A SUAK CING DING

“Pathian Sunlawihtu Mino” timi Music Video, Khampat Revival Baptist Youth Ministry ih tuah mi cu a rei hlan ah a suak cing ding.

    Hi Album sungah hin hla fing (14) a um, Group song hla(1), Male-Voice hla(1), Trio hla(1), Duet hla(1) le Pakzai hla(10) tiin sak asiih, hla phuahtu le saktupawl hi KRBYM members-pawl an si. Cun, Music&Studio hi 3Amen asiih, Camera-man le Video Editing tuahtu cu Paradise VT Thang a si. Harmony saktu hi KRBYM le Mai Thian Nei Thiam an si. Tui 2018 kum December thla sungih suah thei an beisei thu le DVD pakhat ah ks.1000 a si ding thu KRBYM hruaitu pakhat cun a rel.
        Hitivekin kan Kawhhran mino in Music Album an tuah suak thei hi lungawi um za le hngakhlap-um za ngaingai a si. MTV a ra suah tik khalah thazang pe in a zuar le lei lam khal ah tan kan la cio pei uh tiah VEHVAITU hmangin kan sawm aw a si.

NUN PHUNTHUM

By, Elihu Hrinte
September, 2018 ta pehsal mi..

3. Thlarau Mi (IKor.2:15-16)
Cang 15 ih “asinan” ti umzia cu cang14 ih sim mi kalh in  ti asiih, a umzia cu thlarau mi cun tisa mi kalh rori in a nung tinak a si. Thlarau mi ti cu Thlarau ih luahkhat mi tinak a si. a nih cun Pathian lungawi ter ding lawng ruatin a tuah.
Thlarau mi cun thil ziangkim a thenfel thiam, “ziangkim” ti hi Pathian bangih ziang hmuahhmuah thei thluh tiih a rel mi siloin, 2:12-13ih a rel mi thlarau lam thupawl tla cu thlarau lam thupawl hmang in kan khaikhun tinak a si. A umtuzia cu thlarau lam thilpawl cu thlarau mi lawng in a theithei. ‘|henfel’ asilole \haten thei cang14b nak ih “a thleidang thei” ti thawn a bangaw. A tlunih ta thawn pehaw in thlarau mi cun thlarau lam thil ziangkim hi a theifiang thei a si. “zohman in” ti cu thlarau milopawl/leitlun mipawl relnak a si. Thlarau mi cangvaihnak le kekarpi rero mi cu thlarau lo mi le hi leitlun mipawl cun an theihthiam pi ban lo.

Thlarau mi cu nasa zetin a \hang
Thlarau mi cu pitlin nun lam ah a tlan. Annih cu khawmaw dingin, Bible siar dingin, Thlacam dingin, thuthang\ha tettikhan dingin, dik zetih um dingin thapek ih fawrh a \ul lo. Midang tha a va pe, thuthang\ha a sim, rawngbawl dingin midang a zirh, Khrih bangnak ah a \hang. Rah a rah, tam sin in a rah ih luangliam in a rah. Thlarau rah Gal.5:22-23 kha a nunah a lang.

Thlarau mi cu a nun dan a thianghlim
Tisa mi nun cu khawvel mi nundan vek a si lai ah, Thlarau mi cu Pathian hrangah a serhhran aw ih, khawvel ihsi khal in a serhhran aw. Paul bangin “khawvel hi ka hrang khenbeh a si zoih, keikhal khawvel hrangah khenbeh ka si zo” (Gal.6-14b) tiah a ti ve. Khawvel le a duhumnak cu a hrangah thinlung lapeng theitu a sin awn lo ih, khawvel le a thuneihnak khal thiltitheinak nei nawn lo ah a cang. A nunnak hmunram luahtu cu a Bawipa Jesu lawng asiih, a nun uktu khal a si fawn. Thlarau mi in nun dan thianghlim le danglam a neih theinak hrampi cu Thlarau Thianghlim ih a hlanawk pumhlum ruangah a si. Thlarau Thianghlim in zumtu cu Khrih bangnak ah a thleng rero ih Khritian nun ih nun theinak khal a pe.

Thlarau mi cu Bible vekin a nung
Thlarau mi cun thil ziangkim hi Pathian kamsuak thu thlalang ah hmangin a hmu thiam. A nun ram ih thuneitu  sangbik cu Pathian tongkam thu lawng a si. Bible cu a ke hrangah  Mei inn, a lamzin hrangah tleunak ah a hmang thei (Saam 119:105).

Milai NUN PHUN THUM  lakah khawi mi bik na si? khawvel mi siih na hmuhawk asile, Khrih thawn pehzomawknak dik nan neih a \ul, cucu piantharnak hi a si (John 1:12). Tisa mi siih na theihawk asile, Thlarau Thianghlim thawn pawlkomawknak dik na neih  a \ul. Tisa mi si cing cun thlarau nunah na \hang thei dahlo ding. Kan sinak hi Pathian hmaiah pomaw in rundamnak in timlamsak tui hnenah apaw ih Bawipa Jesu ih in tiamkam mi Thlarau ih khat zumtu nun ihsin a nungmi tiva luansuah theinak ding hi a si (John 7:38)

KRBYM C2 TUAHSAL DING

Khampat Revival Baptist Youth Ministry cun Composing Contest (Hlaphuah Zuamawknak) cu December,24.2018, zaan khawmban ah nei theisal dingin tawlrel sal a si.

Kawhhran members zozokhal, hi hlaphuah zuamawknak hi thazang pe in tel ngah cio kan tum pei uh. Ahleice takin mino member cin tla hi cu tel ngah tengteng dingin tu ihsi hla kan phuah thok a cu thlang a si.

Pathian sunlawinak ding le Mino Talent phorhsuah tumtah beiseinak thawn tawlrel mi asiruangah hlaphuah theilo rori na si hmanah na sumpai, na thlacamnak le na tongkam kam hnihkhat te hmang khal in tel thei rak tum \en\o hramaw!

Hminsin: Thuhla cipciar cu a tikcu khel in kan thanaw sal ding.

TUNGDING NON HLAH.

TUNGDING NON HLAH.

By, Kawhhran Duhdawtu
Joshua 6:26

Israel pawl in Jordan tiva kan in, Pathian thu vekin Jeriko khua cu Joshua ih ho in an do tikah an neh ih an kulh pawl khal Pathian thiltitheinak in a cim thluh. Jeriko khaw sungih an lal leh mi hmuahhmuah cu hlawhhlangnu Rahab le a innsang tilo cu an that fai thluh. Jeriko kulh cu tisiat thluh a rak siih, cutin Joshua in mipipawl hnen ah cun; “Hi Jerikho khuapi saksal a tumtu cu, Bawipa ih camsiatnak tong seh; Hi khuapi dinsal dingah khur a laitu cu, a fapa upa bik thi seh. Hi khuapi kotka pawl a tuah saltu cu, a fapa nauta bik thi seh,” tiah a ti.

Joshua in mipipawl hnenih a sim mi hi a thupi zet. Neta ah a rung thleng dik ngaingai ti khal kan thei cih fawn a si. I Siangp. 16:34 kan zoh asile; "Amah in Israel ram a uk sungah Bethel khua mi Hiel in Jeriko khua cu a din sal. Cutikah Nun ih fapa Joshua hmangin BAWIPA in a rak sim cia vekin Jerikho khua dinsalnak an thok tikah Hiel ih fapa upabik Abiram a thi ih kotkapawl an tuah lai ah, a fapa nautabik Segub a thi lala.
Jeriko tungdingtu cun a fatir leh a fa nautabik a can ti kan hmu a si.

Jeriko khaw kulh cim zo mi tundin sal hi zumtu kan nunah ziangtivekin saw kan lakluh ding timi kan zoh tlang hnik ke aw!
Kraws huham thiltitheinak hmangin kan minung hlun cu in thiatsak ih, keimah ih um sual thuneihnak Jeriko Kulh cu ti cim a rak si zo ta, cu mi ruangah cun Bawipa cu kan thangthat ih, kan sunlawih ve rero, “Na hrang lawngah ka nun ka hmang thlang ding” tiin, ti thei tawk teten a hna cu kan tuan ve rero theu. Sihmahsehla reiloteah kan Bawi Jesu ih dungthlun cu kan colhsan leh sal mai theu. Jesu in “zo khal dunglet hoi phah ih, lei a lettu cu Pathian uknak hrangah saitlailo asi,”  (Luka 9:62) tiin dung kan sipsan ding hi a siang lo. Dungsip santu pawl ih covo kan theihtheinak dingah “Lot ih nupi kha nan cing lai maw?(Lk.17:32) tiin in sim fawn a si. Sihmansehla Nahuma 1:11ah, “na sungin misual pakhat Bawipa dodaltu le midang thusual forhtu a suak zo” a ti bangin kanmah ih sual thuneihnak Jeriko kulh cu kan tungding sal leh theu a si.

Hitivekzawng khal hin vun rel sehla, mi piangthar, zumtu, Khrih ih ta a si zo mi pawl hi khawvel mipawl vekih kan nun sal tikah kan nun ah, kan innsang ah le kawhhran ah ziangvek harsatnak a ra thleng theu ti hi vun ruat sehla, kan harsatnak tamsawn hi cu Jeriko kulh cim zo mi kan tundin thar sal theu ruangah a si ko ding. Zumtu kan nun cu tangdawrnak thawn kan rak thok nan, reilote ah puarthau/hngalhngawnnak kulh, duhhamnak, iksikawknak,huatawknak le nun dawngdah/dungtolhnak kulh tvk kan rak tungding sal pang theu. Cuvek tungding saltupawl cu Pathian rawngbawlnak ah thahnemngai tak vekin tuan ve theu khal sehla cui rawngbawlnak cu a thi mi a rak si theu. Pastor, kawhhran upa, mino hruaitu le nubu lam hruaitu le members kan zate lakah teh hin cui kan nun ih Jeriko kulh tungding sal theutu hi kan va tam theu awm ve aw.
Aww, duhdawt mi, nang Pathian mitheih amah zum hngettu na nun hlun tisa duhnak thiah/cim zo mi tungding sal pang non hram hlah aw! tih a nung tuk…
source. internet

Harsatnak Kan Ton Caan Ah Kan Ralrin Dingmi Thu(10)

By, Salai Bawipi

Hello Vehvaitu & Members Nan Zaten Bawi Khrih Hmin In Cibai Ka Lo Buk! Thazang lak tlang cio sal dingin ka rawn sawm duh hmaisa bik ih, Pathian thu lam in ka run ngan lo dingih Leitlun kan nun, kan dam laiah "A tha Ding" ti ka ruah mi a si ruangah siar dan, ruat dan le lak dan thiam ding khal ka rawn dil duh bet.

1. Kan Thinnatnak Pawl Ruat Lo A ttha 
2. Kan Tuar Natnak Thawn Hmailam Kekar Lo A ttha  
3. Kan Hmuhton Mipawl Hin In Pit Tling Ter 
4. Ke Karkhat Kar Hnu Kar Non Ding Khi Țih Hlah  
5. Kan Hnațuan Mi Parah Țuanvo Lak Ngam A ttul  
6. Tu ih Kan Ton Mi Pawlhi Ka Ton Dah Hrih Lomi An Siih, Kan Ton Dah Nawnlo Mi Khal An Si.  
7. A Hlan Ih Kan Sual Mi Pawl Ruangah Thanau Loin Fimnak Ralrin Thiam Tertu Fimnak An Si Ti'n Lakdan Thiam A ttul  
8. Ziangtinkim Ah Ruat Hmaisa Hnakih (Tuah,Țttuan, ttong) Țttha Umlo  
9. Midang Pawl Ih Sual Kan Hawl,Ruat Rero Hnakin Kan Tuah,ttuan Dingmi Pawl Kha Tuah,Țuan Sawn A ttha. 
10. Khui Hmun Na Thleng Ruangah Keimah Lawng Ka Silo Tihi Cing Ringring Aw. ( tlangpi ah Khual Tlawn Tu & Nu le Pa, Sungkhat Unau Pawl Thaw'h Hmun Dangdang Um Tu Pawl) Asan cu na kiang ih um miphun dang, hnamdang pawlin Ziangvek Minung Na Si Ti'n Anlo Zohbih Ringring. Curuangah Cing Ringring Aw " I'm not alone, everywhere" Timi HI    A Siartu Nan Zate Tlunah Lungawinak Sim Cawklo Ka Nei. Pathian in thangso ter vivo hramseh Vehvaitu & KRBYM. 

ZUMTU IH NITIN KAN NUNNAK

By, April H Boih

Kumkhaw nunnak in pe tu kan Bawipa Jesu in zumtu pawl hi leitlun kan dam sungah a keneh thlun ding le a pa'i hna arak tuan bangin kan ti thei dan tawk ciarih a rawngbawl hna tuan ve dingin in duh ih a thil tha tuah vekin kan nih khal thil tha tuah ding kan si. In duhdawt vekin pakhat le pakhat kan duhdawtawk ding khal a duh ve ih mi thleidan a neihlo bangin kan nih khal thleidan neih ding in sianglo ih, a tangdawr bangin tangdawr dingin in duh ve a si. Nitin kan nunnak ih zumtu in kan tuah dingmi thupi (3) hmangin zohtlannak kan nei ding..

(1) Midang hrang mi thahnem(tangkai) si dingin

 Saam 133: ih kan hmuh bangin Hermon tlang le Zion tlang kan hmu thei ih, Hermon tlang hi ft(9375) ih sang a siih, Zion tlang hi ft(2550) ih sang a si. Hermon tlang cu Zion tlang hnakin a sang sawn bangin Hermon tlang ihsin daifim cu Zion tlang ah a rung tla ih cui daifim cu Zion tlang hrangah a thahnem(tangkai) zetmi arak siih cui daifim ruangah Zion tlang ih hrampi pawl cu an hring in an no mawi zetih minung hrangah le rannung pawl hrangah a thahnem mi le a tangkai zetmi ah a cang asi. Cubangin zumtu pawl khal midang hrangih mi thahnem kan si ding hi a thupi zetmi asi. Kanmah ruangah miin malsawm an dawn dingle an lungawinak ding asi ahcun kan tlin tawk teih thil tha tuah ding kan si. Kan mah ihsin asuak mi tawngkam khal midang hrangih ngai nuam le thazang a si ding hi a thupi zetmi asi. 

(2) Mi bawmtu si dingin 

Voi(1) cu pa pakhat hi suanmhmang a rak tawng ih an tuahmawh ciamco hnuah thi zikte'n an tan ta..cutin cupa cu bawmtu le tuamhlawm tu neilo in zin kapah cangvai thei loin harsa zetin a um ih, culai ah cui lamzin ah Puithiam pakhat a ra ih bawmnak a tul zetmi pa cu bawm loin lamzin dangin a pial san ta. Cui hnuah Levi mi a ra salih anih khal cun bawm duh loin lamzin dangin a pialsan lala. Cutin Samari pa ara salih cupa cun harsatnak a tuarmi le bawmnak a tul zetmi pa cu a hmuh tikah feh san mei loin duhdawtnak thinlung thawn a vun kai tho ih a kiangnai hmun pakhat ah fehpi in amah tuamhlawm nak dingah a thei tawk suahin thiltha a tuah asi(Luk 10:30-37). Nitin kan nunnak ah kanmah rori khal harsatnak tawng thei ringring kan si ih bawmtu kan tul caan a thleng tengteng ding. Cutikih bawmtu kan tul bangin mi harsa, mi tawntai pawlin bawm tul ih an um tikah feh san mei loin kan ti thei tawk te'n bawm le tuamhlawm ding kan si.

 (3) Tangdawrnak

 Luk 14:7-14 sungih kan hmuh mi cu farasi pawl ruai thehnak thu kan hmu thei ih cumi tum ah kan Bawipa Jesu khal a tel ve.. cutin inn sung an lut tikah dinhmun tha tonak tha ngah beisei in an cuh aw ciamco kha Jesu in a hmuh tikah hi tahthimnak hi a sim mi cu mi pakhat in puai a tuahnak ih alo sawm tikah tonak thabik ah va to hlah uh. Ziangahtile nangmah hnakih mithupi a sawm ahcun inntek pa cu na hnenah ra tahratin hi pa hi na tonak rak kian aw tiah alo ti asile ningzak zetin na thawn leh ding. Asinan anlo sawm tikah tonak niambik ah to awla inntek pa ara dingih ka rual tonak thadeuh ah hung to aw tiah alo ti ding. Curuangah milak kan tlanlen tikah tangdawr zetin nitin nun kan hman ding hi a tul zetmi asi.(Luk 14:11 Ziangahtile, zokhal amah le amah a cawisangawtu cu niamter a si dingih, amah le amah hnuai a dawrtu cu cawisan a si ding) tiah a ti.Zumtu in Bible kan siar ih zumlo tu pawlin kan nun in siar ti thei in ralring zetin nung cio ding kan si. ''Zumtu kan sinak hi nitin kan nunnak ah langter cio uhsi!"

Editorial

Oct~Nov, 2018

KRBYM ih “PATHIAN SUNLAWIHTU MINO” Album khal music le video a ttul mi hmuahhmuah cu October 2018 ah tuah fel ttheh a si zo. Cuvek tawlrelnak ah taksa, thinlung, thlarau le caan tampi pek a rak tulnak phah thawn, October, 2018 hrang VEHVAITU kan rak suah remcang man thei ta lo. Ziangasikhalle, ca siartu KRBYM members le kawhhran mipi zate'n, nan theihthiam/ngaithiamnak kan lo dil a si.
Tui ttum khalah lo lam hnatuan ttul, man lo zetzet cing ten, Oct-Nov, 2018 tiin thlahnih hrang cem in a ra suak thei sal hi a lungawi um nasa. Hmailam khalah ca ngan lam in siseh, ca siarnak lam khal in, teimak suah tlang vivo sehla, a tlamtlinlonak khal duhdawtnak thawn sim-aw in, ngaihsakaw vivo uhsi.
Kan ti thei mi zawn tete ah tan la tlang in, thazang kan pe aw sinsin pei uh!

KRBYM MUSIC ALBUM

Pathian lamhruainak thawngin KRBYM Music Album cu tuikum 2018 sungih suah thei beisei a si. Curuangah, October.4.2018(Thursday) ah khin 3Amen Studio lam pan in poksuak thlang ding kan siih kawhhran nulepa ulenau thlacamnak thawn \an kan la tlang cio pei uh! A hmun(Studio lam) ih ei le in a phunphun le thil \ul mi tete hrangah inntin nulepa nan kut sup lo ten,(kan pawhsuah zikzawng te khalah a ngah) Pathian sunlawinak ding hrangah kan neih tawktete ui loin kan thawh tlang cio kei uh!

Cun, October.1.2018 (Monday) zan ihsin Mino member hmuahhmuah hla cin dingin biakinn lam kan pan leh cio uhsi! A tikcu ah members a kim theibik dingin tel ngah thei zuam cio sehla, ready \hep\hep cia in tim kan tuahaw pei uh aw!

BUILDING COMMITTEE

Kum 2018, kum thok General metting thurel cat mi vekin KRBC Quarters cu tu ihsin kum nga (2018-2023) sungih saksuak thei dingin tumtahnak neih a si. Himi inn saknak ding hrangah ziangkim \uan\ul tawlrel le laireltu dingah a hnuailam mi vekin building Committee din suah a si;

Pa Lal Ro Lian (President)
Salai Van Hlei Thawng ( Vice President)
Pa Con Kip Thang ( Secretary)
Pa Catuan Remlal (Assist-Secretary)
Pa Za Biak Lal (Treasurer)
Pa Lal Biak Ceu (member)
Pa David Thang (Member)
Pa Bawi Khrih Nunthawn @Peter (Member)
Church Chairman (Pa Biaklawm Zual)
Church Secretary (Pa Laldik Vel)

Building committee, hohanak thawn cangvaihnak tla neih rero zo a si. Cuitlunah ramdang ih a um mi KRBC members-pawl khal an thla hrek hlawh cio Quarters saknak ih rak thawh cio ding khal in Building Committee cun hmalaknak a nei rero zo a si. Kil khat lawng siloin, Lamzin a phunphun in Bawipa hi kan rian thei a si.

PATHIAN IN ZUMTUPAWL HRANGIH LAWMMAN A TIAM MI

By, Marvin Thawng

Tuisan khristian kan nun dan le Pathian ih siter in duh dan thwn milaw lo zetin zumtupawl kan nung thlang cio a si. Pathian cun a rawngbawl hna hi taima zet le rinum zetih \uan dingah in duh ih, cui kan \uanman cu a lak siloin, lehhnu vanhmun kan thlen tik khalih kan sunlawinak ding tiang in sim. Curuangah zumtu ulenaupawl a hnuailam ih kan ngan mi pawl hi Pathian in zumtupawl hrangih lawmman in tiam mi pawl an si.

Khrih thawn nun
Pathian mithmai hmuh
Khrih ih sunlawinak hmuh
Khrih thawn sunlawih tlang
Khrih thawn thu\hen tlang
Khrih thawn uk tlang
Kumkhua uktu sinak
Dingfelnak lukhum
Sunlawinak lukhum
Nunnak lukhum
A siat theilo mi lukhum
Khrih thawn rocotu sinak
Ziangkim a cotu
Tleunak ramih mi thianghlim thawn pawlkomnak
Kumkhua rocotu
A siat thei lo mi rocotu
Lal ram
Hnin theih lo ram cotu
Arsi bang in tleu
Catuan a tleu mi
Kumkhua nunnak
Kumkhua in a hmun ding mi
Kumkhua daih vancung inn
Kumkhua daih khawpi
Bawipai lungawinak
Cawlhhahdamnak
Lungawi kimnak
Pathian ih kawhnak mansang zet
Vancung ih ro
Sunlawinak ropi

NUN PHUN THUM

                                                                            By, Elihu Hrinte

(Vehvaitu, Vol.25, June.2018 ta pehsal mi)
2.Tisa Mi (1Kor.3:1-4)
Tisa mi cu Thlarau Thianhlim cencilh mi, mi piangthar si ko nan, Thlarau ih uk lo mi, amai’ tisa ih uk mi zumtu a si. Tisa mi cu Khristian a si ko, ziangahtile Paul in cang(1)nak ahkhan “Ulenau tla” tiah a ko hai, zumtu Pathian fate kawhnak \ongkam a si. Annnih cu Pathian fa sinak an nei ko, asinan Thlarau Thianghlim thawn pawlkomawknak \ha an nei lo. An tisa duhzawng hlir in an rak nung a si. Hi tawkih Bible bung le cang in tisa mi ziazia a tarlang mi zoh tlang uhsi.

(a)An |hang Lo (1Kor.3:1)
Hi Korrinth zutupawl hi “Khrih ah nausen” an rak si lai hrih thotho. Hitawk ih Korinth zumtu tamsawn cu Paul amah rori ih thusimnak in kum(5) liamcia zo ih piangthar an rak si. Paul rori kha an hnenah thla(18) sung pastor a \uan. Pathian thuthiam Apollos khal an hnenah kum tam nawn pastor a \uan. 1Kor.1:12, ih sim danah cun, Korinth zumtu mi \henkhat tla cu Jesu leitlun rawng a bawl laiih a thusim mi rak ngaitu khal an um. Cutlukih Thlarau lam thutak ziktluak \ha dawngsawng an si ko na cingin, Khrih ah nausen an rak si hrih lai thotho. An san ah mifim, zirthiam le thluak \ha an um lo ruangah a si hrimhrim lo, tisa mi an si ruangah a si sawn. Khawvelnak in an nun a luahkhat hai ih, an ruahnak, an lungthin le an nundan cu khawvel dan hlir in a si. Pathian thu ngai asikhallen an nunpi loih, an hngilh lohli men, cuvek cu tisa mi nun dan a si. Tisa mi cu Pathian kamsuak thu cu ngai rero ko nan, a \hang lo. Nun \hannak a um lo mi cu tisa mi nun le ziaza a si ti, theih a \ha.

(b) Thutak ah an lung a Ruh (1Kor.3:2)
Bible cang dang Heb.5:11 in, Hih zumtupawl hi thutak ih an lung a ruh ruangah thlarau lam thutak an cohlang lo ti thu in sim. Thutak ngaithlak nan duhlo tiih sullam cu; muangcang, luhlul, hit tinak a si. Cuvek mipawl cu ziangkim thei thluh a si. ziangkhal zirh an theih lo, theicia thluh vekin an ruataw ih, thei thluhzo vekin a um. Hi thu cu hihlan ah ka rak thei thluh zo, tiin ngaithla duhlo in a to hmerhmer ding. Hi pa hnen ihsin thu thar zianghman ka ngah lo, in cawm lo, tivek \ong a hmang ding. Cuvek miih buainak thuthup cu Pathian thu Bible ih sim mi vekin nun an paih lo, Pathian hnenih hlanawk an paih lo. Cutin annihpawl cu lungruh zetin, thutak an hnong ih na nunpi lo.

(c) A Nunphung hi sualtuah in a Khawsa (1Kor.3:3a)
Tisa mi khristian cu sual neh lo, a pianthar hlan ih sual a tuah mipawl kha a tu khalih a tuah mi an si thotho. Paul in “ nannih cu tisa mi nan si lo maw” tiih a ti hai mi hi hminsin aw. |ongdang ih kan sim asile, hihlan ih nan nunih nan buaipi mi sual kha nan buaipi sal thotho a si lo maw? A tinak a si. kum(5) rei hnuah korinth zumtupawl in an nun hlun ih anmah uktu sual thawn an buai lai thotho, sual in a neh hai lai thotho. Hngalnak le iksiknak in nun mi a uk tikah, siatkhatnak le thintawinak neih theih asiloih, nan nun cu Thlarau Thianghlim siloin tisa in a lo uk tinak a si. Cucu tisa mi hminsinnak pakhat a si. Tuisun ah mizan sun ih sual na buaipi hrih lai thotho asile tisa in na nung, Thlarau ah na nung lo tinak a si. Hi vek nun thaw cun Pathian hrangah mal cirikte lawng \hathnemnak kan nei thei.

(d) Khawvel mi vekin a Nung (1Kor.3:3b)
Hnipuan hruk dan, ceiawk dan, nuam ti mi, titi mi le cangvaih dan tivekpawl hi zumlotupawl thawn a bangawk asiahcun, tisa mi a si tinak a si. Cui tisa mi cun pawisak a nei lo, Pathian biaknak ih tel lo khalah sidan kel, phuhrunawknak fate hman nei cuca cuang lo, khawvel mipawl thawn danglamnak pakhat hman um lo, tisa mi tinak a si.

(e) |henawknak (1Kor.3:4)
Zumtu in Pathian thu thlun loin, milai siseh, cangvaihnak siseh, pawlkom siseh, milai tuahcawp dan siseh, a thlunsawn asile, tisa mi tinak a si. Zumtu ih rinumnak cu Pathian ah le a Thutak ah siloin, milai par le pawlkom lam sawn ih a si le, tisa mi hminsinnak a si.

Na khristian nun cu thlarau nun \hannak  um loin, thutak ah lungruh in, nehnak nun nei loin, Pathian ih a huat mi thil lamah, nawmawknak nei sawn in, Pathian le thutak hnakin milai tlun, pawlkom le mai ruah dan, \ha tidan sawn ih na um asile, nang cu tisa mi na siih, Pathian lungthlitum thlengban lo zumtu na si tinak a si.

ZIR UH SI

By, Nu Lal Ram Muan

{Tu leh tiang Vehvaitu suak thei dingi lam in hruaitu Pathian ka thang\hat. Zohmanih theihpi lemlo i tikcu caan sunglawi pe in a tawlreltu nan zate hnenah thinlung takin lungawi thu ka sim, nan tuah nan \uannak kipah Pathian in lo thlawsuah hram seh!}

Kan miphun, khawtlang le kawhhran hin \ongkam mawi le \ha hi kan hmanglo nasa in ka thei, ningzahnak ah tla maw kan ruat lamlam a bang. Thufim 15:1 “awka nem in thinhengnak a daiter” a ti, thinhengnak hman a dai ter thei asiahcun mi lungawinak le thazang peknak \ha tak a si ngei ding. Mi hrekkhat cun kan lungawilonak le kan thinhengnak tla kan \ong suak hluahhlo \heu hi a poi zet. Cuti siloin ruat ciamciam ta in, ka \ong mi hi ka kiang i um nu/pa in ngai har a ti pei maw?\hathnemnak teh a nei pei maw?ti ruat hmaisa ta hram sehla a \ha zet ding. Cun \ongkam ngai nuam zetzet; ka lungawi, i ngaithiam aw, na ti \ha, na fel, Pathian in lo thawsuah seh, a dang tampi a um ko ding. Hivek \ongkam-pawl hi a \ulnak hmunah awka leng men siloin, thinlung takin hmang thei sehla a duhum zet ding. Mi hrek cun ka thiam lo kan ti, mi kawk le \ong hrang cu thiam tho siin, ziangkhal sisehla sunglam lenglam \hat le nem hi zir uh si, tum uh si. kan Pathian i duhdan khal a si, thungai ti ahcun zokhal in kan thiam a si, kan hman duh le duhlo ah a \hum aw sawn. Sungkua, kawhhran, pakhat le pakhat, kan fale khal siseh kawk an \ul caan ah kawk ding a si ko nain, an ti \hat mi lomnak hin an nun a tuah \hasawn a si. Mi pakhatkhat in thil \ha a tuah tikah lawm lemlo in kan um men nan, thil a ti \hat(fuh)lo vetecun sim lo le kawk ta lo cun um nuam remrem thei lo tla kan si \heu. |haten ruat uhsi, mi na kawk, nun na sim tikah, na rak lawm dah maw, duhsaknak taktak na nei maw, cekaw ta aw!

Thil ropi le thil \ha tamtak kan tuah thei ti theiin, ziangvek thil harsa kan tawn khal le beidawng ding kan si lo. Beidawnnak cun hlawhsamnak ah mi a hruai i, beiseinak cun hlawhtlinnak ah in hruai ding ti hngilh loin,  Mai Far Men Par ih hlasak mi ah “sui le ngun hnakih khungsawn nutling si ka duh” a ti bangin kan duh ve lo ding maw?

NulePa : fale hi taksa, thinlung thlarau lam ih an pitlin theinak dingin kaihruaitu dingah Pathian ih pek mi kan si. Harsatnak tampi kan tawng ko ding nan, an beidawng ter ding cu a siang lo a si. Pathian i din mi kan si ruangah in semsuahtu Amai’ thu kan sim kan relpi a \ul. Leitlun damsung reilote thil lawng siloin, kumkhua daih thil sawn hi thlauthla pang hlah uhsi. Nulepa kan si ruangah in \ihzah upat ding lawng ruat loin upat tlak, \ihzah tlak i kan um a \ul. Pathian nung bia kan si vekin Pathian in hmun a colonak innsang cu a nuam taktak thei lo. Fale in kan thu an thlun lo, ngaipoimawh lo tikah kan thinheng, kan ning a nat vekin, kan Pathian khal a thu kan lun lo tikah a ning a na a si.

Falepawl: nulepa hi kan duh hril siloin Pathian lairel sawn a si ti thei in, in duhdaw zet a si ti rinhlelh lo a \ha. Nulapa zahpi le ziangsiar lo i um cu mahlemah thlakniam awknak a si. Felte ih na um asiahcun, nangmah lawng siloin na nulepa khal, mi ih fak le lawm kan hlawh ih kan hmai a hngal. Mawi lo takih nan khawsa asile mi ih mawhthluk kan si i, nupa karlak ah na fa nun na sim(zirh) lo tiah mawhthlukawknak a suah ter. Nulepa khaisang le thlakniam theitu mi pawimawh na sizia thei in, ralring takin fel tak le Pathian \ihzah ten nun hmang hram aw! Reipi na no lo ding, na cak ringring lo ding, ti ruat thiam awla na sirawknak ding thil zianghman tuah hlah. Na keh le na vorh ah sualnak in a lo kalh ti thei in lamzin dik zawh ding cu a tum i tum rori a \ul a si. Tu ih na nun hman rero mi kha na fa ih nun hmandan dingah \ha na ti maw?, tu ihsi na ruah a \ul. Pathian hna hi amah duhnak thinlung thawn an ti theitawkin \uan aw, na sir aw lo ding, na lung a awi ding, na di a riam ding.
Ngantu le siartu kan zate parah Pathian in thlaw in suah  hram seh! Amen.

JESU KHRIH LE KHRIH JESU

Is There a difference in meaning between Jesus Christ and Christ Jesus?

By, CerboihPa

Jesu Khrih le Khrih Jesu timi ah danglamnak a um maw?

#Jesu (Rundamtu) timi cu Pathian Fapa, Mary fehtlangin minungih a rung cannak, a lei lam hmin a si.
#Khrih (messiah-hriakthih) cu a sinak hmin (title) le a Pathian sinak hmin a si. Thukam thar ngantu hrekkhat in a minung hmin ret hmaisa in Jesu Khrih tiin an ngan theu (e.g. Jude 1:1), hrekkhat lala ah cun Khrih Jesu tiih ngan a si (e.g. 2Tim.1:1). Mi tampi cun kan theithiam hranpa cuanglo men thei, a umzia danglam ciamco tuk dingah tla kan ruat men thei. Kum zabi hmaisa lam ah khan mi hrekkhat in Jesu ih minung sinak an rak pom lo ih hrekkhat lala in le A Pathian sinak an rak hnol lala dah zo.

Țong fehphung tampi ah, cafang(word), thuhlawm(phrase) le catluan(sentence) remkhawmawk dan ihzir in an rel uar tum(duh) mi a theihtheih mai theu. A hleice in tong fehphung (Grammar) lamih lian zetzet, Hebrew, Greek le English pawl tla cun an hmang uar thei zet. Kan theih lar zet mi pakhat, USA paisa ih cuang(lang) 'IN GOD WE TRUST' timi tla khi an tong(English) fehphung diktakih remkhawm ding ahcun, We Trust In God, (We-subject, Trust-verb, In God-object) ti ding a si. Hmansehla, a titu We hnakin object ( a dawngtu) God-Pathian an ret lal sawn ih, an ret ropit duh ruangah subject hmai ah an ret sawn tinak a si. (Kan chin(falam) țong fehphung ihsi cun relfeng (theihthiam) a har deuh men thei)

Filipi 2:5 ah Paul in Khrih Jesu tiin hram a thokih, cang (11) ah Jesu Khrih tiin a cem ter. |ongkam dangih kan rel feng ding cun, a vanlam hmin, Pathian a sinak hmin a ret hmaisa ih cumi cun Pathian minungih a cannak thu a hai lang. Cun a cemternak kha minung a sinak ihsin Pai' hnenih a kir sal thu, lei ihsin van ih a kaiso thu a nemhnget fawn a si. Apostles dang vek siloin Paul hin Khrih Jesu tiin a hmang uar sawn theu, a hman san bik si dingih lang cu minung taksa dan takih Jesu thawi an lentlang ngah ve lo ruangah tla a si men thei. Kum thum le hrek rori a dung rak thluntu John cun a minung sinak a theihfeng ve tuk ruangah si ko ding, Jesu Khrih ti hlirin a hmang.

A umzia cu Jesu ih minung sinak rel uar le hmang uartu cun Jesu Khrih tiin an ngan ih a Pathian sinak rel uartu cun Khrih Jesu tiin an ngan tinak a si. Ziang a va si khalle, Jesu cu Lal(Bawi) asiih, Messiah(Hriakthih) a si.

Hram. GotQuestions.org (internet)

Editorial

 September, 2018
Vehvaitu, Vol.28

Editorial✏
Leitlun ah cun milian/farah, mi tum/mi te, hmelsia/hmeltha, kan dinhmun ihzir in thleidanawknak hi a um theu. Cumi cu thil țha lo zet le duhum lo tuk mi a si. Asinan van hmun kan thlen hlan tiangin a um vivo ko ding. Famkimlonak ram a si bangin kan duh vek hlir cun thil hi a feh thluh thei țheu lo. 

Sihmansehla zumtupawl cu Jeim in a cakuat mi bung(2) cang (1)nak ah "kan Bawipa Jesuh Khrih a zumtu nan si ruangah ziangtik hmanah mi thleidannak nei hlah uh." Tiah in ti. Kawhhran sungah cun mifim/fim lo, thlarau mi le mi lo, pe tam thei le thei lo, thusim thiam le thiam lo, tivekin thleidanawknak kan nei ding a si hrimhrim lo. 

Mi piangthar, (kawhhran) zumtupawl cu Khrih ah taksa pumkhat kan si ruangah (a cak le cak lo deuh cu um kel) pakhat le pakhat somdawl aw le thlacamsakawktonnak thawn thazang pe aw in dungsip lo ten, ke kar vivo ding kan si.

THIHNAK

By, April HBoih

 Leitlun minung kumkhaw hmun ding zohman kan umlo. Thihnak cu zohman in kan neh theilo. Sun ni hman that nakin zan it a nuam vekin, damsung nun hman that nakin thihnak hlimum a thlen theu. Thihnak hi kumkhaw hmun sangka awn nak tawh(key) sunglawi asi. Thihnak umzia taktak hi kan duhdawtmi in in liam san tikah kan theifiang. Leitlun ahhin nitin 82,000 nazi tin 3400, minute tin 57 kan thi theu.

Nauhak nute pakhat in a nu hnenah a thi zomi a pa'i umnak a sutih a nu cun "Isua hnenah" ati. A hlanah a nu in "Ka pasal ka hloh" ti'n a rak tap zo ih a fanu te cun "Thil umnak kan theih hi kan hloh tinak a silo, ka pa khal kan hlohlo, Jesu'i hnenah aum asi" tiah arak ti. Missionary ropi Adoniram Judson cun, "ka rawngbawlnak hi ka ninglo, asinan Khrih in in kawh tik ahcun tlawngta nauhak caktak in innlam pan ih a tlun bangin ka tlung ding. Ka thih hnu ah lumgawinak in in hmuak asi" tiah ati.

Rinum takih zumtu sihi thih hnu hrang timlamawknak tha bik asi. Miaa cun thihnak hi a tih ih mifim cun taima zetih tuan nak ihsin cawlnak le sual sung ihsin zalennak a si ruangah a duh sawn asi. Ziangruangah suah nakah kan lungawi ih thihnak ah kan aihram theu. A san cu kan tel velo ruangah asi. Thihnak hi leiba kan rulh leh thluh dingmi cu asi.

Yona cu kum 1963 Rwanda ram ih tribal pawl intibuai lai ahkhan Pastor arak si. A umnak thin dingin anti khalah a thin duhlo. Ralkap pawl cun an kai ih a thihnak ding hmun an pan laiah aipuang zetin Pathian thangthatnak hla a sak vengveng mei. A diary ngan a dil ih "Van lam panin kan feh rero" ti'n a ngan. Kumkhaw nunnak anei zo tu cun thihnak hi a tih nawnlo. Thih zik ih rinnak neih cu a har loih damthat lai ih rinnak neih hi a har. Thihnak hi a sunglawi mi leng, Pathian hnenih in phur thlengtu asi. Scotsman cun "ka thih le dam hi umzia anei lo, ka thih le Jesu hnenah ka um dingih ka dam le Jesu ka hnenah a um ding" tiah ati.

Walter C.Wilson cu a thusim nakah Pathian um zumlo pakhat in a rak el ih "Na thurel ka zumlo, thihnak hi thil hmuahhmuah a tawpnak tilo kha cu" ati. Wilson khalin "kei khalin thihnak hi thil hmuahhmuah tawpnak asi ticu ka zum ve tho sokhaw" tiah ati. Cupa cun taktak maw? rel dik tiaw in a um ih, Wilson cun thihnak hi na thil tuahsual mi, na hlimnak pawl, na tumtahmi pawl,na rual le pawl, na theihmi thu hmuahhmuah a tawpnak cu a si. Cuihnu ah thimnak ah na feh ding ati. Hitin a sim bet, "Thihnak hi ka vahvaihnak pawl, ka tahnak pawl, ka harsatnak hmuahhmuah cu asi, cui hnu ah Bawipa hnenah ka cawl ding" tiah ati. Cupa cun "cutin ka ruat dahlo sokhaw" ati ih a pianthar phah ta asi. William Carey in ka thih hnuah ka thuhla hnakin in rundamtu thuhla run rel uar sawn uh tiah a cahta. Thih tihnak cu Jesu Khrih rinnak hmangin ati hlo thei asi.

PATHIAN IH UMPINAK LE CENCILHNAK FAMKIM ZIA

By, Rev. ThanFai

1.Pathian cu kan parah a um. Dan.4:39
a.Thut.11:29 – cutikah Bawipai thlarau cu Jepthah parah a rung thleng.
b.Thut. 14:6 – Samson, cutikah Bawipai’ thlarau cu a parah cak zetin a rung thleng. (KJV)
c.ISan.12;18 – cutikah ralbawipawl ih lubik Amasai parah thlarau a rung thleng. (KJV)
d.Thut.6:34 – Bawipa ih thlarau cu Obed ih fapa Azariah parah a rung thleng.

2. Pathian cu kan hnuai lam khalah a um.
Danp.33:27 – Catuan Pathian cu na beunak asiih, hnuailam ah cun catuan baanpawl an um.

3. Pathian cu kan hmai ah a um.
Suah. 13:21 – Bawipa cu an hmaiah lam hruai dingin a feh.
Sam. 16:8 – Bawipa cu hmai ah ka ret ringring.
Dung.2:25 – David in hitin a rak sim, Bawipa cu ka hmai ah ka hmu cia ringring.
John 10:4 – Cun a tuupawl a suah tikah an hmai in a hruai ih tuupawl in an thlun.

4. Pathian cu kan dunglam ah a um.
Suah.14:19 – Pathian ih vancungmi cu a thawn ih an dungah a feh. Cun mero zual cu an hmaiih sin a thawn ih an dung lam ah a ding.
Isai.30:21 – zin na hloh ih vorh lam le keh lam ih zin peng na zawh tikah, nan dunglam ihsin a aw hi tawk in feh uh, hinah lamzin a um tiah a tin an thei ding.

5. Pathian cu kan kimvel ah a um.
Sam.34:7 – Amah tihzahtu pawl ih kimvel ah Bawipai’ vancungmi cun tanhmun a khuarih a run hai.
Sam.125:2 – Bawipa cu a mipawl ih kimvel ah a tu ihsi thawkin  kumkhua in a um.

6. Pathian cu kan hnenah a um.
Isai.41:10 – Tihhlah, ziangahtile ka lo umpi a si.
Heb.13:5 – ka lo tanta lo dingih, ka lo tlansan dah fawn lo ding a ti a si.

7.Pathian cu kan vorhlam ah a um.
Sam.115:10 – Bawipa cu na vorhlam kapah a um.
Sam.63:8 – Na vorhlam kut in i him ter.

8. Pathian cu kan sungah a um.
Gal.2:20 – Khrih cu keimah ah a nungsawn a si.
Gal.4:6 – Pathian in a fapa ih thlarau cu kan thinlung sungah a run thlah.

THLEMNAK

By, April H Boih

• Thlemnak tawng dahlo tu cun a rinum lozia a theilo asi.
• Thlemnak fehsan hi thlemnnak ih luh hnu ih suahnak hawl sal hnakin a tha sawn.
• Thlemnak tinkim hi Pathian in naihter tu a si. 
• Ziangtiklai khalih thlemnak do ringring hi nehnak cu a si.
• Thlemnak tawn hi sual a silo.
• Thlacamnak hi thlemnak donak dingih hmanrua tha asi.
• Thothe in tisa an fem dahlo. 
• Thlemnak in a thlem theilo khop ih hmun thianghlim le hmun kawm a umlo.
• Pathian mi hi setan in a thlem thei na'n aneh theilo. 
• Damsung nun hi thlemnak hlirin a khat. 
• Setan cun tisiat dingin a thlem ih Pathian cun a cawimawi dingin a thlem. 
• Thinlung hngeh lonak le Pathian rin ngamlo nak hi thlemnak hrampi asi. 
• Thlemnak hi Khristian pawl hrangah a tangkai. 
• Setan in alo thlem dahlo a si ahcun sual do na cak dah lo ding. 
• Thlemnak hi Pathian in kan tuar in siang. Sihmanseh, inti caktu asi. 
• Thlemnak hi Pathian in auh tertu asi. 
• Thlemnak hi sualih tluknak san ah a tling lo. 
• Nehlo dingin hnget zetin kan um sawn ding asi.

BIBLE SUNGIH KUM 30-PAWL

By, CerboihPa

Bible sungih kum 30 hin taksa, thinlung le thlarau pitlinnak a langter. Kum sawmthum tlunlampawl cu mi pitling ih siar an si theu. Kum 30 hnu ih Pathian mi hman hrekkhat kan zoh tlang hnik ke aw!

1) Joseph kha Izip ramih thuneihnak sangtak neitu asiahkhan kum 30 a si.
Seem.41:46- Josef cu Izipt siangpahrang Faro ih hnatuan a thawh tikah kum sawmthum a si.

2)Levi mipawl cun kum sawmthum an kim ihsin Pathian hna (Puithiam hnatuan) an tuan thok theu.
Mipum. 4:3 – thukam retnak Puanthlam sungih hnatuan thei dingpawl, kum sawmthum le kum sawmnga karlak mipa hmuahhmuah in cazin sungah khum hai aw.

3) Soul cu a kum 30 ah Israel siangpahrang a si.
ISam.13:1 – Saul cu siangpahrang a can tikah kum sawmthum atiih, Israel singpahrang kum sawmli le kum hnih sung a tuan.

4) David cu kum 30 mi asiah Israel siangpahrang a tuan.
IISam.5:4 – David cu siangpahrang a can tikah kum sawmthum asiih kum sawmli sung siangpahrang a tuan.

5) Ezekiel cu kum 30 a si ah Pathian larawknak a hmu ih, profet si dingah kawh a si.
Ezekiel 1:1 – Kum sawmthum kum, thlali thla, ni nga ni ah, keimah Puithiam Ezekiel, Buzi ih fapa cu Babilon ram Khebar Tivapi kiangah sal ih kaih mi Judah mi pawl thawn kan um. Van a ongaw ih Pathian langnak ka hmu.

6) Bawipa Jesu in a pai’ rawng a bawl thok ahkhan kum 30 mi a si.
Luke 3:23a – Jesuh cu hnatuan a thok tikah kum sawmthum hrawng a si.

7) Bible mithiampawl cun Baptist-tu John khal kum 30 mi a si ah rawngbawlnak a thok tin an zum.
Baptist-tu John ih rawngbawl a thok kum hi Bible ah fiang zetin a langlo nan, Luke 1:36- ah Bawi Jesu aiin thla 6 ih a upat sawn thu kan hmu; curuangah Bawipai lamzin sial ih rawng a bawl thok ahkhan kum 30 hrawng a si a zumum.

Pathian rawngbawl dingah hin kum 30 kim tengteng ta a tul tinak lam siloin kan theihkauhnak hrangih ngan mi a si. Khrih thawn kan pehzomawk ih mi piangthar kan si hnuah cun rawngbawl hna hi kan thok thei ve zo a si. Pathian rawngbawl (hnatuan) ding ahhin zumtu hmuahhmuah kawh kan si. Asinan kan tuan thei dan le tuan ding mi(tuanvo) lawngte cu a dangdang cio. Thlarau thilpek in pek mi vek cio in kan ti thei tawkte te ah rinum tak in kan tuan ve cio keu uh.

VEHVAITU INTERVIEW WITH MAI-ZABIAKMAWI

(Pathian hrangah tiin Drum le Music Instruments leinak hrangih Thlakhat hlawh KRBYM ih rak hlantu Mai-Zabiak Mawi@MawiMawi Tonsuhnak)

1) Vehvaitu : Hello! Na dam maw? KRBYM Vehvaitu in Jesu hmin in na kut nem kan lo kai.. - MawiMawi: Hi, Nan thlacam saknak le Pathian zarah ka dam tha. Nan mah teh nan dam tha hai maw? Jesuh hmin in nan kut ka lo kai.

2) Vehvaitu: Aw, kannih tla kan dam. Thusuhawknak in caan hmang thok vivo mei sehla, tu hi khuitawk ciah ah ha na um ih, Cun ziangtikah khatawk na rak thleng?
- Mawimawi: Tu ih ka umnak ciah hi China ram Guangzhou khua ah ka um. Cule hitawk ka thlen hi...20,March,2017 ni ah ka thleng.

3) Vehvaitu: Aw singai, ziang mi bik saw na tuan theu?
- MawiMawi : Aw si. Innsang hna tuan lam bik a si ko.

4) Vehvaitu: Na umnak inntek thu lam lo sut mai sehla, ziang miphun ansiih, an biaknak lam tivek teh in sim thei pei maw?
 - MawiMawi : Ok. Ka inntek pawl hi Chinese miphun an siih Muslim biaknak an si.

5) Vehvaitu: Na Biaknak le an biaknak karlakah harsatnak a um maw?
 - MawiMawi : Aah!, a um lo. Nanmah ih thlacamnak cu ka parah a kim ngaingai ti hi ka fiang. Thlacamnak napin in bawm sinsin dinghi ka lo cah duh bet.

6) Vehvaitu: Tui kum ah na thlakhat hlawh rori Pathian hrangah tiin KRBYM ah na rak hlan sikhawh, fialtu le simtu tivek na neih ruangah maw, ziang tin saw na nun ih Pathian in hna a tuan dan, in ruah thei pei maw? - MawiMawi: Ok. A hlan ihsin Pathian hnenah hlawh tlinnak ka dil ii ka si thei tawpin ka ngahmi sumpai hmangin na hrangah hna ka țuan ding tiin ka rak tiam dah mi a si ih, a takin ka parah in kim ter ii cumi Pathian hnenih ka thutiam mi hmangin a hnenah ka rak hlan sal mi a si sawn.

7) Vehvaitu: Nangmah ih tumtah le duhthusam vek rori in KRBYM in Drum le Music Instruments a lei mi parah na di a riam ko maw?
 - MawiMawi :Ka duh thusam ciah cun ka diriam lo deuh cu si. Ziangahtile keimah lam ih sin sumpai lam ka tlin lo nak ruangah. Hi hnakih țha lei thei seh la cun ka duhthusam ngaingai cu si.

8)Vehvaitu: Na nun ih nuam na ti bik le har na ti bik mi?
 - MawiMawi: Ok. nuam ka tibik mi cu ka thei tawkih mi ka va bawmngah khi a si ii, har ka ti bik mi cu keimah ruangah mi an nat khi si. 😷

9) Vehvaitu : Pasal dingah hin na uarzawng/duhzawng na nei maw?
 - MawiMawi: Nei lemlo, Thinlung thiang te'n in duhdawt tu kha ka duh ve mai! 😊😊😊😉

10) Vehvaitu: Zo vek pawl hi ha miropi na ti mi?
 - MawiMawi: Miropi ka timi cu...., ziang tluk mifim, mithiam le mi dinhmunsang an si hmanah Mi dinhmun niam te le mizonzai te pawl duhdawt zangfahnak nun nei pawl khi miropi ka ti.

11) Vehvaitu: Kum 2018 sungih KRBYM in a tumtah mi music Album (tu ih buaipit rero lai mi) thu thawn pehparaw in rel duh na nei maw?
 - MawiMawi: Nei ciamco lo. A tha zet ka ti. Nan tumtah mi le nan tuah mi pawl hi tha ka ti ii hmailam khal ah zuam sinsin uh.

12) Vehvaitu: Na umnak lam ah Christian Fellowship tivekih telnak na nei maw? Off day tivek teh na nei phah thei maw? Na nitin nun/ na caan hman dan tlangpi in ruah thei kem?
 - MawiMawi:Christian felloship hi a umlo hrimhrim. Off day cu thlakhat ah voikhat ka nei nan ka suak dah lemlo. Cule ka nitin nun cu......  Zing hi 6am ah ka tho ii Breakfast ka timtuah sak. Cule nauhak tlawngkainak ding ka timtuah ii 7am ah tlawng an feh. Cuih hnuah inn hna ka țuan. Cule 11am / 11:30am hrawngah sun rawl ka suang tan ii kan ei khop in., sun cu nazi 2 ka cawl ii sun cu ka it. Ka tho veten thuamnaw ka seng ii tlailam nazi 5pm / 5:30pm cun rawl suang ka tan.,ii kan ei khop hnuah Nauhak pawl dai ka bual ter hnuah a caancaan le ca ka zoh pi hai ii cumi țheh in keimah ka bual ii ka man. Cucu siko.

13) Vehvaitu: Hmailam hrangih na sunmang (tumtah mi) in sim siang maw?
 - MawiMawi:Ok. Milian deuh siih mi tampi bawm theitu sihi ka sunmang cu si.

14) Vehvaitu: KRBYM in thla khat voikhat Vehvaitu ca a suah theu mi hi ziangtivekin na hmu? (Tha na ti ko maw)
- MawiMawi: Aw tha ka ti tuk ko.

15) Vehvaitu: Tu ih Vehvaitu ca a siar rero tui' hnenah thucah duh na neih le in cah ta awla..
 - MawiMawi: Nei lem lo.

16) Vehvaitu : Na caan sunglawi le ruahnak/thinlung pe in kan tonsuhnakpawl felfai zetih in lehsaknak parah kan lung a awi zet. A netabikah na nun zalam tluan Bawipa in lo hruai vivo hram sehla, a hrang tuan le pe thei sinsin ding khal in a thlawsuahnak dawngtu si vivo hram law! Tiin duhsaknak kan lo hlan.
- MawiMawi: Amen! Ka lungawi.

Editorial

August,2018

Pathian ih duhdawtnak le minung duhdawtnak hi a bangaw lo zet. Minung cun kan duhdawt zet mi khal zankhat thilthu ah kan huat zet mi ah an cang sal thei. Asinan Pathian duhdawtnak cu kumkhua in a hmun. 

Kan tlanlenpipawl ih um dan, kan hnatuan(rawngbawl) pi le kan rualpi-pawl khal kan lungkim le duhdan vek cun an um thluh thei theu lo ding. Asinan kannih Pathian fa (Pathian theitu) pawl cun Pathian ih in duhdawt vekin mi kan duhdawt ve a tul(IJohn 4:7-8). 

Pathian cun misual kan si lai khalah in duhdawtih, a duhdawtnak ruangah kan sualpawl khal thai hlo in a um zo. “ziang hmuahhmuah hnakin pakhat le pakhat nan thinlung takte in duhdaw- aw uh! Ziangahtile duhdawtnak in sual tampi a khuh thei a si.” (IPet.4:8)

KRBYM FAVANG LOM

SingSong Service

August 12.2018 (sun) zanah KRBYM hmin in Favang lomnak ah tiin Singsong Service hmangin Pathian thangthatnak caan hman a si.

Himi zanah hin, Mai Vanro Sung le Salai Lal tlenzo in caan an kai ih kan nuam in kan hlim tlang zet. Cun KRBYM Music Album hrangih hla hrekkhat sak suak asiih, mino members duhthusam in kan kim lo nan  Hlarem ropi tak khal neih a si fawn. 

Favang lungawi thusimnak cu Church Pastor in Pathian ah a hlanih cutin Programma theh hnuah ei le in hmang tlang in tikcu kan hmang liam a si.

Thuthan

KRBYM Music Album hrang July,24,2018 (Mon) zan ihsin hla zirkhawmnak nei thawh rero zo a si. Curuangah mino member zozo khal Zanlam 7:30 ihsi cun Biakinn lam pan cio uhsi!

Cule hmai Sunday(July.22,’18) ahkhin hla pawl kha studio lam ih kuat ding hrangah record curco thlang ding a si. Cutin a ranglam in thiam nal zauhzauh dingah kan zuam tlang cio dingih Recording-Studio lam pan in, 2018 sungih KRBYM in a tumtah mi Music Album cu hlawhtlinter lohli beisei a si.

MISSIONARY ELIHU VAN LAL HRIN TONSUHNAK

MISSIONARY  ELIHU VAN LAL HRIN  TONSUHNAK
(Date,22,2018, Sunday)

1) Vehvaitu: Hello, nan dam tha maw? Tuitum ah vehvaitu in biakkomawknak kan lo nei ngah thei hi kan lung a awi tuk.
- Hrinte : Um Pathian ih zangfahnak zarah kan dam tha ih, tu ti vekih vehvaitu tawnsuhnak in neihpi ruangah ka lungawi.

2) Vehvaitu: Missionary in ziangtikah khan nan poksuak ih, a lo thlahtu le ziangruangbikah saw hi hna ih na luhcilhnak san tvk.. in sim thei pei maw?
- Hrinte : Missionary ding in Jenuary ni 8. 2018 ihsin kan pawk suah hnu, ni 9.Jan.2018 zantim 12:30pm ah mission field cu kan thleng. In thlahtu hi Louiaville Chin Church (LCC) USA Kentucky ih um mi Kawhhran a si. (Kan theihawlsamnak dingah Pastor Thomas Suisan Lal ih Pastor tuan rero nak a si.) Hi hna tuan ding hin Pathian in boruak hmangin in rak ko. Cui boruak cu a zum hrih lotupawl hnenih thuthangtha va theihtertu ding ah nuam zetih a hnatuannak sungin kawhnak ka rak dawng.
( “Nuam zetih a hnatuannak sungin”  timi khi a nomnak hmun ihsin har deuhnak lamah tinak deuh si ko ti aw!

- si.. a umtuzia cu chinrawn level ih a zumtu ciapawl hnenih thuthangtha sim cu a rak nuam tuk ka tinak si.)

3) Vehvaitu : Tuih nan umnak hmun hi, khawitawk ciah saw asiih, ziang miphun saw an si?
- Hrinte : Tuih kan umnak hi Paku dei Okshitpin Myo asi ih, Kawl le Asu-Chin miphun deuh umnak hmun a si.

4) Vehvaitu : Pathian malsawm fanau nan nei zo ti kan rak theiih, na insang thuhla lam tiangin lo sut vivo sehla...
- Hrinte : Si.. Pathian thlawsuah in siarter mi a si. Kan fanu hmin cu Fibi Van Cer Mawi@Fibi Mawi ti asiih.. 5, May, 2018 zarhte sun ah pumkhuai in neih a si. Innsang dinhmun ah tlunlam ih in rak san sak mi inn ah thla ruk sung caan kan hmangih July thla in inn dang thawn-aw sal in thlaruk sung hrang sachuk tuah hrih asi.

5) Vehvaitu : Rawng nan bawl dan, ziangtivek in ke nan kar tivek teh in sim thei pei maw?
- Hrinte : Um, sim thei ding.. Rawng kan rak bawl thawk dan cu March thla thawk in "Love Summer English Class" tiin nauhak mirang tlawng in kan thawk ih cui sungah Pathian thu le hlapawl tla zirhawknak kan nei. May thla tiang..

6) Vehvaitu : Pathian rawng nan bawlnak ih har na ti bik mi le nuam na ti bik mi?
- Hrinte : Har ka timi bik cu phunhnam bangaw lo sinak hi a si. Cun nuam ka ti zet leh mi cu Pathian thu zik tluak vawn sim ngah hi a si.

7) Vehvaitu : Hmailam ke kar vivo nak ding hrangih na sunmang(tumtahmi) in ruah siang maw?
- Hrinte : Siang lutuk male.. hmailam ahhin Pathian in rem a ti asilen.. mifarah sin ding/fen ding neilopawl hnenih ti thei tawk ten an hrang peksuahnak le bawmnak tla nei thei ding hi kan tumtah mi a si. Cun Mirang tlawngte hmang khal ih sunzawm thei vivo ding tumtahnak kan nei.

8) Vehvaitu : A va ropi ve, A ram kauhnak ding le a sunlawinak ding hrangih nan tumtah mi Pathian in hlawhtlin ter hram seh!
Bible cang duhhleice/ kaihhnget mi tivek na nei maw?
- Hrinte : Amen! Aw hitiih vawn rel fukfi ding ah cun Rom.10:17 nak khi a si.

9) Vehvaitu : Pathian hna hi ziang mibik a si? Ziangmi kan tuah hin saw Pathian hnatuan kan si ding?
- Hrinte : Pathian hna hi mission hna asiih, tuan thu ah cun a hrang pumpekawknak hi asibik in ka hmu.

10) Vehvaitu : Kawhhran cak le caklo tahnak thabik hi ziang a si pei?
- Hrinte : Mission hna tuan le tuan lo parah asi ding.

11) Vehvaitu : KRBYM ih cangvaih dan le tuikum ih a tumtah mi Music Album ( tuih buai pit a si rero mi) thuthawn pehpar aw in rel duh na nei maw?
- Hrinte : Thu malte ka rawn rel hnik ding.. KRBYM cangvaihnak leh tumtah mi thu ah a tha lawlaw. hmansehla, khatlam ih ka rak ruah theu mi cu hmuh theih thil ah hin kekar can a tam a bang ka ti. Cun tuikum ih music Album thu ah cun ka tha a rak tho ciamco sal, in cawkphur zet. A saktu dingpawl in nun rorin sak suak hram hai seh law.

12) Vehvaitu : Hla lam thawn pehpar aw in lo sut sehla, zumtu pakhat hrangah Love Song hi ziangtivekin na hmu? Nangmah ah teh sual a si na ti maw?
- Hrinte : Sual ka ti lo, asinan pitling takin um pi sehla..

13) Vehvaitu : Missionary pakhat ih a thiam(neih) tul mi, tlinnak-pawl hi ziang mipawl an si tiah na ruat?
- Hrinte : Missionary tlinnak thu hi kan Bible ah a um lo ih, thlarau hlo veinak duhdawtnak thinlung hi a tulbik ding.

14) Vehvaitu : Hi Vehvaitu a siar rero laitu na minopi le kawhhran zapi hnenih thucah duh tivek na neih le..
- Hrinte : Aw malte ka nei.. Pathian hna na tuan cengmang len thungai thlak in tuan lawlaw aw. ziangahtilen Pathian thu na theihdan ih zir in Pathian in thu a lo then ding.

15) Vehvaitu : Vehvaitu hi ziangtivekin na hmu? (A thatnak/ duhthusamlonak na hmuh daan)
- Hrinte : Hi Vehvaitu ih vehvaihnak ca hi a tha tuk ih dam cak vivo seh. Duhthusamlonak cu KRBYM sung tuan ankaa hmuh ding a mal.

(Zangfahten, sungtuan anka na timi kha kan theithiam deuh loih in sim fiang deuh thei kem?

 – Committee member sung ihsin irawm suak thu siar ding a um tuk lo mi kha si)

16) Vehvaitu : Kan tonsuhnakpawl felfai zetih in leh/san saknak parah kan lung a awi zet. Dunglamih na kawhhran, na minopi dungtun loin, Thlatin deuh thaw mei hin Vehvaitu hmangin Pathian thu, thazang peknak thu thatha in hlawm theunak par khalah kan lung a awi tuk. A netnakah a rawng na bawl, na ren mi Bawipa in lo hmang vivo hram seh tiin duhsaknak kan lo hlan!
- Hrinte : Amen! Hi vehvaitu humhim ih thazang rak pe vivo tu zumtu si vivo dingah Pathian in malza lo sawm hai hram seh.