TULAI KHRISTIAN

By, Elihu Hrinte

Mitampi cu khrih ah siloin khristian ah kan tang. khrih hmin sl ve si, amah hmuah neih duhsilo.ningnatnakle thinnatnakding fangih khrihhminsal (asilole) khrihih thinhengnak dingfangih khristian si ve men, Apawi tuk lawmmam!!! Paul in amiphun pawl seherh zet in ca akuatbangin,amiphun pawl ca akuatmi tl hi siar uhsi.piangthar silo piangthar vekihum, zumlotu hnak ih luar sawn sihi, riahsiat za asi. Kanmah sungih, khrih aum hnu lawngah nundan kan thiam ding. Khrih hiblamhmuhtu fang siloin amah hi lamzin cu asi.Amahhi thutak asiih vancunguknak khal asi. Khrih thlarau nunnei ngah lo tu pawl cun,an thluak le an ruahnak in anthei ih, hipawl nun hin pingthar pawl nun a ti siat rero theu.nunnei ngahlo cawmcawp nun cu beidawngmei theu. khrih in kan nun in remsak asimen lo. athar asimi amah a rungum asi.(Ezek 36:26) ah thinlung thar le ruahnak thar kalo pe ding ati.(1Cor 2:16) ah kannih cu khrihthinlung neitu kan si ati. Jesu in Setan nehzo ih aneh lai rero ding. kanmi nung sinak sungih pathian dodaltunun khi in nehsak zo ih,a lenglam ralkhal in do sak. Minunglam thazang in neh kan tumlo, Nehnak asimi khtih nehnak sawn in kan neh leh theu (John 16:33)

Kawhhran member hnenih theihter na duh mi, thazang peknak, na thinlungih helhkam mi, Pathian thu, titi thunuam le thu dangdang khal asile, Vehvaitu ah ca rak ngan dingah kan lo sawm.

THIKNEI PATHIAN

By; Salai Bawisiamthar Sunthang

Iksiknak le thikawknak hi thil bangaw zikte vekih lang, dang aw verver an si. Iksiknak cu kanmai’ thil/ta si lo mi, midangih thil neih mi va dawt lam deuh khi a si. Mi pakhat in Mawtaw mawi zet a neih mi asilole amah ih um mi talent le thiamhleicenak kha nang le kei thawn zianghman pehparnak um lo mi a si. Asinan miih thil neih mi le sinak kan rak thik le dawt ciamco kan rak lungawi lo asiahcun kan iksik tinak a siih, cucu sual a si. Thiksiatnak timi cu midangih thil/ ta siloin, kanmai’ ta a si rori mi kha midang hnenih a thlen tivek lam deuh ah khin a si. Kan nupi/pasal kha midang thawn nuamaw zetin rak um kualvel sehla cucu kan hmuh tikah kan thik tengteng ding mi a si. Kan nupi/pasal cu kanmai ta ansiih ruangah kan thik kha sual a si lo.

Exodus 20:5 “milem nan bia lo pei; a hmaiah nan lu nan kun lo pei; ziangahtile keimah  cu BAWIPA nan Pathian ka siih, thiik nei Pathian ka si.”  Biaknak, thangthatnak le sunlawinak hmuahhmuah cu BAWIPAi’ ta an si. Curuangah amah hnakih buaipi sawn mi, uarsawn mi, sunlawih sawn mi  kan neih caan a silole amai ta a si mi midang kan coter/pek tikah ah Pathian cu a thikthu a sia. Ziangahtile sunlawih, ropitnak hmuahhmuah cotlak umsun cu amah lawng a si.

ICor.6:19-20 – nan ruangpum cu Thlarau Thianghlim biakinn a si, ti nan thei lo maw? Cuih Thlarau cu nan sungah a um ih, Pathian ih pek mi a si. Nannih cu nanmah ih ta nan si lo, Pathian ih ta nan si. Man pekih lei mi nan si. curuangah nan taksa cu Pathian sunlawinak ah hmang uh. Kan thinlung, kan ruahnak le kan nunnak a zate in amai hrangih hmang loin, leitlun nomnak, kan taksa duhnak, tulnak le kan mai’ hna lawng buaipi in, kan caan kan liam ter caan ah khin kan Bawipa cun in thik ih a ning kan ti naa theu a si. Kan Bawipa hin kan nunah hmun a co lo pang maw?
Kan Pathian hi A thiksiatnak hnakin zahngainak a tum sawn ruangah hin a lamih kirsal dingin in ko ih amah kan pan theinak dingah caan tha in pe sal theu a si.  A rawngbawl/hnatuannak ah kan pe aw sinsin kei uh!

PATHIAN TIHZAH IH MAN NEIH ZIA

By, Rev. Than Fai

1.Pathian tih cu fimnak a si.
(a) Thuf.1:7 – Pathian tihzah cu fimnak hramthoknak a si. Miaapawl in fimnak le zirnak kha ziangah an siar lo.
(b) Thuf. 9:10 – Pathian tih cu fimnak hramthoknak a si.
(c) Mik.6:9 – Bawipa tih cu fim a si.
(d) Thuf.15:33 – Bawipa tihzah hi fimzirnak a si.
(e) Job. 28:28 – Fimnak neih nan duh asile Pathian tihzah uh!
(f) Sam. 111:10 – Bawipa tihzah cu fim hram thawhnak a si.

2. Pathian tihzah cu nun saunak a si.
(a) Thuf. 19:23 – Bawipa tihzah awla, na nunkhua a sau ding.
(b) Thuf. 22:4 – Tangdor in Bawipa tihzah awla lennak, upatnak le nunsaunak na ngah ding.
(c) Thuf. 14:27 – Thihnak ihsi luatnak na duh maw? Bawipa tih cu nunnak cerhti a si.

3. Pathian tihzah cu sualnak ihsin luatnak a si.
(a) Thuf.3:7 – Ka fim pam tiin ruat aw hlah, Bawipa cu tih awla sualnak tansan aw!
(b) Thuf. 16:6 – Bawipa tihnak in, mi in sual a fehsan  theu. (Mizo Bible)
(c) Thuf.8:13 – Bawipa tihzah cu sual huat khi a si.

4. Pathian tih cu thlawsuahnak a si.
(a) Sam.34:9 – Bawipa cu tihzah uh, amah tihzahtu cu tlaksam mi an nei lo.
(b) Sam. 115:13 – Amah tihzahtu cu a tum a sen in a thlawhsuah hai ding a si.
(c) Sam.31:19 – Nangmah a lo tihzahtupawl hrangih na khawlcia mi thiltha a tamzia cu.
(d) Thuf.15:16 – Bawipa tih phah ih malte neih hi, lian ih tihphang rero hnakin a tha sawn.
(e) Sam. 25:12-13 – Bawipa tihzahtupawl cun an fehnak ding lamzin an hnenih sin an zir thei ding, annih cu mi neinung zet an si ringring dingih an fatepawl khal himdam zetin an ram an luah ding.
(f) Sam.112:1-13 – Bawipa a tihzahtu cu mi thlawsauk an si. A thupek mi thlunih nomnak a ngahhtu cu, a falepawl cu hi ram sungah micakbik an si ding. Mitha ih tefa sinpawl cu malsawmnak an dawng ding. A innsang cu milian le sumsaw nei zet an si dingih an felnak cu kumkhua in a hmun ding.
(g) Sam. 128:1-2 – Bawipa a tihzahtupawl cu mi lungawi an si, a thupek vekih a nungtupawl cu, na hnatuan man khawpkham in na ngah ding, mi lungawi le mi neinung na si ding.

5. Bawipa tihzah cu himnak a si
(a) Sam.34:7 – Bawipa a tihzahtu cu a vancung mi inan kilih tihphannak in a run hai a si.
(b) Sam. 2:11-12 – Bawipa cu tihzahnak thawn rian uh! Thia le khur phah in a hmaiah kun uh, culole a thin a heng dingih nan hloral ding.
(c) Sam.115:11 – Mawi Pathian tihzahtupawl Bawipa cu rinsan uh, amah cu a lo bawmtu le a lo humtu a si.

6. Bawipa tihzah cu a lungawitertu a si.
(a) Sam. 147:10-11 – A lungawinak cu rang cak zetzet parah a um lo. A thinnomnak cu ralkap tha zetzet par khalah a um lo. Asinan amah a tihzahtu le a hmun mi a duhdawtnak a rinsantupawl  parah a um sawn a si.

7. Bawipa tihzah cu lom hlawhnak a si.
(a) Thuf. 31:30 – Bawipa tihzah mi nunau cu lom le porh tlak a si.

BIBLE SUNGIH HMAISABIKPAWL

By; CerboihPa

• Biaktheng din hmaisabiktu cu Noah a si. (Gen. 8:20)
• Bible ih Cherubim hmin lang hmaisabiknak bu cu Semtirnak. (Gen.3:24)
• Bible ih thalkah thiam hmaisabik cu Isamael a si. (Gen.21:20)
• Israel miphun lakih hmelthabik cu Absalom a si. (IISam.14:25)
• Bible ih Vate hmin lang hmaisabik mi cu Tlangak a si. (Gen. 8:7)
• Bible ih khawpi din hmaisabik mi cu Enok (Kain ih din mi). (Gen.4:17)
• Thenhra thenkhat pe hmaisabiktu cu Abraham a si. (Gen.14:20)
• Bible ih ruaitheh hmaisabiknak cu Abraham ih timtuah mi. (Gen.21:8)
• Mithi ruang tawih thei lo ih tuah hmaisabik mi cu Jacob ih ruang. (Gen.50:2)
• Bible ih hngawngtan(or hngawng thlai) hmaisabik mi cu Pharo ih sang tuah hotubik. (Gen. 40:20-22)
• Israel thuthentu hmaisabik cu Othniel a si. (Thut.3:9)
• Leitlunih micak hmaisabik cu Nimrod. (Gen. 10:8)
• Bible ih Music Intrument hmaisabik cu Tingtang. (Gen. 4:21)
• Bible ih ruahsur hmaisabiknak cu Noah sanih Tilik lai kha a si. (Gen.7:1-12)
• Israel lakih zunghruk bun hmaisabiktu cu Joseph. (Gen. 41:42)
• Tisun (Tikhur) hmaisabik Beer-Lahairoi. (Gen.16:14)
• Pathian hnenih thil hlan hmaisabiktu cu Kain. (Gen.4:3)
• Nunau lakih thilru(fifir) hmaisabiktu cu Rachel. (Gen.31:19)
• srael ramih milem biaknak Temple din hmaisabiknak hmun cu Shekhem. ( I Siang. 12:25-33) 
• Bible ih metfai aw hmaisabik cu Joseph. (Gen. 41:14)
• Lengai hmusuak hmaisabiktu cu Reuben. (Gen.30:14)
• Phir hring hmaisabiktu cu Rebekka. (Gen.25:24)
• Minung ran vulh mi lakih hmin lang hmaisabik cu Tuu. (Gen.12:25)
• Pathian in Izip ram a hremnak hmanrua hmaisabik cu thisen. (Exo.7:20)
• Europe ramih piangthar hmaisabik Lydia. (Apos.16:14)
• Kawhhran ih Missionary an thlah hmaisabik mi cu Paul le Barnabas an si. (Apos.13:2)
• Khristian Martar hmaisabik cu Steven. (Apos.7:60)
• Apostol-pawl lakih Martar hmaisabik Jeim. (Apos. 12:2)

JESU LE LAAK NOTE

 By; April H Boih
Minung zozo khalin ropitnak, sunlawinak, upatnak le tihzahnak pawl tla hi kan parih thleng cio dingah kan duh asi. Asina'n famkimlonak hmun leitlun ih um kan si vekin cupawl tla cu kan co ngah thluh thei lo. Cuti asile zumtupawl hin ziangtivekin sunlawi, ropitnak tla cu kan co thei ding..., a tluih Bible Bung cang kan tarlan mi ihsin zohtlannak kan nei ding. Kan Bawipa Jesu Khrih cu Jerusalem ah ropi zetin a lut a sikha. Cui tum ah Jesu cun laak note a hmang asi. Himi ihsin zumtu kan nunnak hrang thazang laktlangnak kan nei ding...

(1) Jesu Khrih ih duhdan 
Kan Bawipa Jesu cun Jerusalem ih a lut dingah zohman ih hman hrihlo mi laak note hman a duh asi (Mark 11:2 ). Himi ihsin kan Bawipa Jesu in mi thleidan a neihlo zia kan hmu thei asi. Bawipa in mi hman theilo a neilo asi, zovek, ziang vek na si khalah Bawipa cun a lo hmang duh asi. Laak note kha zohman ih to hrihlo a siih a sual ding maw? to a duh dingmaw? ticu theih cia asilo, asina'n Jesu cun hman a duh asi. Curuangah Bawipa cun tuih na dinhmun, na sinak vekin hman alo duh asi. Tuihlan ah kawhhran ah siseh Pathian rawngbawlnak ah tel dahlo, hman dahlo mi na si hmanah Jesu in zohman ih hman hrihlo laak note hman a duh vekin a hmin sunlawinak dingag Bawipa cun hman alo duh a si ti hi thei ringring hram aw! Curuangah Bawipa ih hman in duhlai ahhin a hman tlakmi si dingah thei tawk suahin pumpe aw uhsi!

(2)Jesu ih tonak 
( Mark 11:7 Jesu hnenah laak cu an rak hruaiih a parah an puan an dam hnuah Jesu cu a to.) Jesu cu Jerusalem lut dingih laak par a to hlanah dungthluntu pawlin Jesu' tonak dingah puan a dam ta ih cuihnu ah a to asi. Jesu ih tonak ding cu a faimi, a thianghlim mi a si a tul asi. Ziangahtile kan Bawipa Jesu cu sualnak neilo, a thianghlim mi a si ruangah, a to dingmi laak kha a bal mi, a thianghlimlo mi a rak si thei, curuangah dungthluntu pawlin a tonak ding ah puan a dam taih cutin a to asi. Zumtu kan nunah Jesu ih hman mi zumtu, a to mi zumtu kan si ding cun kan nunnak ih a thianghlim lo mi kan hmurka, kan tongkam, kan um tlan, kan ziaza pawl hi kan ralrin a tulih kan ti thianghlimawk a tul asi. Ziangah tile Jesu ih tomi/hman mi kan si cun kan sungih ummi sual pawl tla cu kan hrial a rak tul asi.

(3)Jesu' fehnak lamzin 
( Mark 11:8 Mi tampi in a fehnak ding lamzin ah an puan an phah, mi hrek in sawl an khiak ih an phah ve.) Jesu cu Jerusalem ih a lut tikah a fehnak ding lamzin cu mipi pawlin an puan an phah ih hrekkhat in sawl tla an rak phah asi. Mipi pawlih an phahmi cu laak ih a pal dingmi an si, ziangah laak ih pal dingah puan le sawl pawl cu a rak phah ti a sile a pal tu ding laak parah Jesu a to ruangah asi. Mipi pawl cun Jesu sunlawihnak ih an tuahmi a siko na'n a tomi laak khalin sunlawinak a rak co ve asi. Zumtu kan nun khalah cutivek thotho asi, kan tlintawk te le la theitawk teih Bawipa' hna kan tuan tikah kan mah minung dan ahcun zianghman lo te si hman ningla Jesu Khrih zarah sunlawinak kan co sawn a si. Bawipa' hna kan tuan tikah miih upat, tihzah tla Jesu khrih zarah kan co mi a rak si sawn. * Zumtu kan sunlawinak cu Jesu Khrih asi.

May, 2018

Editorial✏

Tuisun ni hi thaisun ih pa a si tiah ca pakhat ih ngan mi ka rak siar dah. A umzia cu, tu ih kan nundan, kan hnatuan le kan cangvaihnakpawl hi hmailam ih kan tefa le tu sin tiang hrang a rak si. Tu ah Leileh hnatuan a cuu thok lala thlang, bang zet le cau zetih hna tuan in pumcawmawk a rak tulnak san khal kan pu Adam ih cituh rak kan seng mi lakih mi ah a tel. Nunau nauhrin natnak an tuar mi khal Evi ih ruangah a rak si. 

Ci kan tuh mi cu kan at leh sal tengteng theu a si. Tu kan damsung, rei lo teih kan seng sal ding mi a umih lehhnu kan tesin fapawl ih an run seng sal ding mi khal a um theu. A se lam, a tha lam in kan tuah mi vek cekci kha kan parah a ra thleng sal ding a si. curuangah kan nun dan hi ralrin a va rak tul tak em.

Pathian hnatuannak ih kan pumpekawknak le teima zetih kan tuan bangnak pawl tla hi a lak a si hrimhrim lo ding. Kan damsungih kan seng mi, kan thihhnu vancung lamih kan hung seng sal ding mi  le hi leiih kan tefa ih an run seng ding mi tiin an um. Taksa ih kan tuah mi rori hi kan hmuh leh sal ding mi a si ruangah thiltha tuah hi ning hlah uhsi! Bawipai hnatuan cu a lak a si dah lo ti kan theih kha!