vekin, minung khal hin a duhtu zohman kan um a zumum lo. Thukam Thar sungi a deu (a lem) kan hmuh mi phun (4) tein zoh tlangnak kan nei pei.
1.Duhdawtnak Deu (Rm.12:9)
Kan lai Bible in a deu tiih a hman mipawl hi, tong hram lamah cun, depde, vervek, hrokhrol ti zawnglam hawi in hman deuh a si. Thinlung ngaingai ih duhdawt der si loih, an hnen isin ngah kirsal duh ruang le kan parih an rak that zo ruangih, duhdawt veki cangvaihnak hi a deu a si. Kan Pathian thu ih duhdawtnak ngaingai cu midang in kan parah zianghman thatnak an tuah lo khalih ngaihsaknak le thatnak langtir kha a si. Kan hmuh thei mi cu Pathian hnenah zianghman thil tha tuah mi kan nei lo nan, a fapa neihsun in pe mei a si. Kawhhran (Pathian) hna hnakin, mai taksa innsang hna kan ngai poimawh sawn asiahcun, Pathian kan duhdawt kan ti cu a deu (a lem) a si. Ahleice in falapawl hrangah nanmah lo duh ngaingai lotu (a deu) kha theithiam loih an hrangah nan nun, nan taksa le nan caan nan pe pang asiahcun, a taptu ding le a tuartu ding cu nanmah nan si. Duhdawtnak hi a deu (a lem) a um ti hngilh hlah uhsi. Duhdawtnak diktak cu thinlung thiang tei’ duhdawtawk hi a si.(I Pet.1:22)
2. Profet Deu (Mt.24:11; I Jon.4:1)
Kan theih ciau bangin Profet-pawl ih hnapibik cu thu phuan (thu rel) asiih, a ngaingai si lo (a deu) pawl cun an thusim mi vekin zianghman a thleng dah lo. Mi tampi cu tongkam thiam takmei i an hawn rel taktak mei cun thuphan(a dik lo) ti the icing khal hin an thu lungih, thlun(pom) mai hi ol tak a si. Ka ruah theu mi cu mai thinlungih um lo riai, a ngaingai vekih an rel (sim) zuahzo mai theu tla hi an ral a tha ka ti a si. Cuiruangah pulpit par isin mai nun silopi (mipi bumnak) cu kan rel loh rori a tha ding, cuti asilocun kan Pathian a ninghang pang ding. Hrekkhat cu thu tha taktak an relih, a ngaitupawl le an thusim theitupawl in, e he! A va lungawi um ve, a nun a tuah tha tum simaw, khawm a teima tum thlang ding a si hi tiah thazang laiih an um laiah, reltu cu nun danglam cuang lo, mipi bumnak, thuphan (deu) rak rel men pawisat nei lo kan tam tuk. Tongkam nem duangdo si, thinlung tha der silo, thil ho teih thinheng, ngol, hua mai nun tla hi a deu a si. Cuiruangah tongka (aw) nem duangdo hi a tihnung sawn tla hi a bang. Mai lung sungih um riai lo le tuah tum riai lo mi thu tha tak sim pawl hi cu Bible ih kan hmuh mi Jesu in a huat emem theu Profet deu (lem) vek kha a si.
3. Apostol Deu (II Kor. 11:3)
Kawhhran hmaisa (early church) san laiah hin Krih dungthluntu si ngaingailopawl, mahte lar duh ruang le hminthan duh ruangah Apostol veki thuthang tha simih rak vak an um. Cuvek mipawl cu Paul in, an rawngbawlnak a cem theinak dingah, thei patawp suahin a dodal thu kan hmu thei. Mai silonak pi si vekih um hi, kan Pathian thu in a duh lo zet mi a si. Tulai san khalah mai nun le sinak taanta ih lemcang (a deu) tampi hmuh ding an um. Thil poimawh zet pakhat cu mipa kan si ahcun mipa vekin, nunau kan si khalah amah le a mawi tawkin kan thuamaw ding a si. Tlangak in Utawng hmul a benaw ciamcoih Utawng vekin um tum khal sehla, a milaw thei loih a sinak dik tak cu Tlangak a si thotho. Cuveki mai silo mi vekih um tum cu a deu (lem) a si. Kawhhran khalah mai tuanvo le sinak thei in mawi tak le dik taki kan um asiahcun, thil ziangkim ah mi fak kan hlawh dingih, kan hlawhtling ding.
4. Nun Deu (James 3:17)
Nunnak ra suahnak cu sunglam (thinlung) in a si thu kan Bible in in sim a si. Minug hin ziaza (mizia) kan nei ciauih, cui kan ziaza cu nitin kan nun le cangvaihnak ah a lang theu mi a si. Mai nunih um lo mi le tlin lo mi tuah le langsuah tir tum cu thil atthlak le hartak a si thei. Kan nunih a ban lo mi le kan ti thei lo mipawl, mi hmuh ih fak hlawh duh ruangih kan cecang asiahcun a tawp (net) ah mualphonak a si hleiah, beidonnak asiih, cuveki um cu a deu (lemcan) men a rak si. Krih nun neitu kan si ruangah, nitin kan nunah Pathian thu thawi milaw in kan nung in, a hna kan tuan mai ding a si.
A tlunlamih kan hmuh bangin, midang kan duhdawtnakah thinlung takin, thu kan sim tik khalah hngawng tlunlam lawng siloin, nitin kan sinak veki nung thiamin, van nun neitu kan siih, van nun zirih nungtu kan siahcun ziangkimah kan hlawhtling dingih, Pathian thlawsuah kan dawng ding a si. Midangi fak hlawh duh ruangah a deu (lem) men cun nung hlah uhsi! Amen!
No comments:
Post a Comment