VANLAM THLIR IN

        Elihu Hrinte

Veikhat cu Poland lal pakhat a umih, cui lal cu raldonak lamah siseh, zohthim tlakin cawn tlak nun neitu a si. Sihmansehla can reiloteah cu pa cu a nunnak a liam. Cutin a fapa in a lal hna a run sunzom ih tlaksamnak le mi hnen ihsin sawiselnak pawl tla a tong. Mi tampi thinlung ah cun hi nauhak hin a pai’ lal hna cu a hlensuak thei ngai pei maw tiih ruahnak a um. Asinan hi pai nunnak in thil thup a rak nei, cucu a pai zuk a kol thup mi hi a si. Cui zuk a hmuh tinten, a pai ralthatnak le cawn tlak nun pawl tla a mang suak sal ringring ruangah, langhngan zetah zuk cu a ret. A pai zuk cu nitin a lal hnatuannak ih a thazang le cahnak petu hriamhrai thabik ah a rung cang.

Filipi 4:13 (KJV) -“cahnak i petu Khrih thawngin ziangkim ka tuah thei”

Cubangin kannih zumtupawl tla hi leitlun Setan ral kan donak ah, hi tlangvalpa vekin miih ziangsiarlonak pawl tla kan tawng tengteng ding. Cutivek caan ah a pai zuk cu a thazang le a cahnak ih a hman bangin kannih khal vanlam kan pai’ nun cu kan thazang le kan cahnak ah hmang cio uhsi.

MI ROPIPAWL IH ANKAA (10)

By; Salai Bawisiamthar Sunthang

1.Casiar hi thinlung(thluaklam) hrangah asiih, sawizawiawknak(exercise) cu taksa hrangah a si. Joseph Addison

2. Damsuang hmuahhmuah ih thahnemngainak hi, nun tlainak lamzin umsun a si. Theodore Parker

3. Dam rei le rei lo hnakcun, dam sung nun hman dan ding hi ngai thupit sawn ding a si. H.C Balley

4. Tleirawl lai caan hi nun dawngdah lai caan asiih, pacan lai caan hi nasatak ih tanlak lai caan a si, tar hnu lam caan cu sirawknak caan a si. Benjamin Disraeli

5. Pitar/Putar caan hi riahsiat umza a sinak bik cu kum upatnak lam siloin, nauhak thatsalnak sawn hi a si. Mark Twain

6. Nun hi thlirkirsal ih theihthiam theih mi asiih, hmailam thlir phah ih nun ding a si. Soren Kierkegaard

7. Kum thawngkhat khal dam sehla thi lohli mei ding cun ka ruataw thei cuang lo ding. William Shakespeare

8. Nung ding in ei awla, ei ding cun nung hlah! Moleire

9. Na fate cu Pathian lamzin na zirh lo cun, Setan in sual lamzin a zirter ding. Charles H. Spurgeon

10. Pathian tel loih nun cu khawlpat tel loih thil thit vek le penti um loih ca ngan vek a si. William D. Mounce

HNIKSAKNAK (TUARNAK)

Jame 1: 1-4

By; Elihu Hrinte

Hniksaknak hi zozo khalih kan tawn mi asi. Asinan kan tawn dan belte cu a bang awlo. A then cu a tumih a then cu a te ding. Tuiniih na tawn lo khalah thaisunah cun hi hniksaknak hi na tawng ve tengteng ding. Hi hniksaknak cu kil(4) in kan rel ding.

1. THU v.2 (a). Nun ih um hrimhrim mi asi. "Tikah" timi cang (2)nak ah kan hmu. A umtuzia cu caan ti thawn khal in sim a theih ding. Mirang bible ah cun (When) “tikah”  tiin kan hmu. Thimnakah (If) ti sehla, hniksaknak a rat asilen tiih leh a tul ding. Culawngsiloin ( If )asilen ti cu thu fiangfai asilo tinak asi. Asinan tikah (When) asiih ruangah, hi hniksaknak hi a ra tengteng ding tinak asi. Curuangah hniksaknak hi kan nun ih um mi kan tawn tengteng ding mi asi.

(b).Rin lo laiah.( rin lo piih thleng). "Tawn"or "Tla" ( khur sungih tla)luke 10:35-37sungih Jesu  tahthimnak cang30  “Mi pakhat cu Jerusalem khua ihsin Jericho khuaah a vung fehih, suamhmangpawl a tawng dukdi haiih” a timi ah, khatawkih “tawng” a timi kha rinlopiih thil thleng a si. Cun Apostol 27 nakih Paul cu Rome lam panin a fehnakih a tawn mipawl khal kha rinlopi ih thleng mi an si ve ding. Umtuzia cu, kan nunih a thleng tengteng ding thu ah ralrin pek cia a umlo ih, ralring cia ih um khal a theih lo.

(c).Hniksaknak hi aphunphun in ara. A phunphun or (Rawng dang dang). Daniel, Job le Joseph nun lamtluan hi tahnak ih a khat ve. Hniksaknak hi a phunphun in a ra. Damlonak, zatlaknak le thenkhat cu thihnak tiang tla a si. Zumtu kan nun ih a ra thleng ding mi hniksaknak cu aphunphun in a ra ding tihi hngilh hlah uhsi.

2 . SUAL RUANG IH HARSAT TUARNAK (Gen.3 ) Caan hrekkhat ahcun kanmah duhhrilnak ruangih kan tuah mi sual ruang khalih kan tuarmi a um. Ralrin tul ringring mi kan thlarau nun hi ralring thlang uh si. 3. THUNUNNAK HNIKSAKNAK . Heb 12. Pathian in thiltha kan tuah ve thlang nak dingah kan nun in nuai theu asi.

4. THUTHANGTHA KARHZAINAK DINGAH. PHI 1:12-13 1 Peter 4:14 = Krih vekih kan nun asiahcun Amah bangin kan tuar ve tengteng ding tinak a si. Pathian ruangih kan tuar asilen a tha (hlawk). "Aadoniram Judson" kum 33 sungah. Nupi pa(2) in an thihsan. Fa pa (3) a neiih mission ah an thi. Mission field kum (6) a um hnu lawngah zumtu pa (1) a ngah. Asinan, kum 30 hnulam ahcun, kohhran (63) zumtu (7000) tlun le Pathian hnatuan(163) a ngah a si. Pathian thu ruangih a tuarnak zarah thuthangtha karhzai in zumtu ziangmawtizat an rawng suak a si. Duhdawtmi zumtu ulenau kannih teh Khrih/ thuthangtha hrang ziang na tuan ve zo? Thuthangtha hrangah ziangtluk harsatnak na tawng? Cun Thuthangtha hrangah ziangsi sunral mi na neih ve zo? kan bulpak nun cio cekawk thar sal a tul nasa ding.
Caan tampi cu kan zumtupi, Pathian kan biakpi mi asilolen zumlotupawl tla simaw kan ngaihsak zet cingin annih cun in ngeihsak sak ve silo, hi tivek dinhmun ih kan thinlungnatnak le kan seherhnakpawl hmangin Pathian in a thuthangtha a karhzai ter thei tho fawn asi. Atu ah lang hrih lo khal sehla, nikhat nini ah a lang leh sal ding. Jame 1:2-4 Hniksaknak cu pitlin theinak dingah. Filipi 1:29 thil pahnih in pe = Greekword (2) in aum. 1. zumnak 2. Tuarnak. Hniksaknak cun kan zumnak ati cak ter.(v3) Cui hniksaknak cun tuaifainak nei thei dingin in suan hmin a tul. Cun hi tuarfeinak ah tlamtling or famkim zetin kan um theinak a si. Famkim ti sullam cu thlaraulam ih thansonak a si. Curuangah cang2 nak ah, hniksaknak a phunphun nan tawn tikah nan lungawi uh tiah in ti lo ih, lungawinak hlir ah ruat uh ti asi sawn. Ziangruangahtile Pathian ih in tuahsakmi (or) in pekmi laksawng a si. Thlaraulamih naute si ringring ding kha in duhsak lo. Kan nunih kan tawn mi hniksaknak hi lungwinak hlir ah ruat sawn uhsi. Pathian thuih kee na kar reronak ah, hniksaknak le harsatnak hi a phunphun ih tawng dingin na thinlungah timlam aw cia aw.

PAUL IH SEHERH MI

By: Deborah Hniang

Judah mipi pawl in thuthennak hmaiih ding an siangpahrang kha an rak theifiang lo. asinan a lal ram din dingih a ratsal tikah cun an rak tisual ti an theifiang thlang ding. (Rom 10:1) Paul in rundamnak a congah hnu cun, mai uanau, sungkua le miphun pi hi ruah lo a theih lo. Paul cu Israel miphun Benjamin hrin a si.

Amah cu Farasi le Hebru lak ih Hebru asi.(phi 3:5). Jews pawlih rundam situm dan khal Paul in a thei thluh. Cun Jews-pawl siseh, Zentel-pawl khal siseh Paul in a vei hai. Pathian in Israel-pawl cu a mi si dingah a hril hai zo. Paul khal apostol si dingah a hril ve zo. An pahnih te in Pathian remruat vekih hrilmi an siih, Paul cun mi hmuahhmuah thutak an theih ding a duh. Khrih hnenah thlarau hlo hruai duhnak thinlung kan neih atul. Paul bangin kan thinlung ih hiar mi le pathian hnen ih kan thlacamnak cu Jesuh sungih kan hmuh mi zumnak vek hi mi in an hmuh veih, cutin a zangfahnak maksak thawngin rundam an siding hi si ve hramseh!!!!!!

CUVEK CU SI

By: Cerboihpa

Voikhat cu khaw pakhat ahhin, ruahsur dingin an khaw pawh in hmunkhat teah thlacam dingin  an tongaw khawm. Asinan an lakih nauhak pate pakhat lawng “Thawng” kengin a feh.
Cuvek cu si, ZUMNAK timi cu!

Naute hi boruak ah hun sepso awla, a hni in a khek khekkho ding. Thlak loin na dawng sal ding ti a theih ruangah. Cuvek cu si, RINNGAMNAK timi cu!

Zaan kan ih zik tikah hin thaizingah kan tho sal tengteng ding ti zohman in kan theicia lo. Cuti cing cun zingpit ih in thangtu dingah Alarm(Nazi) kan kam theu. Cuvek cu si, BEISEINAK timi cu!

Thaisun hrangih thil ti ding mi kan rak timlamawk cia theu hi, kan parih thil ra thleng ding mi kan theih cia lo ruangah kan thulh phah dah cunglo. Cuvek cu si, RINAWKTAWKNAK cu!

Leitlun hi buainak ram a si, siatlam khal a pan vivo ti kan thei ko. Asinan nupi/pasal kan nei aw cupco lai thotho. Cuvek cu si, DUHDAWTNAK cu!

Kum (60) ih upa, putar pakhat ih kawr dunglam ih ngan aw mi cu: “kum (60) ih upa ka si lo, kum (16) ih nauhak si nacing in kum (44) tontehnak nei mi sawn ka si.” Cuvek cu si, THIL KAN THLIRDAN IH THUPIT ZIA  cu!

A DEU SI HLAH SEH

By; Biak Lawm Zual
 Minung kan nun le thil ziangtinkim ahhin a deu (a lem) le a ngai (a dik tak) hi thlir thiam har khawp hin an feh tlang mawsi ti ding hin a um. Midang in kan parah a ngaingai si lo (a deu) in thil an tuah (cangvai) tikah, a thok ahcun lungawi um vek hin a lang theu nan, thil dik lo nanana cu a tang (tlo) loih, thuphan ah a cangsal theu. Kan biak Pathian in thil dik lo (a deu) a huat vekin, minung khal hin a duhtu zohman kan um a zumum lo. Thukam Thar sungi a deu (a lem) kan hmuh mi phun (4) tein zoh tlangnak kan nei pei.

1.Duhdawtnak Deu (Rm.12:9)
Kan lai Bible in a deu tiih a hman mipawl hi, tong hram lamah cun, depde, vervek, hrokhrol ti zawnglam hawi in hman deuh a si. Thinlung ngaingai ih duhdawt der si loih, an hnen isin ngah kirsal duh ruang le kan parih an rak that zo ruangih, duhdawt veki  cangvaihnak hi a deu a si. Kan Pathian thu ih duhdawtnak ngaingai cu midang in kan parah zianghman thatnak an tuah lo khalih ngaihsaknak le thatnak langtir kha a si. Kan hmuh thei mi cu Pathian hnenah  zianghman thil tha tuah mi kan nei lo nan, a fapa neihsun in pe mei a si. Kawhhran (Pathian) hna hnakin, mai taksa innsang hna kan ngai poimawh sawn asiahcun, Pathian kan duhdawt kan ti cu a deu (a lem) a si. Ahleice in falapawl hrangah nanmah lo duh ngaingai lotu  (a deu) kha theithiam loih an hrangah nan nun, nan taksa le nan caan nan pe pang asiahcun, a taptu ding le a tuartu ding cu nanmah nan si. Duhdawtnak hi a deu (a lem) a um ti hngilh hlah uhsi.  Duhdawtnak diktak cu thinlung thiang tei’ duhdawtawk hi a si.(I Pet.1:22)

2. Profet Deu (Mt.24:11; I Jon.4:1)
Kan theih ciau bangin Profet-pawl ih hnapibik cu thu phuan (thu rel) asiih, a ngaingai si lo (a deu) pawl cun an thusim mi vekin zianghman a thleng dah lo. Mi tampi cu tongkam thiam takmei i an hawn rel taktak mei cun thuphan(a dik lo) ti the icing khal hin an thu lungih, thlun(pom) mai hi ol tak a si. Ka ruah theu mi cu mai thinlungih um lo riai, a ngaingai vekih an rel (sim)  zuahzo mai theu tla hi an ral a tha ka ti a si. Cuiruangah pulpit par isin mai nun silopi (mipi bumnak) cu kan rel loh rori a tha ding, cuti asilocun kan Pathian a ninghang pang ding. Hrekkhat cu thu tha taktak an relih, a ngaitupawl le an thusim theitupawl in, e he! A va lungawi um ve, a nun a tuah tha tum simaw, khawm a teima tum thlang ding a si hi tiah thazang laiih an um laiah, reltu cu nun danglam cuang lo, mipi bumnak, thuphan (deu) rak rel men pawisat nei lo kan tam tuk. Tongkam nem duangdo si, thinlung tha der silo, thil ho teih thinheng, ngol, hua mai nun tla hi a deu a si. Cuiruangah tongka (aw) nem duangdo hi a tihnung sawn tla hi a bang. Mai lung sungih um riai lo le tuah tum riai lo mi thu tha tak sim pawl hi cu Bible ih kan hmuh mi Jesu in a huat emem theu Profet deu (lem) vek kha a si.

3. Apostol Deu (II Kor. 11:3)
Kawhhran hmaisa (early church) san laiah hin Krih dungthluntu si ngaingailopawl, mahte lar duh ruang le hminthan duh ruangah Apostol veki thuthang tha simih rak vak an um. Cuvek mipawl cu Paul in, an rawngbawlnak a cem theinak dingah, thei patawp suahin  a dodal thu kan hmu thei. Mai silonak pi si vekih um hi, kan Pathian thu in a duh lo zet mi a si. Tulai san khalah mai nun le sinak taanta ih lemcang (a deu) tampi hmuh ding an um. Thil poimawh zet pakhat cu mipa kan si ahcun mipa vekin, nunau kan si khalah amah le a mawi tawkin kan thuamaw ding a si. Tlangak in Utawng hmul a benaw ciamcoih Utawng vekin um tum khal sehla, a milaw thei loih a sinak dik tak cu Tlangak a si thotho. Cuveki mai silo mi vekih um tum cu a deu (lem) a si. Kawhhran khalah mai tuanvo le sinak thei in mawi tak le dik taki kan um asiahcun, thil ziangkim ah mi fak kan hlawh dingih, kan hlawhtling ding.

4. Nun Deu (James 3:17)
Nunnak ra suahnak cu sunglam (thinlung) in a si thu kan Bible  in in sim a si. Minug hin ziaza (mizia) kan nei ciauih, cui kan ziaza cu nitin kan nun le cangvaihnak ah a lang theu mi a si. Mai nunih um lo mi le tlin lo mi tuah le langsuah tir tum cu thil atthlak le hartak a si thei. Kan nunih a ban lo mi le kan ti thei lo mipawl, mi hmuh ih fak hlawh duh ruangih kan cecang asiahcun a tawp (net) ah mualphonak a si hleiah, beidonnak asiih, cuveki um cu a deu (lemcan) men a rak si. Krih nun neitu kan si ruangah, nitin kan nunah Pathian thu thawi milaw in kan nung in, a hna kan tuan mai ding a si.

A tlunlamih kan hmuh bangin, midang kan duhdawtnakah thinlung takin, thu kan sim tik khalah hngawng tlunlam lawng siloin, nitin kan sinak veki nung thiamin, van nun neitu kan siih, van nun zirih nungtu kan siahcun ziangkimah kan hlawhtling dingih, Pathian thlawsuah kan dawng ding a si. Midangi fak hlawh duh ruangah a deu (lem) men cun nung hlah uhsi! Amen!

Editorial

January, 2018

Editorial✏
Kum hlun a liamih, kum a hung thar, ninu khal zanlamah a liamih zianglamah a hung suak sal theu.  Asinan caan kan hman liam zo mipawl cu an hawng suakkir sal dah ve nawn lo. Zianghmanlo menih kan tikcu caan kan liam ter men asiahcun sirawksal a thahnem nawn lo ding. Curuangah tuih caan kan hman rero lai mi hi man nei zetih kan hman ngah ding hi a thupi tuk.

Duhthusam lo zet mi kan nun kha remthatsal a ngah nawn lo. Thil tha kan rak tuah zo mipawl khal a lak menah cun a ziamral lo ding. Ci kan tuh mi cu a sia siseh, a tha siseh, pakhat te hman hrelh mi um lo’n, a tikcu te ah kan at leh tengteng ding a si.

Curuangah a liam zo mi kan caan zoh kirsal in, kan feh vivonak ding hmailam khi thlir phah in fimkhur zetin ke kan kar cio pei uh!

PATHIAN THU LAWNG

                         Elihu Hrinte
China ram then, Horbin Sizungpi ah cancer nat a rak tuar rero tu nu pakhat cu sumpai tam zet kengin doctor hnenah a nunnak run thei beisei in a feh. Cu nu cun doctor pai hnenah “sumpai tampi ka lo pe dingih, ka natnak i damter hram aw” tin zangfah a dil. Asinan doctor pa cun cu nui hnenah “na natnak hi a luar tuk zo ruangah ka lo damter thei lo ding” tiah a sawn. Culeveten, cu nu cu a thin beidawng zetin  mi tampi feh suksonak hmun Sizungpi hmaiah a ken mi sumpai hmuahhmuah a hlawn darh thluh ih hitin ring zet in a au..
Ziangsaw sumpai tampi neih hi a tangkainak!
Sumpai in harhdamnak a lei thei lo, caan a lei thei loih nunnak khal a lei thei fawn lo.

Hi thil cang mi a rak siarngahtu nang le kei khal, hi kan lei taksa harhdamnak hrangah, kan neih mi sumpai khal ui ding a rak um lo. Curuangah kan nun neitu Pathian hrangih kan caan, kan sumpai hman ngah ding hi man a nei bik.

Mtt. 16:26 – “mi pakhat in leilung pumpuluk co khal sehla a nunnak a hloh ahcun ziang thathnemnak so a um? Zianghman a thahnem lo, a nunnak kha zianghman in a lei sal nawn lo ding.”
James 4:14 – “thaisun ah ziang a cang ding ti nan thei lo, ziangahtile nan nunnak cu ziang a si? Nan nunnak cu caan malte sung a langih a hloral sal mi mero vek a si”
Isai. 55:6 – “ton a theih laiah Bawipa cu hawl uh, a nai lai ah amah cu ko uh”.

Kan nunnak hi a tawi tuk, kan dam kan cahnak hi man nei zetin hman a cu zo! Pathian hrang kan nun pumhlum pek caan a cu zo.

CINKEN TLAK AWMSUNG THU SUAK

Rev. Tha Nei Thio

1. Kawhhran zarto tumtupawl hi kawhhran vuivaitu an si theu
2. Pathian biakkhawm daithlang mi cun zetnat an neiih, Setan ih a zuam duh mi bik an si.
3. Sumpai ngaina tukle mi ropi si duhtukpawl in diknak an thlauthla theu.
4. Mai’ paihzawng lawng tuan le hlawknak ding lawng ruattupawl khi thlacam, Pathian biakkhawm le Bible siar paih lo mi an si duh.
5. Mi tirhfakpawl cun zohman ih theihpi lo in harsatnak thup an nei.
6. Na thinhar ruangah tuan loin um hlah, na tuan lo ruangah thinhar sawn aw!
7. Kan ei ding in petu in- cawm in ngam nan, kan ei dingih kan buai ruangah in cawmtu a cawl riangri.
8. Zalen ciocio ah Setan sal sung ihsi zalen a nuambik.
9. Nangmah le a nulepa bum dah lo lawng nupi ah nei aw!
10. Kawhhran hi na ta vekin tuanvo la awla, na bul ta ah ruat pang hlah.
11. Bible keng loih khawm le paisa keng loih Bazar feh a bangaw.
12. Kailawn cu kainak lawng siloin tumnak khal a si, Pathian thu kan zirih harnak hmun kan feh paih lo le na kai nan na tum nawn lo tinak a si.

JESUI’ SUAHNAK JUDA HNAM

By- Hngakbawih Pa

Judah nang cu na unaupawl in an lo thangthat ding, na ralpawl an hngawng in na kai ih, na hmaiah na unaupawl an kun ding. Judah cu Kiosa note vek a si. Sa a deh thluh in a relhnak ah a kir sal, a dokaw ih, a vawng bok sal. Zohman in an thang ngam lo. Siangpahrang fung a kengih, a tefa sinpawl cu uktu an si ringring ding. Miphun tampi in ngunkhuai an pe dingih, upatnak in a hmaiah an kun ding.
(Thup.5:5) Gen.49:8-10

Thuhmaihruai: Leitlun thuanthu kan hmuhban tawkte ih kan thlir tikah hruaitu ropi taktak, mihrat khawkheng, mi cakvak, mi cungcuang le huham nei tampi hmuh ding an um. Cubangpawl cu zoh sehla, an suahkehnak bulhram (nulepa) pawl kha mi nasa, mi hminthang le raltha an si deuh tlangpi a si. Siangpahrang fapa pawl cu an hawng pitlin tikah cun Siangpahrang an tuan deuh ngenge a si. Ziang a va si khallen leitlun hin kan suahnak(hringtu) nulepa mizia le sinak hi a tlangpi thu in kan zon in, kan thlun ciau cu a si. Kan Bible ih kan hmuh bangin, Jacop in unau (12) a neiih, cumi lak isin Judah khal an unau lakih tel ve mi a si. Judah hi Jacop in a duh lo sawn mi Liah thawi an hrin mi a palinak fa a si. Judah hi Jacop in a duhzet mi Rachel ih fa khal asilo ih, a suahkehnak thuhla ah cun, a unau dang hnaki, a sunlawinak le a ropitnak hranpa a um cuang lo. Suahkeh sinak lamah cuangmuar hleicenak nei cuang silo, ziangruangah saw Pathian in a fapa rundamtu Jesui suahnak dingah Judah miphun kher a rawn hrilnak san si ke ti hi ruah ding tampi a um a si. Kan Bible sungah cu mi ruangah a si ti cekci cun ngan a um lo nan, Judah i nun lamtluan thawi a pehpar ruangah a hnuailam ahhin kan zoh tlang pei.

1.A Hmin Sullam : Kan theih ciau bangin Judah cu Leah in a hrin mi Jacop ih fa palinak a si. Leah cu a pasal(Jacop) in a duh lo deuh mi sihmansehla, Pathian in a zangfah ih, ril ih rah fa (3) a neih hnu ah, fa (4)nak Judah a hawn nei hi cu a lungawi tukih Pathian in a thawsuahnak ropi tak in co tir a si tiah, tui tum cu Pathian ka thangthat ding tiin, JUDAH tiah a hmin a sak. Cuiruangah Judah i hmin sullam cu “THANGTHAT” tinak a si. Bible sungih mi thianghlimpawl cu an hmin sullam vek hin an nun khal hin a thlun theu. A hmaisabik ih kan hmuh mi cu Judah cu thangthat nun neitu a si cu, kan ni khal Bawipa thangthat nun neitu kan si ding hi a thupi tuk mi a si.

2. Kiosa : A tlunlam ih catlang kan tar bangin Judah cu Kiosa thawi tahthim mi a si. Kan theih ciau bangin, ramsa hmuahhmuah lakah a cakbik lawng siloin a ral khal a tha a si. (Thuf.28:1) Judah hi a nun lamtluan kan zoh tikah a hmaiih thil ti ding le tuanvopawl hi dungsip mei loin a tuahsuaktu a si. Zumtu kan nunah Pathin hmin ih kan ti ding mi tuanvo tete pawl tla hi har zet cing le paih lo deuh cingte khal in, raltha takih kan tuah suak asiahcun Judah bangin kan Pathian ih thlawsuah mi kan si ve thei ding.

3. Runhim Duhnak Lungput: kan theih ciau bangin Joseph cu a unaupawl in an hua tukih thah an duh lawng si lo, tihal rilrawng in a um kei, thi she ti duhah tikhur caar sungah an thlak. Cumi lai fangah Ismael sumtuahpawl  kha Izypt lam feh ding an kiang an ra thleng. Cutin Judah cun a unaupawl hnenah  kan nau Joseph hi thi dingin hi khur sungih tanta men cu a tha lo ding, kan thisen zompi rori asiih, cuhnakin Ismael sumdawngpawl hnenah zuar sehla, a nunnak kan hum ngah sawn ding tiah, zangfah lainatnak thinlung thawn a ti tikah, a unaupawl khal in ram an ti tlang ih, cutin Ismael sumdawngpawl hnenah an zuar. Hitawkih Judah nun ihsi kan zir thei mi runsuah tul an um tikah duhdawt zangfahnak thinlung thawn kan nun kan hmang asiahcun, Pathian lungawi zawng mi kan si thei ding.

4. Tuanvo Lakngamnak: Joseph cu Bawi upa a tuan hnu ah, a unaupawl a hnenah buh(fang) lei dingin an va feh ih, an tlun zawngah Joseph in an hnenah tuihnu nan rat sal asilen nan nautabik nan rak hruai pei, nan hruai lo asiahcun ka hmel nan hmu thei lo ding tiah a ti. Cutin buh lei dingih feh a tul sal tikah, an pa Jacop in an nautabik Benjamin hruai a siang loih an feh lohli thei lo. A netnak ah rawl ei ding an nein awn lo cuahco thlangih, Judah cun hitin- ka pa Benjamin cu kan hruai hrimhrim ding, a parah ziangvek thil khal a thleng asiahcun , keimah in a mawh hmuahhmuah ka phur theh ding tiah, tuanvo la in a ti tikah a pai lung a tongih rawl lei ding cun an pok thei. Judah ih nun kan zoh tikah an sungkua ei ding nei loih an thih thluh ding hnak cun ziangkim ah mawhphur ding in a nun a thap a si. Zumtu kan ni khal mai innsang le kawhhran ah a tul mi thilah tuanvo la ngamtu kan si a tul.

5. Thu Tlangkawmnak : Judah nun Bible ih a record mi lak ihsin malte kan laksuah mi kan zoh tikah a nun hi a ropi ih, Pathian thawsuah dawng tlak khal a si. Unau (12) lakah siangpahrang hrinhnam asiih, rundamtu Jesui suahnak miphun tiangah a rawng cang tariai.  A nun ih kan hmuh thei mi cu thangthatnak, ralthatnak, duhdawt zangfahnak le ziangkim parih tuanvo lak ngamnak pawl tla hi an si. Kan ni khal Judah bangih kan nun a hmangtu kan si ahcun, thlarau lam thlawsuah a dong mi le Jesui nun mi dang hnenih pe suaktu ah kan cang ding. Amen!

KRBYM C2 WINNER SALAI BAWISIAMTHAR INTERVIEW

(2017 A voi (2)nak le A Voi(3)nak KRBYM Hlaphuah Zuamawknak Ih Pakhatnak Lawmman Ngahtu Salai BawiSiamThar @CerboihPa Tonsuhnak)

1.Vehvaitu   : KRBYM C2 ah voihnih rori na zawnzawn ih winner sinnak na ngah ruangah kan lo lungawi pi zet. A hmaisabikah na suah kum, nilethla theih kan duh?
   Cerboihpa – Keitla ka lungawi nasa.. Kum 1989, January 27 ah ka suak.

2. Vehvaitu   : KRBYM C2 ah khan voihnih rori a pakhatnak na ngah zo sikhawh, ziangtivekin ha winner si thei dingin timlamawknak na rak neih?
   Cerboihpa – Hla phuah hi ka harsat thei ve zet, curuangah Pathian hnenah (zingpit biakinn feh caanah siseh inn ah siseh) thlacamnak thawn ka rak hlan ve theu. Cutin hla phuahsuak rori dingin keimahte Guiter thawn caan pe in (timlamnak tha tak ka neih hnu ah) ka zuam si bik ko.

3. Vehvaitu   : Zuamawknak ah a pakhatnak ka ngah ding tiin nangmah le nangmah ah zumawknak na rak nei cia dah maw?
   Cerboihpa – A pakhatnak rori cu ka rak beisei aw ciamco dah lo nan, lawman ngah ban ve cu ka rak tum ve theu nasa.. hhh

4. Vehvaitu   : Zuamawknak ih teltu in a thinlung put dingih tha na ti mi?
   Cerboihpa – Midang va zuam hnakin mahlemahih zuamawk hi a tha ka ti. A umzia cu midang va neh tum ciamco ( ti sual hai seuhla, keimah in neh keng, tvk..)  siloin mai’ ti that theibik suah ih kan zuam ding hi a thupi tuk ka ti.

5. Vehvaitu   : Avoi (2)nak KRBYM C2 ih Winner na sinak hla “Jesu A Ra Cing Ding” timi hin na nun ih umzia a neihdan in sim thei pei maw?
   Cerboihpa – Sim thei tuk e, a hla thu vek kha si ko, Zumtu cu vanlam thlirih kekar ding kan si vekin zumtupawl in hruai dingih a ra cing ding mi Jesu Khrih lawng hi kan ruahsan mi umsun a si. Himi hla hin nasa takin vancung ram in ngai ter. Kan duhdawt zet mi, in liamsan zotupawl ka ngainak khal a riam ter( in hnem) zetih leitlun kan um sungah ti thei tawkih Pathian hna tuan ding khal in thazang in pe zet a si. “Kumkhua in Jesu thawn kan leng tlang ding”..

6. Vehvaitu   : A voi(3)nak KRBYM C2 ih winner hla “Pathian Sunlawihtu  Mino” timi kha ziangtikah na phuahih, kha mi hla kha na nunnak takih na phuah mi a si maw?
Cerboihpa – “Pathian Sunlawihtu Mino” timi kha Dec.26.2017 zinglam nazi 11:00am - 1:00pm karlak hrawng ih ka phuah suak mi (Pathian ih in pek mi) a si. KRBYM ih uniform, kawr dunglam ih nganaw mi ka hmuh tikah ka thinlung in nasa takin thu i ruah ih Pathian a sunlawihtu mino hi kan no ringring lo ding sikhawh kan no lai caan te ahhin mi nautak meimei dingih, um ding kan si lo zia le zumtudangpawl ih zohthim tlak ih nung in kan nunnak taktak in Pathian sunlawinak langsuah ter rori a tul zia, ka nunnak ih a khat liam tuk ruangah ka phuah si bik ko.

7. Vehvaitu   : A pakhatnak lawman na ngah mi sumpai kha ziangtivekin na hmang?
   Cerboihpa – Hmaisa deuhih ka ngah mi lawmman kha thenhra thenkhat ka ret hnuah, ka nupi(cerboih-nu) hni ka lei sak. Cun keimai hrang khawmnak ih hruh ding mi kawr pakhat ka lei ve fawn. Culo cu mah bulpak le innsang hrang tul mi tete ah si ko. Cun neta deuh khal 1/10 ka ret hnuah nupi fanau nei zo ka si vekin innsang tultulnak ah si bik ko..

8. Vehvaitu   : Hla hi fing ziat hrawng na phuah zo ih phuah bet vivo teh na tum ko maw?
   Cerboihpa – Hla (Gospel Song) hi fing 6/7 hrawng cu ka phuah ve thlang, phuah bet thei vivo dingin ka zuam ih thla tla ka cam ve rero ko.

9. Vehvaitu   : Kan laimi hlaphuah thiam asilole hlasak thiam tampi lakah zo na uar bik?
   Cerboihpa – Tuvial ah cun phuah thiam bok, sak thiam bok, Evan. Biak Hlei Sum hi ka uarbik hrih ko.

10. Vehvaitu   : Zumtu pakhat hrangah Love Song hi ziangtivekin na hmu? Nangmah ah teh sual a si na ti maw?
   Cerboihpa – Himi thu ah cun a sual titui’ hrangah a sual(tha lo) dingih, a sual lo titui’ hrangah sual a si lemlo ding tiah ka ruat. Keimah ahcun minung le minung (mipa le nunau) kan duhdawtawknak le ngaiawknak cu hla in kan phuah, kan vun ngai le kan hun sak mi cu a sualnak um lem in ka ruat lo(A hmun le a tikcu thlir thiam cu a thupi zet ding). Kan Bible thaw khal in a milawk lonak ka thei hranpa lo. Ziangahtile Solomon hla tivekpawl tla khi minung duhdawtawknak hla hlirte an si thluh ko. Asinan luarkaituk (sex hiarnak hla tvk..) le mawi lo tuk tivek cu thuhran va si sehla..

11. Vehvaitu   : Na hla duhbik mi pakhat ten in sim thei pei maw?
   Cerboihpa – Hla duh mipawl hi a tikcu ih zirin an thlengaw vivo theu ih rundam si ka theihfeng thu “ KA THEIFIANG ZO”  timi ka phuah mi kha tulai cu ka duh deuh bik hrih.

12. Vehvaitu   : Hmailam hrangih na sunmang (tumtahmi) in sim siang maw?
   Cerboihpa – Hla lam thawn pehparaw mi lawng in aw!  Bible tlawng kan rak kai laiih ka rualpipawl (Hosana Group) thawn, tu hi Music Album tuah kan beisei ve zetih kan zuam ve rero lai. Cun KRBYM ih a tumtah mi Music Album suah ding mi khal Pathian sunlawinak ding hrangah cangsuak thei dingin ti thei tawkten kan zuam rero ko.

13. Vehvaitu   : A voi(4)nak KRBYM C2  tuah thei leh bang sehla tel thei na tum maw? Cun na zuam ve sal asile a pakhatnak teh na beisei hrih lai ko maw?
   Cerboihpa –  Umm.. Himi C2 hi ka hrang ah cun hlawknak ropi tak a siin ka thei. Curuangah C2 a um sungah cun pelh sian ci ah ka ruat lo. A pakhatnak lak kherkher cu ka beisei bik mi a silo nan zuamawknak a si pan hme lawmman lakban ve cu tum dan a si ual.. hhhhh

14. Vehvaitu   : Himi ca a siartupawl hnenah thucah duh na neih le?
    Cerboihpa –  Umm.. zumtu kan nunih, thupi zet mi thlacamnak hi daithlang loin,  Hlawhtlinnak hi Pathian hnen lawngah a um ti thei cingin ke kar cio uh si! timi  te hi si.

15. Vehvaitu   : Kan tonsuhnak felfai zetih in lehsaknak parah kan lungawi.
   Cerboihpa –   Keitla ka lung a awi zet.